Read Buku Loyera - Chichewa Yes. 34 Bible Online

Yes. 34 - Buku Loyera - Chichewa bible

Yes. 34

¹Inu anthu a mitundu yonse, bwerani pafupi kuti mumve, inu anthu onse tcherani makutu! Limvetsere dziko pamodzi ndi zonse zokhalamo, limvetsere dziko lapansi pamodzi ndi zonse zofuma m'menemo.

²Pakuti Chauta waŵakwiyira anthu a mitundu yonse, waŵapsera mtima magulu ao onse ankhondo, watsimikiza kuti adzaonongedwa, waŵapereka kuti aphedwe.

³Mitembo ya anthu ao ophedwa adzangoitaya kunja, nimaola ndi kumanunkha, ndipo mapiri adzafiira ndi magazi.

⁴ Dzuŵa, mwezi ndi nyenyezi zidzanyenyeka, ndipo mlengalenga udzakulungika monga chimachitira chikopa. Nyenyezi zonse zidzayoyoka monga amachitira masamba a mpesa kapena a mkuyu.

⁵ Chauta akuti, “Lupanga langa lakhutiratu kumwamba. Si ili likutsika kudzalanga Aedomu, anthu amene ndatsimikiza kuti ndiŵaononga.”

⁶Lupanga la Chauta lakhuta magazi, ndipo lakutidwa ndi mafuta. Magazi ake a anaankhosa ndi a mbuzi, ndipo mafuta ake a ku impso za nkhosa zamphongo. Pakuti Chauta ali ndi nsembe mu mzinda wa Bozira, ndiye kuti kuphedwa kwa anthu ambiri m'dziko la Edomu.

⁷Pamodzi ndi anthuwo zidzaphedwanso njati ndiponso ng'ombe zamphongo zazing'ono ndi zazikulu zomwe. Dziko lao lidzakhuta magazi, ndipo nthaka yao idzakutidwa ndi mafuta.

⁸Imeneyi ndiyo nthaŵi imene Chauta adzalipsira, pamene adzalanga adani a Ziyoni, ndi kuteteza anthu ake.

⁹Madzi a m'mitsinje ya ku Edomu adzasanduka phula, ndipo dothi lake lidzasanduka sulufure. Dziko lonse lidzasanduka phula lamoto.

¹⁰ Motowo udzayaka usana ndi usiku, ndipo utsi udzafuka kosalekeza. Dziko lidzakhala chipululu pa mibadwo ndi mibadwo, palibe ndi mmodzi yemwe amene adzayendamonso.

¹¹M'dzikomo muzidzakhala akabaŵi ndi nungu, akadzidzi ndi makwangwala. Chauta adzalisandutsanso dziko loguga ndi lopanda kanthu.

¹²Akuluakulu sadzasankhanso mfumu kumeneko, ndipo atsogoleri ake onse adzakhala atachotsedwa.

¹³Minga idzamera m'nyumba zake zankhondo zotetezedwa, khwisa ndi mitungwi zidzamera m'malinga mwake. Nkhandwe zizidzayendayenda m'menemo, nthiŵatiŵa zidzapezamo mokhala.

¹⁴Avumbwe adzakumana ndi afisi, nyama zakuthengo zizidzaitanizana. Kumeneko mizimu yoipa yausiku idzafika ndipo idzapeza malo opumulirako.

¹⁵Akadzidzi adzamangako zisa zao, nkuikirako mazira, ndi kuswa ana ao namaŵasamala. Adembo adzasonkhana kumeneko aŵiriaŵiri.

¹⁶Funafunani ndi kuŵerenga m'buku la Chauta. Mwa zolengedwazi palibe chimene chidzasoŵa, ndipo sipadzakhala nchimodzi chomwe chopanda chinzake. Pakuti Chauta walamula kuti zitero, ndipo mzimu wake wazisonkhanitsa pamodzi.

¹⁷Chauta ndiye wagaŵa dzikolo, wapatsa chilichonse chigawo chake. Dzikolo lidzakhala lao mpaka muyaya, ndipo zidzakhala m'menemo pa mibadwo yonse.