Read Buku Loyera - Chichewa Yes. 30 Bible Online

Yes. 30 - Buku Loyera - Chichewa bible

Yes. 30

¹Chauta akuti, “Tsoka kwa ana ondipandukira Ine! Amachita zodzikonzera okha osati zokonza Ine. Amachita chipangano chaochao, chosatsata chifuniro changa, ndipo amanka nachimwirachimwira.

²Amapita ku Ejipito kukapempha chithandizo, Ine osandifunsa. Amathaŵira kwa Farao kuti aŵatchinjirize, amakafuna malo opulumukirako ku Ejipito.

³Koma kutchinjiriza kwa Farao kudzakuchititsani manyazi, ndipo malo opulumukirako a ku Ejipitowo mudzachita nawo manyazi.

⁴Ngakhale kuti nduna zake zafika kale ku Zowani, ndipo akazembe ake afika kale ku Hanesi,

⁵anthu onse a ku Yuda adzamva manyazi chifukwa cha anthu opanda nawo phindu ndipo osaŵathandiza konse, koma ongobweretsa manyazi.”

⁶Nawu ulosi wonena za nyama za ku chipululu chakumwera: Akazembe akuyenda m'dziko loopsa m'mene muli mikango, mphiri ndi njoka zouluka. Amasenzetsa abulu ao mphatso zamtengowapatali ndipo chuma chao amasenzetsa ngamira zao, kupita kwa mtundu wa anthu umene sungaŵathandize.

⁷Chithandizo cha Ejipito nchachabe ndi chopanda phindu, choncho dzikolo ndalitcha dzina lakuti “Chilombo cholibwidika.”

⁸Mulungu adandiwuza kuti, “Tsopano pita, ukalembe zimenezi pa sileti iwo akuwona, ukazilembenso m'buku, kuti kutsogolo zidzakhale umboni wosatha.

⁹Ameneŵa ndi anthu opandukira Mulungu, ana onama, okana kumvera malangizo a Chauta.

¹⁰Amauza oona zobisika kuti, ‘Musaonenso.’ Amauza aneneri kuti, ‘Musatiloserenso zoona. Mutiwuze zotikomera, mutilosere zam'mutu chabe.

¹¹Chokani apa, osakhala pa njira. Sitifuna kumvanso za Woyera uja wa Israele.’ ”

¹²Nchifukwa chake Woyera uja wa Israele akunena kuti, “Inu mumanyozera zimene ndimakuuzani, mumakhulupirira zopsinja anzanu ndipo mumadalira mabodza.

¹³Nchifukwa chake tchimo lanuli lidzakhala ngati mng'ankha pa chipupa chachitali choŵinuka, chimene kugwa kwake nkwadzidzidzi.

¹⁴Zidzakhala ngati kuphwanyika kwa mbiya, imene ili yotekedzekeratu, popanda ndi phale lomwe lopalira moto, kapena lotungira madzi m'chitsime.”

¹⁵Tsono Ambuye Chauta, Woyera uja wa Israele adati, “Ngati mutembenuka ndi kubwerera, mudzapulumuka. Ngati mudzinga ndi kukhulupirira, mudzakhala amphamvu.” Koma inu mudakana kutero.

¹⁶Mudati, “Tidzathamanga pa akavalo.” Chabwino, mudzathaŵe! Mudatinso, “Tidzakwera pa magareta aliŵiro.” Chabwino, koma okuthamangitsani adzakhalanso aliŵiro.

¹⁷Anthu chikwi chimodzi mwa inu adzathaŵa poona mdani mmodzi. Asilikali asanu okha adzakwanira kukuthamangitsani. Otsalira mwa inu adzakhala ngati mtengo wa mbendera wapaphiri, ngati chizindikiro chapagomo.

¹⁸Komabe Chauta akufunitsitsa kuti akukomereni mtima. Ali wokonzeka kuti akuchitireni chifundo, chifukwa Chauta ndi Mulungu wachilungamo. Ndi odala onse amene amakhulupirira Iye!

¹⁹Ndithudi, inu anthu a ku Ziyoni, okhala ku Yerusalemu, simudzaliranso. Mulungu adzakukomerani mtima pamene adzamva kulira kwanu, ndipo akadzangomva, pompo adzakuyankhani.

²⁰Ngakhale Ambuye adzakuloŵetseni m'zovuta, adzakhala komweko kumakuphunzitsani, sadzabisala, mudzaŵaona.

²¹Pamene mupatukira kumanja kapena kumanzere, mudzamva kumbuyo kwanu mau okulozerani njira oti, “Njira ndi iyi, muyende m'menemu.”

²²Pamenepo mudzatenga mafano anu, ena okutidwa ndi siliva, ena okutidwa ndi golide, ndipo mudzaŵataya ngati zinyalala, ndikunena kuti, “Zichoke zonsezi!”

²³Mukamadzabzala mbeu zanu, Chauta adzakugwetserani mvula kuti zimere, ndipo mudzakolola zambiri. Tsiku limenelo ng'ombe zanu zidzapeza mabusa aakulu.

²⁴Ng'ombe ndi abulu zokuthandizani kulima zidzadya chakudya chamchere chopapasa ndi fosholo ndi chifoloko.

²⁵Pa tsiku limene nsanja zankhondo za adani anu zidzagwe, anthu ake naphedwa, pa phiri lililonse lalikulu ndi pa gomo lililonse lalitali, padzayenda mitsinje ya madzi.

²⁶Mwezi udzaŵala ngati dzuŵa, ndipo dzuŵa lidzaŵala kwambiri ngati kasanunkaŵiri kuŵala kwa pa tsiku limodzi. Zimenezi zidzachitika pamene Chauta adzamange ndi kupoletsa zilonda zimene Iye yemwe adachititsa pakuŵalanga anthu ake.

²⁷Onani, ulemerero wa Chauta ukuwonekera kuchokera kutali. Akuwonetsa mkwiyo m'kati mwa moto ndi m'kati mwa chiwutsi chatolotolo. Akulankhula mwaukali, ndipo mau ake akutentha ngati moto woononga.

²⁸Mpweya wake uli ngati mtsinje wosefukira, wa madzi oyesa m'khosi. Akusefa anthu a mitundu ina ndi sefa wosakaza. Ngati akavalo, akuŵaika m'kamwa chitsulo choti chiŵasokeretse.

²⁹Koma inu anthu a Mulungu, mudzakondwa ndi kuimba monga m'mene mumachitira usiku pa chikondwerero chopatulika. Mudzasangalala ngati anthu opita naimba toliro ku phiri la Chauta, thanthwe la Israele.

³⁰Chauta adzamveketsa liwu lake loopsa, ndipo anthu adzaona dzanja lake likutsika pa iwo, ndi ukali woopsa ndi malaŵi a moto woononga, pakati pa mphezi, namondwe ndi matalala.

³¹Aasiriya adzaopsedwa ndi liwu la Chauta, pamene Iye adzaŵakantha ndi ndodo yake.

³²Pamene Mulungu adzakhala akuŵalanga adani aja, anthu ake adzakhala akuvina ndi ting'oma ndi azeze. Mulungu mwini adzamenyana ndi Aasiriya.

³³Malo otenthera zinthu ndi okonza kale, adakonzera mfumu ya ku Asiriya. Malowo ndi ozama ndi aakulu, odzaza ndi moto ndi nkhuni. Tsono mpweya wa Chauta, wonga ngati mtsinje wa sulufure, udzakoleza motowo.