Read Buku Loyera - Chichewa Yes. 57 Bible Online

Yes. 57 - Buku Loyera - Chichewa bible

Yes. 57

¹Anthu a Mulungu okhulupirira amafa, ndipo palibe amene amasamalako. Anthu okhulupirika amatengedwa, ndipo palibe amene amamvetsa chifukwa chake. Anthu olungama amachotsedwa, kuti tsoka lisaŵagwere,

²ndipo amafa mwamtendere. Amene ali olungama amapumula bwino pogona pao.

³Senderani kuno, inu anthu ochita zoipa, pakuti muli ngati zidzukulu zam'chigololo, zochokera m'zadama.

⁴Kodi inu mukuseŵera ndi yani? Kodi mukunena yani? Mukunyoza yani? Kodi ochimwa sindinu? Onyenga sindinu?

⁵Mumapembedza mafano pa mitengo ya thundu, patsinde pa mtengo wogudira uliwonse. Mumapereka ana anu ngati nsembe m'zigwa, m'ming'alu yam'mathanthwe.

⁶Mumatenga miyala yosalala kumadamboko, ndi kumaipembedza ngati milungu. Mumapereka chopereka cha chakumwa kwa iyo, ndi kuperekanso chopereka cha chakudya. Kodi zimenezi zingandikondweretse?

⁷Pa phiri lalitali ndi looneka kutali mudakaika bedi kukachita zadama, komwekonso mudakapereka nsembe.

⁸M'nyumba mwanu mwaika mafano ku chitseko ndiponso pa mphuthu. Ine mwandisiya, mwavula zovala zanu, mwakwera pa bedi lanu lalikulu ndi zibwenzi zanu zimene mwazilipira kuti mugone nazo. Kumeneko mwakwaniritsa zilakolako zanu zoipa.

⁹Mudadzola mafuta ndi zonunkhira zochuluka, ndipo mudapita kukapembedza fano lija la Moleki. Mudachita kutuma nthumwi kutali, mudazituma ngakhale kumanda komwe.

¹⁰Mudatopa nawo mtunda wouyenda, koma osanena kuti, “Ndingoleka!” Mudapezera zina mphamvu, mwakuti simudalefuke konse.

¹¹“Kodi ndi milungu yanji imene mudaiwona nkuchita nayo mantha, kotero kuti mudandinamiza nkundiiŵaliratu, osalabada konse za Ine? Kodi mwaleka kundiwopa chifukwa choti ndakhala chete pa nthaŵi yaitali?

¹²Mukuganiza kuti zimene mumachita nzolungama, koma makhalidwe anu ndidzaŵaonetsa poyera, ndipo mafano sadzakuthandizani.

¹³Mukamafuula kufuna chithandizo, mafano anuwo akupulumutseni! Mphepo idzaiyalula milunguyo, mpweya udzaiwulutsa. Koma amene amakhulupirira Ine, adzalandira dziko lokhalamo, ndi kumapembedza pa phiri langa loyera.”

¹⁴Padzamveka mau akuti, “Lambulani, lambulani ndi kukonza mseu. Chotsani chitsa chilichonse pa njira yodzeramo anthu anga.”

¹⁵Iye amene ali Wamkulu ndi Wopambanazonse, amene alipo nthaŵi zonse, ndipo dzina lake ndi Woyera uja, akunena kuti, “Ndimakhala pa malo aulemu, oyera. Koma ndimakhalanso ndi anthu odzichepetsa ndi olapa mu mtima, kuti odzichepetsawo ndiŵachotse mantha, olapawo ndiŵalimbitse mtima.

¹⁶“Ndine amene ndidalenga anthu anga ndi kuŵapatsa mpweya wa moyo, motero sindidzapitirira kukangana nawo kapena kuŵakwiyira mpaka muyaya.

¹⁷“Ndidaŵakwiyira chifukwa anali okonda chuma dziŵi. Tsono ndidaŵalanga, ndi kuŵafulatira mokwiya. Koma iwowo adakhalabe ouma mitu, ndipo adapitirira kuchita ntchito zao zoipa.

¹⁸“Ndidaona m'mene ankachitira, komabe ndidzaŵachiritsa. Ndidzaŵatsogolera ndi kuŵatonthoza. Anthu olira nao adzandiyamika ndi milomo yao.

¹⁹ Anthu onse akutali ndi apafupi, ndidzaŵapatsa mtendere. Ndidzachiritsa anthu anga.

²⁰Koma anthu oipa ali ngati nyanja yoŵinduka, yosatha kukhala bata, ndipo mafunde ake amangoponya matope ndi ndere.

²¹ Palibe mtendere kwa oipa,” akutero Mulungu wanga.