Read Buku Loyera - Chichewa Yes. 45 Bible Online

Yes. 45 - Buku Loyera - Chichewa bible

Yes. 45

¹Chauta akulankhula ndi wodzozedwa wake Kirusi amene adamgwira dzanja lamanja, kuti agonjetse mitundu ina ya anthu, aŵathe mphamvu mafumu, ndi kutsekula zitseko kuti zipata zisatsekeke.

²Akunena kuti, “Ndidzayenda patsogolo pako, ndi kusalaza zitunda. Ndidzaphwanyaphwanya zitseko zamkuŵa, ndipo ndidzathyolathyola mipiringidzo yake yachitsulo.

³Ndidzakupatsa chuma chosaoneka poyera ndi katundu wa m'malo obisika. Motero udzadziŵa kuti ndine Chauta, Mulungu wa Israele, amene ndikukuitana pokutchula dzina.

⁴Chifukwa cha mtumiki wanga Yakobe, chifukwa cha wosankhidwa wanga Israele, ndikukuitana potchula dzina lako, ndikukupatsa dzina laulemu ngakhale iwe sukundidziŵa.

⁵Chauta ndine, palibenso wina, kupatula ine palibe Mulungu wina. Ndidzakupatsa mphamvu ngakhale sukundidziŵa.

⁶Ndidzachita zimenezi kuti kuchokera kuvuma mpaka kuzambwe aliyense adziŵe kuti palibe wina koma Ine ndekha. Chauta ndine, palibenso wina.

⁷“Ndimalenga kuŵala ndi mdima, ndimadzetsa madalitso ndi tsoka. Ndine, Chauta, amene ndimachita zonsezi.

⁸“Gwetsa mvula, iwe thambo, kuchokera kumwamba, mitambo ikhuthule chilungamo chopulumutsa. Dziko lapansi litsekuke kuti patuluke chipulumutso, kuti chilungamo chimerepo. Ndine, Chauta, amene ndidalenga zimenezi.”

⁹ Tsoka kwa amene amakangana ndi mlengi wake, ngakhale ali ngati phale chabe pakati pa mapale anzake. Kodi mtapo ungafunse munthu woumba kuti, “Kodi ukuumba chiyani?” Kapena kunena kuti, “Woumbawe, ulibe luso!”

¹⁰Tsoka kwa wofunsa bambo wake kuti, “Mwabereka chiyani,” kapena mai wake kuti, “Mwabala chiyani?”

¹¹Chauta, Woyera uja wa Israele ndiponso Mlengi wake, akunena kuti, “Kodi iwe ungandifunse za ana anga, kapena kundilamula pa zokhudza ntchito zanga?

¹²Ndine amene ndidalenga dziko lapansi ndi kulenga munthu kuti akhalemo. Ndidayalika zakuthambo ndi manja anga, ndipo tsopano ndimalamulira gulu lonse lamumlengalenga.

¹³Ndine amene ndidautsa Kirusi kuti chilungamo chichitike. Ndidzaongola mseu uliwonse umene adzadzeramo. Adzamanganso mzinda wanga wa Yerusalemu ndi kumasula anthu anga amene ali mu ukapolo, osapereka ndalama kapena mphotho,” watero Chauta Mphambe.

¹⁴Chauta akuuza Aisraele kuti, “Chuma cha ku Ejipito ndi malonda a ku Etiopiya zidzakhala zanu. Anthu a ku Saba, a msinkhu aatali, adzabwera kwa inu ndi kukhala akapolo anu ndipo azidzakutsatani. Adzabwera ali omangidwa ndi maunyolo, ndi kukugwadirani. Adzakupembani ndi kunena kuti, ‘Mulungu ali ndi inu nokha, palibenso wina ai. Kupatula Iyeyo palibe mulungu wina.

¹⁵Ndithu inu muli ndi Mulungu wobisika, amene ali Mulungu wa Israele ndiponso Mpulumutsi.

¹⁶Onse amene amapanga mafano, adzaŵachititsa manyazi ndi kunyozetsa, adzamwazikana atasokonezeka.

¹⁷Koma Israele amampulumutsa ndi Chauta, ndipo chipulumutso chake chidzakhalapo mpaka muyaya, Anthu ake sadzaŵachititsa manyazi konse, sadzakhala onyozeka konse.’ ”

¹⁸Akutero Chauta amene adalenga zakumwamba, ndi Iyeyo Mulungu amene adaumba ndi kulenga dziko lapansi, ndipo adalikhazikitsa mwamphamvu. Sadalipange kuti likhale lopanda kanthu, koma kuti likhale malo okhalamo anthu. Iyeyo akunena kuti: “Chauta ndine, palibenso wina ai.

¹⁹Sindidalankhule mwachinsinsi pa malo ena m'dziko lamdima. Sindidauze zidzukulu za Yakobe kuti zizindifunafuna kumene kuli kopanda kanthu. Ine Chauta ndimalankhula zoona, ndimanena zolungama.”

²⁰Chauta akuti, “Musonkhane pamodzi ndipo mubwere. Musendere pafupi, inu nonse amene mudapulumuka kwa anthu a mitundu ina! Ndi opanda nzeru amene amanyamula mafano amitengo, namapemphera kwa milungu imene singathe kuŵapulumutsa.

²¹Kambani, fotokozani mlandu wanu. Mupatsane nzeru nonse pamodzi. Kodi ndani adaneneratu zimene zidzachitika? Ndani adaloseratu kalekale zimenezo? Kodi si Ineyo, Chautane? Ndithu, kupatula Ine palibe Mulungu wina, Mulungu wachilungamo ndi wopulumutsa. Palibenso wina aliyense kupatula Ine.”

²²“Inu anthu onse a pa dziko lapansi, tembenukirani kwa Ine kuti mupulumuke. Paja Ine ndine Mulungu, palibenso wina ai.

²³ Ndalumbira dzina langa lomwe, pakamwa panga palankhula moona mau amene sadzasinthika konse, akuti, ‘Bondo lililonse lidzandigwadira, anthu onse adzalumbira potchula dzina langa.’

²⁴“Pokamba za Ine adzanena kuti, ‘Chilungamo ndiponso mphamvu zimapezeka mwa Chauta yekha. Onse amene ankamugalukira adzabwera kwa Iye ndipo adzachita manyazi.

²⁵Koma mwa Chautayo zidzukulu zonse za Israele zidzapambana ndi kupeza ulemerero.’ ”