Read Buku Loyera - Chichewa Yes. 38 Bible Online

Yes. 38 - Buku Loyera - Chichewa bible

Yes. 38

¹Nthaŵi imeneyo mfumu Hezekiya adaadwala, ndipo anali pafupi kufa. Mneneri Yesaya, mwana wa Amozi, adapita kukamuwona, namuuza kuti, “Chauta akuti ukonze zonse bwino lomwe, poti ufa, suchira ai.”

²Pomwepo Hezekiya adatembenuka nayang'ana ku khoma, nayamba kupemphera kwa Chauta kuti,

³“Inu Chauta, mukumbukire kuti ndakhala ndikukutumikirani mokhulupirika ndi modzipereka. Ndipo nthaŵi zonse ndinali kuchita zokukomerani.” Atatero adayamba kulira ndi mtima woŵaŵa.

⁴Tsono Chauta adalamula Yesaya kuti,

⁵“Pitanso kwa Hezekiya, ukamuuze kuti, ‘Ine Chauta, Mulungu wa kholo lako Davide, ndamva pemphero lako, ndipo misozi yako ndaiwona. Nchifukwa chake ndidzakuwonjezera zaka khumi ndi zisanu pa moyo wako.

⁶Ndidzakupulumutsa iwe pamodzi ndi mzindawu kwa mfumu ya ku Asiriya, ndipo mzindawu ndidzautchinjiriza.’ ”

⁷Yesaya adauza Hezekiya kuti, “Chauta adzakupatsani chizindikiro kutsimikiza kuti adzasunga lonjezo lake.

⁸Akuti, ‘Chithunzithunzi chimene dzuŵa likuchititsa pa makwerero a Ahazi, ndidzachibweza m'mbuyo makwerero khumi.’ ” Ndipo chithunzithunzicho chidabwereradi m'mbuyo makwerero khumi.

⁹Ndakatulo ya Hezekiya mfumu ya ku Yuda, amene adaadwala kenaka nkuchira:

¹⁰“Ndinkaganiza kuti ndizipita ku dziko la akufa, ndidakali mnyamata wabiriŵiri, ndipo kuti ndidzakhala komweko mpakampaka.

¹¹Ndinkaganiza kuti pa dziko lino la anthu amoyo, sindidzaonanso Chauta, anthu okhala pansi pano sindidzaŵapenyanso.

¹²Moyo wanga walandidwa ndi kuchotsedwa, ngati hema logwetsedwa, ngati nsalu yodulidwa ku makina ake oombera. Kuyambira m'maŵa mpaka usiku mwakhala mukunditsiriza.

¹³Usiku wonse mpaka m'maŵa ndinkalira ndi ululu. Munkaphwanya mafupa anga onse, monga umachitira mkango. Kuyambira m'maŵa mpaka usiku mwakhala mukunditsiriza.

¹⁴“Ndinkalira ngati namzeze wovutika, ndinkabuula ngati nkhunda yodandaula. Maso anga adaatopa nkuyang'ana kumwamba. Inu Ambuye, ndili m'mavuto, dzanditetezeni.

¹⁵Kodi ndinganene chiyani? Chauta walankhula nane, ndipo wachita zimenezi ndiye amene. Pa moyo wanga wonse ndidzakhala wovutika, chifukwa cha kuŵaŵa kwa mtima wanga.

¹⁶“Inu Ambuye, anthu amakhala moyo ndi zimenezi, moyo wa mzimu wanga uli mu zomwezo. Mundichiritse ndi kundibwezera moyo.

¹⁷Chimene ndidamvera zoŵaŵa nkuti ndipeze bwino. Mwapulumutsa moyo wanga ku manda, mwataya machimo anga onse kumbuyo kwanu.

¹⁸Akumanda sangathe kukuyamikani, akufa sangathe kukutamandani. Otsikira ku manda sangathe kukukhulupirirani.

¹⁹Amoyo, amoyo okha, ndiwo amakutamandani, monga m'mene ndikuchitira ine tsopanomu. Atate amauza ana ao za kukhulupirika kwanu.

²⁰“Chauta wandipulumutsa, ndipo tidzamtamanda poimba ndi azeze m'Nyumba mwa Chauta pa moyo wathu wonse.”

²¹Pamenepo Yesaya adati, “Anthu atenge ntchintchi yankhuyu, aimate pa chithupsa, ndipo mfumu Hezekiya adzachira.”

²²Tsono mfumu Hezekiya adafunsa kuti, “Kodi chizindikiro chake nchiyani chotsimikizira kuti ndidzapita ku Nyumba ya Chauta?”[8]