Read Buku Loyera - Chichewa Yes. 65 Bible Online

Yes. 65 - Buku Loyera - Chichewa bible

Yes. 65

¹ Chauta adati, “Ndinali wokonzeka kumva mapemphero a anthu amene sadandipemphere. Ndinali wokonzeka kuti andipeze anthu amene sadandifunefune. Mtunduwo sudapemphere kwa Ine ngakhale nthaŵi zonse ndinali wokonzeka kuŵayankha kuti, ‘Ine ndili pano, ndikuthandizani.’

² Nthaŵi zonse ndakhala wokonzeka kuŵalandira mwaufulu anthu ondipandukiraŵa, amene amachita zoipa namatsata njira zao chifukwa cha kuuma mitu kwao.

³Amandikwiyitsa mopanda manyazi. Amapereka nsembe zachikunja m'minda, ndipo amafukiza lubani pa maguwa anjerwa achikunja.

⁴Amakatandala ku manda, amachezera kumalo obisika usiku. Amadya nyama yankhumba, namamwa msuzi wa nyama zoperekera nsembe zachikunja.

⁵“Amauza ena kuti, ‘Khalani panokha, osatiyandikira, chifukwa ndife opatulika.’ Sindingathe kupirira nawo anthu otere. Ukali wanga pa iwo uli ngati moto wosazima.

⁶Ndatsimikiza kale za chilango chao, ndipo mlandu wao ndaulemba kale. Ndidzaŵalanga chifukwa cha machimo ao.

⁷Ndidzaŵalanganso chifukwa cha machimo a makolo ao. Iwowo afukiza lubani pa mapiri a mafano achikunja, ndipo andinyoza Ine pa zitunda zao. Nchifukwa chake ndidzaŵalanga potsata zimene achita.”

⁸Chauta akuti, “Pamene madzi adakalimo m'mphesa, anthu amati, ‘Musaziwononge, zokoma zidakalimo.’ Inenso ndidzaŵatero anthu anga, sindidzaŵaononga onse.

⁹M'banja la Yakobe ndidzatulutsamo zidzukulu, ndipo a m'banja la Yuda adzalandira dziko langa lamapiri ngati choloŵa chao. Anthu anga osankhidwa adzalilandiradi, atumiki anga adzakhala kumeneko.

¹⁰ Chigwa cha Saroni chidzakhala busa la nkhosa, ndipo Chigwa cha Akori chidzasanduka malo ousirapo msambi wa ng'ombe, kwa anthu anga ondifunafuna Ine.

¹¹Koma inu amene mumakana Chauta, amene mumaiŵala phiri langa lopatulika, amene mumapembedza Gadi ndi Meni, milungu yobweretsa mwai ndi tsoka,

¹²nonsenu ndidzakufetsani ku nkhondo. Nonsenu mudzaphedwadi, chifukwa simudayankhe m'mene ndidakuitanani, ndipo simudamve m'mene ndidalankhula, koma mudachita zoipa pamaso panga. Mudasankha kuchita zoipa m'malo mwa zabwino.”

¹³Nchifukwa chake Chauta akunena kuti, “Atumiki anga adzadya, koma inu mudzakhala ndi njala, atumiki anga adzamwa, koma inu mudzakhala ndi ludzu. Atumiki anga adzakondwa, koma inu mudzakhala ndi manyazi.

¹⁴Iwo adzaimba mokondwa, koma inu mudzalira kwambiri chifukwa chovutika mu mtima. Mudzalira mofuula chifukwa cha kumva kuŵaŵa mu mtima.

¹⁵Anthu anga osankhidwa adzatchula dzina lanu potemberera, ndipo Ine Chauta ndidzakuphani. Koma amene amandimvera ndidzaŵapatsa dzina lina latsopano.

¹⁶Motero wopempha madalitso m'dzikomo, adzachita zimenezo kwa Mulungu wolankhula zoona. Ndipo wochita malumbiro m'dzikomo, adzalumbira m'dzina la Mulungu wolankhula zoona, chifukwa choti mavuto akale aiŵalika ndipo achotsedwa pamaso panga.”

¹⁷ Chauta akunena kuti, “Ndikulenga thambo lam'mwamba latsopano ndi dziko lapansi latsopano. Zakale sadzazikumbukiranso, zidzaiŵalika kotheratu.

¹⁸Koma inu mukhale osangalala ndi okondwa mpaka muyaya, chifukwa cha zimene ndidzalenga. Ndidzalengadi Yerusalemu watsopano wodzaza ndi chimwemwe, ndipo anthu ake adzakhala okondwa.

¹⁹ Mwiniwakene ndidzakhala wokondwa kwambiri chifukwa cha Yerusalemu, ndipo ndidzasangalala chifukwa cha anthu ake. Kumeneko sikudzamvekanso kulira kapena kudandaula.

²⁰Ana sadzafanso ali akhanda, ndipo nkhalamba zonse zidzakwaniritsa zaka zao zonse. Amene adzafe ali a zaka zana limodzi zokha adzaoneka ngati anyamata. Kufa zisanakwane zaka zana limodzi kudzasonyeza kutembereredwa.

²¹Anthu adzamanga nyumba ndi kukhalamo. Adzabzala mipesa, ndipo adzadyerera zipatso zake.

²²Sadzamanga nyumbazo kuti anthu ena azikhalamo, ndipo sadzabzala mipesayo kuti anthu ena azidyerera zipatso zake. Anthu anga adzakhala ndi moyo wautali ngati mitengo. Ndipo anthu anga osankhidwa adzakondwerera ntchito za manja ao nthaŵi yaitali.

²³Sadzagwira ntchito pachabe, kapena kubereka ana kuti aone tsoka, chifukwa adzakhala anthu odalitsidwa ndi Chauta, iwowo ndi zidzukulu zao zomwe.

²⁴Ndidzaŵayankha asanatsirize nkomwe kupemphera, ndidzaŵamva akulankhula kumene.

²⁵ Mimbulu ndi anaankhosa zidzadyera pamodzi. Mkango udzadya udzu monga ng'ombe. Fumbi ndiye lidzakhale chakudya cha njoka. Pa phiri langa loyera la Ziyoni sipadzakhala chinthu chopweteka kapena choononga,” akuterotu Chauta.