Read Buku Loyera - Chichewa Yes. 63 Bible Online

Yes. 63 - Buku Loyera - Chichewa bible

Yes. 63

¹ “Ndaninso kodi akuchokera ku Edomuyu, atavala zofiira za ku Bozira? Ndani ameneyu wovala zovala zokongola, akuyenda monyadira mphamvu zake? Ndi Ineyo, wolankhula zachilungamo, ndiponso wa mphamvu zoti nkupulumutsa.”

²Nanga bwanji zovala zanu zili psuu, ndiponso zikuwoneka ngati za munthu woponda mphesa?

³ “Ndapondereza ndekha anthu a mitundu ina ngati mphesa, ndipo palibe ndi mmodzi yemwe amene adadzandithandiza. Ndidaŵapondereza ndili wokwiya, magazi ao nkufalikira pa zovala zanga.

⁴Mumtima mwanga ndidatsimikiza kuti lafika tsiku loti ndilange adani anga molipsira, chafika chaka choti ndipulumutse anthu anga.

⁵ Ndidayang'ana, koma panalibe wondithandiza. Ndidadabwa kwabasi kuti panalibe wondichirikiza. Choncho ndidapambana ndi mphamvu za ine ndekha, unkandilimbitsa ndi mkwiyo wanga.

⁶Ndidapondereza anthu a mitundu ina ndili wokwiya, ndipo ndidaŵasakaza. Magazi ao ndidaŵathira pansi.”

⁷Ndidzasimba za chikondi chosasinthika cha Chauta. Ndidzamtamanda chifukwa cha zonse zimene watichitira. Wadalitsa kwambiri anthu a ku Israele, potsata chifundo ndi kukula kwa chikondi chake chosasinthika.

⁸Chauta adati, “Iwo ndi anthu anga, ana anga amene sadzandinyenga.” Motero adaŵapulumutsa.

⁹Adavutika poona mavuto ao onse, Mngelo wochokera kwa Iye adaŵapulumutsa. Adaŵaombola mwa chikondi ndi chifundo chake. Wakhala akuŵasamala ngati ana kuyambira kale.

¹⁰Komabe iwo adampandukira, namkwiyitsa Mulungu. Motero Chauta adasanduka mdani wao, ndipo adamenyana nawo nkhondo.

¹¹Pamenepo anthuwo adakumbuka zamakedzana, masiku a Mose mtumiki wake, ndipo adafunsa kuti, “Ali kuti tsopano Chautayo amene adapulumutsa anthu ake pamodzi ndi mtsogoleri wao pa nyanja? Ali kuti Chautayo amene adaika mwa anthu ake mzimu wake woyera?

¹² Ali kuti Chautayo amene adachita zinthu zodabwitsa ndi mphamvu zake zazikulu kudzera mwa Mose? Adagaŵa madzi am'nyanja, anthu ake akuwona, kuti dzina lake limveke mpaka muyaya.

¹³Adaŵayendetsa pa nyanja pouma, ndipo monga kavalo woyenda m'chipululu, iwo sadakhumudwe.

¹⁴Mzimu wa Chauta udaŵapumitsa, monga m'mene ng'ombe zimapumulira ku dambo.” Motero Inu Chauta mudatsogolera anthu anu, kuti dzina lanu lilemekezeke.

¹⁵Inu Chauta kumwambako, ku malo anu oyera ndi aulemerero, mutiyang'ane ife. Kodi chisamaliro chanu chili kuti? Mphamvu zanu zili kuti? Simukutiwonetsanso chikondi chanu ndi chifundo chanu.

¹⁶Inu ndinu Atate athu ndithu, ngakhale Abrahamu satidziŵa, ngakhale Israele sakutivomera. Koma Inu, Chauta, ndinu Atate athu, ndinu Momboli wathu kuyambira kalekale.

¹⁷Chifukwa chiyani mukutisokeretsa pa njira zanu? Bwanji mukutilola kuti tizikhala ouma mtima kotero kuti sitikukuwopaninso? Bwererani chifukwa cha atumiki anu, mafuko a anthu amene ali choloŵa chanu.

¹⁸Anthu anu opatulika adangoti atakhala nawo malo anu oyera kanthaŵi pang'ono, adani adaŵasakaza malowo.

¹⁹Tasanduka ngati anthu amene simudatilamulepo, ngati kuti sitidakhalepo anthu anu.