Read Buku Loyera - Chichewa Yes. 27 Bible Online

Yes. 27 - Buku Loyera - Chichewa bible

Yes. 27

¹ Tsiku limenelo Chauta adzagwiritsa ntchito lupanga lake lakuthwa, lalikulu ndi lamphamvu, kulanga Leviyatani, chinjoka chothaŵa chija, Leviyatani njoka yozeŵezeka, ndipo adzaphanso chilombo choopsa cham'nyanja.

²Tsiku limenelo Chauta adzalankhula za munda wake wokoma wamphesa. Adzati,

³“Ine Chauta ndine mlonda wa mundawo, nthaŵi zonse ndimauthirira. Ndimaulonda usana ndi usiku, kuti wina angauwononge.

⁴“Sindidzaukwiyiranso munda wanga wamphesawo. Minga ndi mkandankhuku zidakati ziwoneke, ndikadalimbana nazo ndi kuzitentha kotheratu.

⁵Koma ngati adani a anthu anga afuna kuti ndiŵatchinjirize, apangane nane za mtendere, ndithu apangane nane za mtendere.”

⁶Masiku akudzawo, Yakobe adzazika mizu, Israele adzachita mphukira ndi maluŵa. Ndipo adzadzaza dziko lonse lapansi ndi zipatso zake.

⁷Kodi Chauta adalanga Aisraele monga m'mene adalangira adani ao? Kodi Aisraele adaphedwa monga m'mene adaphera adani ao?

⁸Chauta adaŵalanga pa kuŵapirikitsa ndi kuŵatumiza ku ukapolo. Adaŵachotsa ndi mpweya wake waukali, monga momwe kumachitikira pa tsiku la mkuntho wochokera kuvuma.

⁹Motero machimo a Israele adzakhululukidwa, ndipo adzaonetsa kulapa kwathunthu, akadzaphwanya miyala yonse ya maguwa achikunja ndi kuisandutsa fumbi. Maguwa ofukizapo lubani ndiponso mafano ofanizira Asera sadzaonekanso.

¹⁰Mzinda wamalinga wasanduka bwinja. Wasanduka malo osiyidwa ndi oiŵalika ngati chipululu. Kumeneko kwasanduka busa la ziŵeto, ndipo ziŵeto zimapumulako ndi kumadya nthambi za mitengo.

¹¹Nthambi za mitengoyo zikauma, amazithyola, ndipo akazi amazitola nazisandutsa nkhuni. Popeza kuti anthuŵa ndi osamvetsa, nchifukwa chake Mulungu amene adaŵalanga sadzaŵamvera chisoni, Iye amene adaŵapanga sadzaŵachitira chifundo.

¹²Tsiku limenelo Chauta mwini wake adzasonkhanitsa anthu ake mmodzimmodzi, kuchokera ku mtsinje wa Yufurate mpaka ku mtsinje wa ku Ejipito.

¹³Tsiku limenelo lipenga lalikulu lidzalira kuitana Aisraele onse amene adaali mu ukapolo ku Asiriya ndi ku Ejipito. Iwowo adzabwera, ndipo adzapembedza Chauta pa phiri lake loyera la ku Yerusalemu.