Read Buku Loyera - Chichewa Yes. 33 Bible Online

Yes. 33 - Buku Loyera - Chichewa bible

Yes. 33

¹Tsoka kwa iwe woonongawe, iwe amene sadakuwononge. Tsoka iwe wonyengawe, amene wina aliyense sadakunyenge. Iwe ukadzaleka kuwononga, adzakuwononga, ukadzaleka kunyenga, adzakunyenga.

²Mutichitire chifundo, Inu Chauta, tikukhulupirira Inu. Mutitchinjirize ndi dzanja lanu lamphamvu tsiku ndi tsiku, ndipo mutipulumutse pa nthaŵi yamavuto.

³Mukatulutsa liwu lanu longa bingu, mitundu ya anthu imathaŵa. Inu mukadzambatuka, mitundu ya anthu imabalalika.

⁴Amakundika zokunkha monga m'mene zimachitira ziwala. Anthu amalumphira zofunkhazo monga m'mene limachitira dzombe.

⁵Chauta ndi wolemekezeka kwambiri, pakuti akukhala pamwamba pa zonse. Adzadzaza mzinda wa Ziyoni ndi chilungamo ndi ungwiro.

⁶Adzakupatsani mtendere wokhazikika pa nthaŵi yanu. Adzakuninkhaninso chipulumutso chachikulu, luntha lambiri ndi nzerunso zambiri. Kuwopa Chauta ndiko kumapezetsa chuma chimenechi.

⁷Anthu ao olimba mtima akufuula m'miseu, akazembe odzayesa kudzetsa mtendere akulira kwamphamvu.

⁸M'miseu yaikuluikulu muli zii, palibe odzeramo. Zipangano zaphwanyidwa, mboni zanyozedwa, ndipo palibenso kulemekezana.

⁹Dziko likulira ndipo likunka lilikutha. Nkhalango za ku Lebanoni zafota, ndipo chigwa chachonde cha Saroni chasanduka chipululu. Mitengo ya ku dera la Basani ndi ya ku phiri la Karimele ikuyoyoka masamba.

¹⁰Chauta akunena kuti, “Tsopano ndichitapo kanthu, ndiwonetsa mphamvu zanga, ndipo ndidzakhala wolemekezeka kwambiri.

¹¹Inu mumaganiza zachabechabe, ndipo zonse zimene mumachita nzopandapake. Zotuluka m'kamwa mwanu zili ngati moto umene udzakuwonongani inu nomwe.

¹²Anthu a mitundu ina adzakhala ngati miyala yotenthedwa popanga njereza, adzakhala ngati minga yodula, yotenthedwa pamoto.

¹³“Inu amene muli kutali, imvani zimene ndachita. Inu amene muli pafupi, dziŵani mphamvu zanga.”

¹⁴Mu mzinda wa Ziyoni anthu ochimwa agwidwa ndi mantha, anthu osasamala za Mulungu akunjenjemera. Akunena kuti, “Ndani mwa ife angathe kupirira m'moto woonongawo? Ndani mwa ife angathe kukhalamo m'moto wosatha?”

¹⁵Angathe kutero ndi amene amachita zolungama ndi kulankhula zoona, amene amakana phindu lolipeza monyenga, amene amakutumula manja ake kuti angagwire chiphuphu, amene amatseka makutu kuti angamve mau opangana za kupha anzao, amene amatsinzina kuti angaone zoipa.

¹⁶Munthu wotere adzakhala pa malo otetezedwa. Kothaŵirako iye kudzakhala ku malinga am'matanthwe. Chakudya azidzalandira, ndipo madzi sadzamsoŵa.

¹⁷Nthaŵi imeneyo mudzayang'ana mfumu yooneka mokongola, ndipo mudzaona dziko labwino lotambasukira kutali.

¹⁸Mumtima mwanu muzidzalingalira zimene zinkakuwopsani kale. Muzidzati, “Ali kuti wokhometsa msonkho uja?”

¹⁹Simudzaonanso anthu amwano aja amene chilankhulo chao nchosadziŵika, chachilendo ndi chosamveka.

²⁰Onani Ziyoni, mzinda wa zokondwerera zathu zachipembedzo. Maso anu adzaona Yerusalemu, mzinda wamtendere, hema losasunthika. Zikhomo zake sizidzazuka, ndipo zingwe zake sizidzaduka.

²¹Kumeneko Chauta adzatiwonetsa ulemerero wake. Adzakhala malo a mitsinje yaikulu ndi yaing'ono. Ngalaŵa zankhafi sizidzapitapo, ndipo zombo zazikulu sizidzayendapo.

²²Pakuti Chauta ndiye muweruzi wathu. Chauta ndiye wotilamula, Chauta ndiye mfumu yathu, ndiye amene adzatipulumutsa.

²³Zingwe za zombo za adani athu zamasuka, sizingathe kulimbitsa mlongoti wake, ndipo matanga ake sangathe kufunyuluka. Tsono zofunkha zathu zidzakhala zochuluka kwambiri, kotero kuti pogaŵana, ndi opunduka omwe adzalandirako.

²⁴Palibe ndi mmodzi yemwe m'dzikomo wodzanena kuti, “Ndikudwala,” ndipo anthu onse akumeneko machimo ao adzakhululukidwa.