Read Buku Loyera - Chichewa Yes. 41 Bible Online

Yes. 41 - Buku Loyera - Chichewa bible

Yes. 41

¹Mulungu akuti, “Mukhale chete ndipo mundimvere, inu maiko a m'mphepete mwa nyanja. Anthu a mitundu yonse akhale ndi mphamvu zatsopano. Asendere ndi kulankhulapo. Tiyeni tikhale pamodzi pa mlandu atiweruze.

²“Kodi ndani adabweretsa wogonjetsa uja wochokera kuvuma,[9] wonka napambana kulikonse kumene amapita? Ndani amamthandiza kuti apambane anthu a mitundu ina, ndi kugonjetsa mafumu? Lupanga lake limaŵasandutsa anthuwo kukhala ngati fumbi lapansi, uta wake umaŵamwaza ngati mankhusu.

³Amaŵalondola namayenda mosavutika, m'njira zimene mapazi ake sadayendemo kale.

⁴Ndani adachita zimenezi mpaka kuzitsiriza, osakhala amene adayambitsa mitundu yonse ya anthu? Ndi Ineyo, Chauta, amene ndine chiyambi, ndipo ndidzakhalabe yemweyo pakati pa otsiriza.”

⁵Anthu a maiko a m'mphepete mwa nyanja aona zimene ndachita ndipo aopsedwa, anthu a pa mathero a dziko lapansi ali njenjenje. Akusendera pafupi, akubwera.

⁶Aliyense akuthandiza mnzake, akuuza mbale wake kuti, “Limba mtima.”

⁷Mmisiri wa matabwa amalimbikitsa mmisiri wosungunula golide, wosalaza fano ndi nyundo amalimbikitsa wolisanja pa chipala, ndipo ponena za kuwotcherera amati, “Kwachitika bwino.” Kenaka amalikhomerera fanolo ndi misomali kuti lisagwedezeke.

⁸ Koma iwe Israele mtumiki wanga, iweyo Yakobe amene ndakusankhula, ndiwe mdzukulu wa Abrahamu bwenzi langa.

⁹Ndidakutenga kuchokera ku mapeto a dziko lapansi, ndidakuitana kuchokera ku mbali zakutali za dziko. Ndipo ndidzakuuza kuti, “Iwe ndiwe mtumiki wanga, ndidakusankhula, sindidakutaye.”

¹⁰Usachite mantha chifukwa Ine ndili nawe, usataye mtima, poti Ine ndine Mulungu wako. Ndidzakupatsa mphamvu, ndidzakuthandiza, ndidzakutchinjiriza ndi dzanja langa lamanja logonjetsa.

¹¹Motero onse amene akukupsera mtima adzachita manyazi ndi kunyazitsidwa. Amene akumenyana nawe adzakhala ngati salinso kanthu, ndipo adzafa.

¹²Udzafunafuna amene amakangana nawe, koma osaŵapeza. Amene amamenyana nawe nkhondo adzakhala ngati salinso kanthu.

¹³Ine, Chauta Mulungu wako, ndikukugwira dzanja, ndine amene ndikukuuza kuti, “Usachite mantha, ndidzakuthandiza.”

¹⁴Usaope, iwe Yakobe, wofooka ngati nyongolotsi, usachite mantha, iwe Israele, wooneka ngati mtembo, chifukwa Ineyo ndidzakuthandiza. Mpulumutsi wako ndine, Woyera uja wa Israele.

¹⁵Ndidzakusandutsa ngati chipangizo chopunthira tirigu, chatsopano, cha mano akuthwa. Udzanyenya mapiri ndi kuŵaphwanyaphwanya. Magomo udzaŵasandutsa mankhusu.

¹⁶Udzaŵapeta, ndipo adzauluka ndi mphepo nadzamwazika ndi namondwe. Koma iwe udzakondwa chifukwa choti Ine ndine Mulungu wako. Udzapeza ulemerero chifukwa cha Ine, Woyera uja wa Israele.

¹⁷Pamene amphaŵi ndi osauka akufunafuna madzi, koma osaŵapeza, ndipo kum'mero kwao kwangoti gwa ndi ludzu, Ine Chauta ndidzayankha pemphero lao, Ine Mulungu wa Israele sindidzaŵasiya.

¹⁸Ndidzayendetsa mitsinje pakati pa zitunda zouma, ndipo akasupe adzatumphuka m'zigwa. Ndidzasandutsa chipululu kukhala chidziŵe cha madzi, ndi dziko louma kukhala akasupe.

¹⁹M'chipululu ndidzameretsa mkungudza, kasiya, mchisu ndi mtengo wa olivi. M'dziko louma ndidzabzala mitengo ya paini ya mitundu itatu.

²⁰Choncho anthu adzaona ndi kudziŵa, adzazindikira ndi kumvetsa kuti Chauta ndiye adachita zimenezi, kuti Woyera uja wa Israele ndiye adakonza zimenezi.

²¹Chauta akuuza milungu kuti, “Dzafotokozeni mlandu wanu.” Chauta, Mfumu ya Yakobe akuti, “Perekani umboni wanu.

²²Mubwere kuno, mudzatiwuze zam'tsogolo. Mufotokozere bwalo zamakedzana, kuti tiziganizire, ndipo tidziŵe zotsatira zake, kapena mutiwuze zakutsogolo.

²³Tiwuzenitu zimene zidzachitike kutsogolo kuti tidziŵe kuti ndinu milungudi. Chitani zabwino kapena kubweretsa masoka, kuti mutidabwitse ndi kutichititsa mantha.

²⁴Inuyo sindinu kanthu konse, ndipo zochita zanu nzopandapake. Amene amakupembedzaniyo amandinyansa.

²⁵“Ndautsa munthu wina kumpoto, ndipo wabwera. Munthuyo, kuchokera chakuvuma, amamva kuitana pomutchula dzina. Amaponda olamulira ngati matope, monga m'mene munthu woumba mbiya amapondera mtapo.

²⁶Ndani adaululiratu zimenezi poyamba pomwe kuti ife tidziŵe? Ndani adatiwuziratu zimenezi zisanachitike, kuti ife tinene kuti, ‘Wakhoza?’ Palibe ndi mmodzi yemwe adazinena, palibe ndi mmodzi yemwe adazilengeza, ndipo palibe amene adamva mau anu.

²⁷Ine Chauta ndine amene ndidayambirira kumuuza Ziyoni kuti, ‘Si awo! Akubwera!’ Ndine amene ndidatuma munthu wokanena uthenga wabwinowu ku Yerusalemu.

²⁸Koma ndikayang'ana, palibe ndi mmodzi yemwe: palibe wotha kulangiza, palibe wotha kuyankha mafunso anga.

²⁹Ndithudi, milungu yonseyi njachabe, zochita zake si kanthu konse. Mafano ake osungunula ali ngati mphepo yachabechabe.”