Read Buku Loyera - Chichewa Yes. 56 Bible Online

Yes. 56 - Buku Loyera - Chichewa bible

Yes. 56

¹Chauta akuuza anthu ake kuti, “Muzichita zabwino ndi zolungama, chifukwa ndikuwombolani posachedwa, chipulumutso changa chiwoneka.”

²Ndi wodala munthu amene amachita zimenezi, munthu amene amalimbikira kuzichita, amene amalemekeza tsiku la Sabata, osaliwononga, ndipo amadziletsa kuchita zoipa.

³Mkunja amene waphatikana ndi Chauta, asanene kuti, “Mosapeneka konse Chauta adzandichotsa pakati pa anthu ake.” Nayenso wofulidwa asanene kuti, “Ine ndiye ndine wouma ngati chikuni.”

⁴Paja Chauta akuti, “Ofulidwa amene amalemekeza masiku a Sabata, amene amachita zokomera Ine, ndi kusunga chipangano changa mokhulupirika,

⁵Ineyo ndidzaŵapatsa dzina ndi mbiri yabwino pakati pa anthu anga, m'kati mwa fuko langa, koposa kukhala ndi ana aamuna ndi aakazi. Ndidzaŵapatsa mbiri yabwino yosatha, yosaiŵalika.”

⁶Chauta akutinso, “Akunja amene amaphatikana ndi Chauta mpaka kumgwirira ntchito, kumkonda, ndi kumtumikira, amenenso amalemekeza tsiku la Sabata, osaliwononga, nasunga bwino chipangano changa,

⁷Ine ndidzaŵafikitsa ku Ziyoni, phiri langa lopatulika. Ndidzaŵapatsa chimwemwe m'nyumba yanga yopemphereramo. Zopereka zao zootcha ndiponso nsembe zao zinanso ndidzazilandira pa guwa langa. Paja Nyumba yanga idzatchedwa nyumba yopemphereramo anthu a mitundu yonse.”

⁸Chauta, amene amasonkhanitsa Aisraele onse obalalika, akunena kuti, “Ndidzasonkhanitsanso anthu ena kuwonjezera pa amene adasonkhana kale.”

⁹Chauta akuuza anthu a mitundu ina kuti, “Inu nonse zilombo zakuthengo, nonse zilombo zam'nkhalango, bwerani mudzadye.

¹⁰Atsogoleri onse a Israele ndi akhungu, onsewo ndi opanda nzeru konse. Ali ngati agalu opanda mau, osatha kuuwa. Ntchito nkulota, kugona pansi, kukondetsa tulo.

¹¹Ali ngati agalu a njala yaikulu, amene sakhuta konse. Abusa nawonso ndi opanda nzeru. Aliyense amachita monga m'mene afunira, ndipo amangofuna zokomera iye yekha.

¹²Zidakwa zimenezi zimati, ‘Tiyeni timwe vinyo, tiyeni timwe zakumwa zamphamvu mpaka kukhuta. Maŵa lidzakhala ngati leroli, mwina mwake nkudzaposa lero limene.’ ”