Read Buku Loyera - Chichewa Yes. 32 Bible Online

Yes. 32 - Buku Loyera - Chichewa bible

Yes. 32

¹Nthaŵi ina kudzakhala mfumu ina yolamulira mwaungwiro, ndiponso nduna zina zoweruza mwachilungamo.

²Aliyense mwa iwo adzakhala ngati pothaŵirapo mphepo ndi malo obisalirapo namondwe. Adzakhala ngati mitsinje yoyenda m'dziko louma, ndipo ngati mthunzi wa thanthwe lalikulu m'chipululu.

³Maso a anthu openya sadzakhalanso otseka, ndipo makutu a anthu akumva adzakhala otchera.

⁴Anthu a mtima waphamphu adzadziŵa kuchita zinthu moganiza bwino, ndipo anthu achibwibwi adzalankhula mosadodoma ndi momveka.

⁵Chitsiru sichidzalandira ulemu, ndipo munthu woipa sadzalemekezeka.

⁶Munthu wopusa amalankhula zauchitsilu, ndipo amaganiza kuchita zoipa. Amachita zoipira Mulungu, amalankhula zonyoza Mulungu. Anjala saŵapatsa chakudya, aludzu saŵapatsa chakumwa.

⁷Munthu wachabechabe njira zake nzoipa. Amalingalira zaupandu kuti aŵachite chiwembu anthu osauka pakuŵanamizira, ngakhale pamene osaukawo ali osalakwa konse.

⁸Koma munthu wa mtima wabwino amalingalira zabwino, ndipo amalimbikira kuchita zabwino.

⁹Tatiyeni, inu akazi aulesi, mumve mau anga. Inu akazi odzitama, imvani zimene ndikulankhula.

¹⁰Pakapita chaka ndi masiku pang'ono, mudzanjenjemera inu akazi amatama, chifukwa mitengo ya mphesa idzakanika, zipatsonso sizidzaoneka.

¹¹Dederani inu akazi aulesi, njenjemerani, inu odzikhulupirira udyo. Vulani zovala, ndipo muvale nsanza m'chiwuno.

¹²Dzimenyeni pa chifuŵa mwachisoni, chifukwa minda yachonde ndi yamphesa yaonongeka,

¹³ndipo minga ndi mkandankhuku zikumera pa dziko la anthu anga. Ndithu, mulire nyumba zonse zimene ankakhalamo mosangalala, ndiponso mzinda umene udaali ndi chimwemwe.

¹⁴Nyumba yaufumu idzasiyidwa, ndipo mzinda wonse udzakhala wopanda anthu. Malinga ake ndi nsanja yomwe zidzasanduka mapanga mpaka muyaya. Abulu akuthengo adzasangalala kumeneko, ndipo ziŵeto zidzapeza busa komweko.

¹⁵Koma Mulungu adzatitumizira mzimu wake, kuchokera kumwamba, ndipo dziko lachipululu lidzasanduka lachonde, minda yonse idzabereka dzinthu dzambiri.

¹⁶Pamenepo m'dziko lonse mudzakhala chilungamo, kuyambira ku chipululu mpaka ku minda yachonde.

¹⁷Chifukwa anthu onse akamachita zachilungamo, m'dziko mudzakhala mtendere ndi bata mpaka muyaya.

¹⁸Anthu a Mulungu adzakhala m'midzi yamtendere, m'nyumba zokhulupirika, ndiponso m'malo ousira abata.

¹⁹Komabe nkhalango idzaonongedwa ndi matalala, ndipo mzinda udzagwetsedwa mpaka pansi.

²⁰Anthu adzakondwa kwambiri chifukwa adzakhala ndi madzi ambiri, ndipo abulu ndi ng'ombe zao azidzadya paliponse.