Read Buku Loyera - Chichewa Yes. 52 Bible Online

Yes. 52 - Buku Loyera - Chichewa bible

Yes. 52

¹ Dzuka, dzuka, vala dzilimbe iwe Ziyoni. Vala zovala zako zabwino, iwe Yerusalemu, mzinda woyera. Anthu osaumbalidwa ndi onyansa pa chipembedzo sadzaloŵanso pa zipata zako.

²Udzisanse fumbi ndipo udzuke, iwe Yerusalemu wogwidwa. Inu omangidwa a ku Ziyoni, aduleni maunyolo ali m'khosi mwanuwo.

³Chauta akunena kuti, “Sadalandirepo kanthu pokugulitsani, choncho mudzaomboledwa osaperekapo ndalama.

⁴Kale inu anthu anga mudaapita ku Ejipito kukakhala nao kumeneko, ndipo Aasiriya adaakuzunzani popanda chifukwa.

⁵ Tsono Ine Chauta ndikunena kuti, ‘Tsopano nditani poona kuti anthu anganu adakutengani ukapolo osaperekapo kanthu? Okulamulani akufuula monyodola, ndipo angokhalira kundinyoza kosalekeza.

⁶Pamenepo inu anthu anga mudzandidziŵa, nthaŵi imeneyo mudzadziŵa kuti ndine amene ndikulankhula. Ndithu ndinedi!’ ”

⁷ Si kukondwetsa kwake pamene mukuwona wamthenga akuyenda m'mapiri, akubwera ndi uthenga wabwino, akulengeza za mtendere, akudzetsa chisangalalo, akulengeza za chipulumutso, akuuza anthu a ku Ziyoni kuti, “Mulungu wanu ndi mfumu.”

⁸Mverani, alonda anu akukweza mau, akuimba pamodzi mokondwa, popeza kuti akuwona chamaso Chauta akubweranso ku Ziyoni.

⁹Fuulani mokondwera inu mabwinja a Yerusalemu, pakuti Chauta waŵatonthoza mtima anthu ake, wapulumutsa Yerusalemu.

¹⁰Chauta wagwiritsa ntchito mphamvu zake zoyera pamaso pa anthu a mitundu yonse, dziko lonse lapansi mpaka ku mathero lidzaona chipulumutso cha Mulungu wathu.

¹¹ Nyamukani, nyamukani, chokaniko msanga ku Babiloniko, musakhudze kanthu konyansa pa chipembedzo. Tulukanimo ndipo mudziyeretse, inu amene mukunyamula ziŵiya zopatulikira Chauta.

¹²Koma ulendo uno simudzachoka mofulumira, simudzachita chothaŵa. Chauta azidzayenda patsogolo panu, Mulungu wa Aisraele azidzakutetezani kumbuyo kwanu.

¹³Chauta akuti, “Mtumiki wanga adzapambana pa ntchito yake. Adzakwezedwa ndi kulemekezedwa, ndipo adzalandira ulemu waukulu kwambiri.

¹⁴Anthu ambiri atamuwona adadzidzimuka, chifukwa nkhope yake inali itasakazika, kotero kuti siinkachitanso ngati ya munthu. Maonekedwe ake sanalinso ngati a munthu.

¹⁵Chimodzimodzinso anthu a mitundu yonse adzadodoma naye, Mafumu omwe adzasoŵa naye chonena, popeza kuti zinthu zosaŵauzapo chiyambire adzaziwona, ndipo zinthu zosamvapo nkale lonse, adzazimvetsa.”