Read Buku Loyera - Chichewa Yes. 35 Bible Online

Yes. 35 - Buku Loyera - Chichewa bible

Yes. 35

¹Chipululu ndi dziko lopanda madzi zidzasangalala, dziko louma lidzakondwa ndi kuchita maluŵa.

²Dzikolo lidzakhala ndi maluŵa ochuluka ongodzimerera okha. Lidzasangalala ndi kufuula ndi chimwemwe. Lidzakhala ndi ulemerero wonga wa mapiri a ku Lebanoni, maonekedwe ake adzakhala okongola ngati a ku Karimele ndi Saroni. Aliyense adzaona ulemerero wa Chauta ndi ukulu wa Mulungu wathu.

³ Mulimbitse manja ofooka, ndi kuŵapatsa mphamvu maondo olobodoka.

⁴Muuze onse a mtima wamantha kuti, “Limbani mtima, musachite mantha. Mulungu wanu akubwera kudzalipsira ndi kulanga adani anu. Akubwera kudzakupulumutsani.”

⁵ Pamenepo maso a anthu akhungu adzaphenyuka, ndipo makutu a agonthi adzatsekuka.

⁶Opunduka adzalumpha ngati mphoyo, ndipo osalankhula adzaimba mokondwa. Akasupe adzatumphuka m'chipululu, ndipo mitsinje idzayenda m'dziko louma.

⁷Mchenga wotentha udzasanduka nyanja, ndipo dziko louma lidzasanduka la akasupe. Pamene panali mbuto za nkhandwe padzamera udzu ndi bango.

⁸Kumeneko kudzakhala mseu waukulu wotchedwa “Mseu Wopatulika.” Ochimwa sadzayendamo, ndipo zitsilu sizidzasokera m'menemo.

⁹Kumeneko sikudzakhala mikango, ndipo nyama zoopsa sizidzafikako, sizidzapezeka konse kumeneko. Koma okhawo amene Chauta adaŵapulumutsa, adzayenda mu mseu umenewu.

¹⁰Amene Chauta adaŵaombola adzabwerera, ndipo adzafika ku Ziyoni akuimba mosangalala. Kumeneko adzakondwa mpaka muyaya, ndipo adzaona chimwemwe ndi chisangalalo. Chisoni ndi kudandaula zidzatheratu.