Read Buku Loyera - Chichewa Yes. 31 Bible Online

Yes. 31 - Buku Loyera - Chichewa bible

Yes. 31

¹Tsoka kwa amene amapita ku Ejipito kukapempha chithandizo. Iwo amadalira akavalo, ndipo amakhulupirira kuchuluka kwa magaleta ao ankhondo, ndiponso mphamvu za asilikali ao okwera pa akavalo. Koma sakhulupirira Woyera uja wa Israele, kapena kupempha chithandizo kwa Chauta.

²Komabe Chautayo ndi wanzeru ndipo angathe kuwononga. Sabweza zimene wanena, adzalimbana ndi anthu oipa ndiponso ndi anthu amene amathandiza oipawo.

³Aejipito ndi anthu chabe, si milungu ai. Akavalo ao si mizimu, koma ndi nyama chabe. Chauta akachitapo kanthu, opereka chithandizo adzaphunthwa, olandira chithandizocho adzagwa, ndipo onsewo adzathera limodzi.

⁴Chauta adandiwuza kuti, “Monga momwe mkango kapena msona wa mkango umabangulira utagwira nyama, ndipo abusa sangaupirikitse, ngakhale auwopseze ndi kufuula chotani, motero palibe chimene chingaletse Chauta Wamphamvuzonse kutchinjiriza Phiri la Ziyoni ndi gomo lake.

⁵Monga mbalame zouluka pamwamba pa zisa zake, Chauta Wamphamvuzonse adzatchinjiriza mzinda wa Yerusalemu. Adzauteteza ndi kuupulumutsa, adzausiya pambali ndi kuuwombola.”

⁶Inu Aisraele, bwererani kwa Iye amene mudampandukira kwakukulu.

⁷Pajatu tsiku limenelo nonsenu mudzataya mafano anu asiliva ndi agolide, amene mudapanga ndi manja anu auchimo.

⁸“Aasiriya adzaonongedwa pa nkhondo, osati ndi mphamvu ya munthu. Adzaonongedwa ndi lupanga, lupanga lake osati la munthu. Adzathaŵa ku nkhondo, ndipo anyamata ao adzakhala akapolo.

⁹Mfumu yao idzathaŵa ndi mantha, ndipo atsogoleri ake ankhondo adzabalalika mwamantha kwambiri, kotero kuti adzasiya mbendera zao zankhondo,” akutero Chauta amene moto wake uli ku Ziyoni, ndipo ching'anjo chake chili ku Yerusalemu.