Read Buku Loyera - Chichewa Yes. 3 Bible Online

Yes. 3 - Buku Loyera - Chichewa bible

Yes. 3

¹Tsopano Ambuye, Chauta Wamphamvuzonse, ali pafupi kulanda Yerusalemu ndi Yuda chithandizo cha mtundu uliwonse chimene anthu amadalira. Adzachotsa chakudya chonse, adzachotsa madzi onse,

²anthu amphamvu ndi asilikali ankhondo, aweruzi ndi aneneri, olosa ndi akuluakulu,

³atsogoleri ankhondo ndi anthu olemekezeka, aphungu ndi amatsenga, ndiponso akatswiri a njirisi.

⁴Adzaŵaikira anyamata kuti akhale mafumu ao, ndipo ana amakanda ndiwo adzaŵalamulira.

⁵Anthu adzazunzana, aliyense adzazunza mnzake. Anyamata adzachita chipongwe akuluakulu, ndipo anthu achabechabe adzanyoza olemekezeka.

⁶Munthu adzagwira mbale wake m'nyumba ya atate ao, nkunena kuti, “Iwe uli nawo mwinjiro, ndiye ukhale mtsogoleri wathu nthaŵi yamavutoyi.”

⁷Tsiku limenelo mbale wakeyo adzayankha kuti, “Ine ai toto! Mavuto otereŵa ndilibe mankhwala ake, m'nyumba mwanga momwe ndilibe chakudya kapena chovala. Musaike ine kuti ndikhale mtsogoleri wa anthu.”

⁸Zoonadi Yerusalemu akusakazika ndipo Yuda akugwa, chifukwa zokamba ndiponso ntchito za anthu am'menemo nzonyoza Chauta. Salabadako za ulemerero wa Mulungu.

⁹Maonekedwe a nkhope zao amaŵatsutsa. Amachimwa poyera ngati m'mene ankachitira anthu a mu Sodomu, sabisa konse. Tsoka kwa iwowo, achita kudziputira okha mavuto.

¹⁰Ngodala anthu omvera Mulungu pakuti zinthu zidzaŵayendera bwino, adzakondwera ndi phindu la ntchito zao.

¹¹Koma tsoka kwa anthu oipa! Zinthu zidzaŵaipira. Zimene akhala akuchitira anzao zomwezo zidzaŵabwerera.

¹²Inu anthu anga, amene akukuponderezani ndi ana chabe, ndipo amene akukulamulani ndi akazi. Aah! Anthu anga, atsogoleri anu akukusokeretsani, akukusokonezerani njira zanu.

¹³Tsopano Chauta afuna kuyambapo mlandu, wakonzeka kale kuweruza anthu ake.

¹⁴Chauta akuŵaimba mlandu akuluakulu ndi atsogoleri a anthu ake. Akuŵazenga kuti, “Ndinu amene mwaononga munda wanga wamphesa. Nyumba zanu zadzaza ndi zinthu zolanda kwa amphaŵi.

¹⁵Mukuŵapsinjiranji anthu anga? Chifukwa chiyani mukuŵadyera masuku pamutu amphaŵi?” Akutero Ambuye, Chauta Wamphamvuzonse.

¹⁶Chauta adati, “Akazi a ku Ziyoni ngodzikuza kwambiri: amayenda makosi ali wee, amayang'ana ndi maso ophika. Amayenda nyang'anyang'a ndi kuliza zigwinjiri zam'miyendo.

¹⁷Nchifukwa chake Ambuye adzatulutsa zipere kumutu kwa akazi a ku Ziyoniwo, tsitsi lao lonse lidzatha phu!”

¹⁸Tsiku limenelo Ambuye adzaŵachotsera zokongoletsera m'miyendo, kumutu ndi m'khosi,

¹⁹maukufu, makoza, ndi nsalu zakumaso,

²⁰maduku, zigwinjiri, malamba, mabotolo a zonunkhira, zithumwa,

²¹mphete, zipini,

²²madelesi apaphwando, makepi, miinjiro, zikwama,

²³akalilole, zovala zabafuta, nduŵira, ndiponso nsalu zam'mapewa.

²⁴M'malo mwa kununkhira padzakhala kununkha, m'malo mwa lamba adzavala chingwe, m'malo mwa tsitsi lopesa bwino adzakhala ndi mipala, m'malo mwa delesi la mtengo wapatali adzavala chiguduli, m'malo mwa kunyadira kukongola adzachita manyazi.

²⁵Iwe Yerusalemu, anthu ako aamuna adzaphedwa ndi lupanga, ndipo anthu ako amphamvu adzafera ku nkhondo.

²⁶Choncho pa zipata zako padzakhala kulira kokhakokha, iweyo udzasakazidwa nkukhala pansi, ukuvimvinizika pa fumbi.