Read Buku Loyera - Chichewa Yes. 64 Bible Online

Yes. 64 - Buku Loyera - Chichewa bible

Yes. 64

¹Inu Chauta, bwanji osang'amba mlengalenga kuti mutsike pansi? Bwanji osati mapiri agwedezeke poona Inu,

²monga momwe moto umatenthera tchire, ndiponso monga momwe umagadutsira madzi, kuti adani anu akudziŵeni, ndipo kuti anthu a mitundu ina anjenjemere pamaso panu.

³Nthaŵi ina yake mudatsika pansi pano kudzachita zinthu zoopsa zimene sitidaziyembekeze. Mapiri atakuwonani, adanjenjemera ndi mantha.

⁴Chikhalire palibe ndi mmodzi yemwe amene adaona kapena kumva za Mulungu wina wonga Inu, wochitira zotere anthu omkhulupirira.

⁵Inu mumaŵalandira onse amene amakondwera pochita zolungama, amene amayesetsa kuyenda monga Inu mufunira. Inde mudatikwiyira, komabe ife tidapitiriza kuchimwa. Takhala ochimwadi nthaŵi yaitali, kodi tidzapulumuka kumene?

⁶Tonsefe tasanduka ngati anthu oipitsidwa, ndipo ntchito zathu zonse zabwino zakhala ngati nsanza zauve. Tonsefe tikufota ngati masamba, tikuuluzika ndi machimo athu, ngati tikuuluzika ndi mphepo.

⁷Palibe amene amatamira dzina lanu popemphera, kapena amene amatekeseka nzopempha chithandizo kwa Inu. Mwatifulatira ndipo mwatisandutsa akapolo a machimo athu.

⁸Komabe Inu Chauta, ndinu Atate athu. Ife tili ngati mtapo, Inu muli ngati woumba. Mudatipanga tonse ndi manja anu.

⁹Motero musatikwiyire kopitirira, ndipo musakumbukire machimo athu mpaka muyaya. Tapota nanu mutiganizireko, tonsefetu ndife anthu anu.

¹⁰Mizinda yanu yoyera yasanduka chipululu, Ziyoni wasanduka thengo, Yerusalemu wasanduka wamasiye.

¹¹Nyumba yathu yoyera ndi yokongola, m'mene makolo athu ankakutamandirani, yapsa ndi moto. Malo onse amene tinkaŵakonda asanduka bwinja.

¹²Kodi Inu Chauta, simukuvutika nazo zimenezi? Monga mudzangokhala chete nkumatizunza mwankhanza?