Read Buku Loyera - Chichewa Yes. 29 Bible Online

Yes. 29 - Buku Loyera - Chichewa bible

Yes. 29

¹Ariyele,[7] Ariyele, tsoka kwa iwe, iwe mzinda umene Davide adamangako zithando zankhondo! Papite chaka chimodzi kapena ziŵiri, masiku onse achikondwerero apitirire ndithu,

²pamenepo Mulungu adzauthira nkhondo mzinda wa Ariyele. Tsono kudzakhala kulira ndi kudandaula, ndipo mzindawo udzasanduka ng'anjo ya guwa lansembe.

³Monga Davide, Mulungu adzamangako zithando zankhondo zolimbana ndi mzindawo, adzauzinga ndi nsanja zankhondo ndi kumanga mitumbira youthirira nkhondo.

⁴Tsono iwe Yerusalemu utagwetsedwa, udzalankhula uli pansi, mau ako adzamveka uli m'fumbi. Liwu lako lidzafumira pansi ngati la mzukwa, mau ako adzamveka ngati onong'ona kuchokera m'fumbi.

⁵Iwe Yerusalemu, chigulu cha adani ako chidzamwazika ngati fumbi, chigulu cha ankhondo ankhanza chidzabalalika ngati mungu wouluka. Ndipo mwadzidzidzi ndi mosayembekezeka,

⁶Chauta Wamphamvuzonse adzakupulumutsa ndi mabingu, zivomezi ndi phokoso lalikulu. Adzatumizanso kamvulumvulu, namondwe ndi malaŵi a moto woononga.

⁷Tsono chigulu cha mitundu ina yonse ya anthu othira nkhondo mzinda wa Ariyele, onse olimbana ndi mzindawo ndiponso linga lake lamphamvu ndi kuuzinga, onsewo adzazimirira ngati maloto, ngati zinthu zoziwona m'masomphenya usiku.

⁸Chigulu cha mitundu ina yonse ya anthu othira nkhondo Phiri la Ziyoni chidzakhala ngati munthu wanjala wolota kuti alikudya, koma podzuka, ali nayobe njala, kapena chidzakhalanso ngati munthu waludzu wolota kuti alikumwa, koma podzuka, kum'mero kudakali gwaa.

⁹Mudodome ndipo mukhale ozizwa. Dzichititseni khungu ndipo mukhalebe osapenya. Muledzere, koma osati ndi vinyo, ndipo mudzandire, koma osati ndi chakumwa chaukali.

¹⁰Chauta wakugonetsani tulo tofa nato. Wakutsekani maso, inu aneneri, wakuphimbani kumutu, inu olosa.

¹¹Kwa inu zinthu zilizonse zoziwona m'masomphenya zakhala zobisika ngati mau a m'buku lomatirira. Buku limenelo atapatsa wina wodziŵa kuŵerenga kuti aŵerenge, iye adzati, “Sindingathe, chifukwa choti nlomatidwa.”

¹²Ngati bukulo mupatsa wina wosadziŵa kuŵerenga kuti aŵerenge, adzanena kuti “Sindidziŵa kuŵerenga.”

¹³ Ambuye adati, “Anthu aŵa amati amapemphera kwa Ine, koma mau ao ndi opanda tanthauzo, ndipo mitima yao ili kutali ndi Ine. Chipembedzo chao ndi kungotsata chabe malamulo ongoŵaloŵeza pamtima, malamulo ochokera kwa anthu.

¹⁴ Nchifukwa chake Ine ndidzapitiriza kuŵachitira zodabwitsa anthu amenewo. Nzeru za anthu ao anzeru zidzatha, ndipo kuchenjera kwa anthu ao ochenjera kudzazimirira.”

¹⁵Tsoka kwa amene amabisira Chauta maganizo ao, amene amachita ntchito zao mu mdima, namaganiza kuti palibe amene akuŵaona ndi kudziŵa zimene akuchita.

¹⁶ Mwazondotsa zinthu zonse. Kodi chopambana nchiti, woumba kapena dothi loumbira? Kodi chinthu chopangidwa chingauze wochipanga kuti, “Sudandipange ndiwe?” Monga chingamuuze kuti, “Sukudziŵa chimene ukuchita?”

¹⁷Pajatu pakangopita kanthaŵi, nkhalango ya Lebanoni idzasanduka munda wachonde, ndipo munda wachonde udzasanduka nkhalango.

¹⁸Tsiku limenelo agonthi adzamva mau a m'buku, ndipo anthu akhungu amene ankakhala mumdima, adzapenya.

¹⁹Anthu odzichepetsa adzakhalanso ndi chimwemwe mwa Chauta, ndipo anthu osauka adzakondwa chifukwa cha Woyera uja wa Israele.

²⁰Koma ankhanza adzatheratu, oseka anzao adzazimirira, ndipo opendekera ku zoipa adzaonongedwa.

²¹Mulungu adzalanga anthu osinjirira anzao, ndiponso ophophonyetsa anthu ozengedwa mlandu. Adzalanganso amene amapereka umboni wonama, kuti anzao osalakwa asaweruzidwe molungama.

²²Motero tsono Chauta, Mulungu wa Israele, amene adapulumutsa Abrahamu pa mavuto, akunena kuti, “Anthu anga sadzanyozedwanso, nkhope zao sizidzagwanso ndi manyazi.

²³Iwo, ndiye kuti ana ao, akadzaona zimene ndidachita Ine pakati pao, adzatamanda dzina langa loyera. Adzazindikira kuyera kwake kwa Woyera Uja wa Yakobe, ndipo adzachita naye mantha Mulungu wa Israele.

²⁴Anthu opusa adzapeza nzeru, onyinyirika adzavomera malangizo.”