Read Buku Loyera - Chichewa Yes. 54 Bible Online

Yes. 54 - Buku Loyera - Chichewa bible

Yes. 54

¹ “Fuula ndi chimwemwe iwe Yerusalemu amene wakhala ngati chumba chopanda ana, fuula mosangalala, iwe amene sudamvepo zoŵaŵa za kubala. Pakuti tsopano udzakhala ndi ana ochuluka kuposa mkazi amene sadasiyidweko ndi mwamuna wake,” akuterotu Chauta.

²“Ukuze malo omangapo hema lako, ufunyulule kwambiri nsalu zake. Usalephere, utalikitse zingwe zake, ndipo ulimbitse zikhomo zake.

³Udzasendeza malire ake uku ndi uku. Zidzukulu zako zidzalanda dziko la anthu a mitundu ina, zidzadzaza mizinda imene idasiyidwa.

⁴“Usaope, chifukwa sadzakunyozanso, usataye mtima poti sadzakupeputsanso. Udzaiŵala zimene zidakuchititsa manyazi pa unyamata wako, manyazi a pa umasiye wako sudzaŵakumbukanso.

⁵Mlengi wako ali ngati mwamuna wako. Chauta Wamphamvuzonse ndiye dzina lake. Woyera Uja wa Israele ndiye Momboli wako, dzina lake ndi Mulungu wa dziko lonse lapansi.

⁶Iwe Israele, Chauta wakuitananso. Uli ngati msungwana wosiyidwa, amene ali wodzaza ndi chisoni mu mtima, ngati mkazi wapaunyamata amene wachotsedwa, akuterotu Mulungu wako.”

⁷“Ndidaakusiya pa kamphindi kochepa, koma ndidzakutenganso ndi chikondi chachikulu.

⁸Ndidaakufulatira pa mphindi yaing'ono ndili wokwiya zedi, koma ndidzakuwonetsa chikondi changa mpaka muyaya,” akuterotu Chauta, Momboli wako.

⁹ “Kwa ine zimenezi zili monga m'mene zinaliri nthaŵi ya Nowa: monga momwe ndidaalumbirira nthaŵi imeneyo kuti sindidzaononganso dziko lapansi ndi chigumula, chonchonso tsopano ndikulumbiranso kuti sindidzakupseranso mtima, ndipo sindidzakudzudzulanso.

¹⁰Mapiri angathe kusuntha, magomo angathe kugwedezeka, koma chikondi changa chosasinthika pa iwe sichidzatha. Lonjezo langa losunga mtendere mpaka muyaya silidzatha,” akuterotu Chauta amene amakumvera chifundo.

¹¹ Chauta akunena kuti, “Iwe Yerusalemu ndiwe mzinda wozunzika, wosoŵa chithandizo, wopanda wokutonthoza. Ndidzakongoletsa miyala yako, ndidzamanganso maziko ako ndi miyala ya mtengo wapatali.

¹²Ndidzamanga nsanja zako ndi miyala yofiira. Ndidzamanga zipata zako ndi miyala yochezimira ngati moto. Ndidzamanganso linga lokuzungulira ndi miyala ya mtengo wapatali.

¹³ Anthu ako ndidzaŵaphunzitsa ndekha, Ine Chauta, ana ako ndidzaŵadalitsa ndi kuŵapatsa mtendere waukulu.

¹⁴Udzakhazikika m'chilungamo chenicheni. Sudzakhalanso wopanikizika, chifukwa palibe choopa, sudzakhalanso ndi mantha, chifukwa manthawo sadzakufikira.

¹⁵Ngati wina autsa nkhondo, si ndine ndachititsa ai. Amene alimbana nawe adzalephera, poti udzaŵagonjetsa.

¹⁶Udziŵe kuti ndidalenga ndine munthu wosula, amene amakoleza moto wamakala kuti asulire zida. Ndidalenganso ndine munthu wosakaza kuti aononge.

¹⁷Koma iwe palibe chida chopangidwa ndi mdani chimene chidzakupweteke. Onse okuneneza udzaŵatsutsa. Ndimo adzapezera atumiki anga, ndipo ndidzaŵapambanitsa ndine,” akuterotu Chauta.