Read Buku Loyera - Chichewa Yes. 9 Bible Online

Yes. 9 - Buku Loyera - Chichewa bible

Yes. 9

¹ Koma anthu amene anali ndi nkhaŵa, sadzakhalanso otaya mtima. Masiku amakedzana Mulungu adaanyozetsa dziko la Zebuloni ndi la Nafutali, koma kutsogolo kuno adzalisandutsa laulemu dera lonseli, kuyambira ku nyanja yaikulu kuzambwe mpaka kukafika ku dziko la patsidya pa mtsinje wa Yordani, ndiye kuti dziko la Galilea, dziko la anthu a mitundu ina.

² Anthu amene ankayenda mumdima aona kuŵala kwakukulu. Amene ankakhala m'dziko la mdima wandiweyani, kuŵala kwaŵaonekera.

³Inu Chauta, mwauchulukitsa mtundu wanu, mwaonjezera kukondwa kwa anthu anu. Iwo akukondwa pamaso panu monga m'mene anthu amakondwera nthaŵi ya masika, monganso m'mene anthu amakondwera pogaŵana zofunkha.

⁴Pakuti inu mwathyola goli limene linkaŵalemera, ndodo zimene ankamenyera mapewa ao, ndiponso mikwapulo ya anthu oŵazunza, monga mudaachitira pogonjetsa Amidiyani.

⁵Ndithu, nsapato iliyonse ya munthu wankhondo ndi chovala chilichonse chothonyezekera magazi, zidzatenthedwa pa moto ngati nkhuni.

⁶Chifukwa mwana watibadwira, mwana wamwamuna wapatsidwa kwa ife. Ulamuliro udzakhala m'manja mwake, ndipo adzamtchula dzina lake lakuti “Phungu Wodabwitsa, Mulungu Wamphamvu, Atate Amuyaya, Mfumu ya Mtendere.”

⁷ Ulamuliro ndi mtendere wake zidzanka zikukulirakulira. Iye adzakhala pa mpando wa mfumu Davide, ndipo adzakhazikitsa ndi kuchirikiza ufumu wake, pochita zachilungamo ndi zangwiro kuyambira nthaŵi imeneyo mpaka muyaya. Ndi mtima wake wonse Chauta Wamphamvuzonse watsimikiza kuti adzachitadi zimenezi.

⁸Ambuye atumiza mau otsutsa Yakobe, mauwo agwa pa Aisraele, zidzukulu zake.

⁹Anthu onse, ndiye kuti Aefuremu ndi anthu okhala m'Samariya, adzazimva zotsatira zake za mau ameneŵa. Iwo amalankhula monyada ndi modzikuza kuti,

¹⁰“Ngakhale njerwa zagumuka, ife tidzamanga ndi miyala yosema. Ngakhale mitanda yamkuyu yagwetsedwa, ife tidzaika mitanda yamkungudza m'malo mwake.”

¹¹Koma Chauta waŵautsira adani, Waŵakhwirizira adaniwo kuti amenyane nawo.

¹²Asiriya chakuvuma ndi Afilisti chakuzambwe ayasama kukamwa kuti adye Aisraele. Komabe mkwiyo wa Mulungu sudaŵachoke chifukwa cha zonsezi, ndipo mkono wake uli chisamulirecho kufuna kuŵalanga.

¹³Anthuwo sadabwerere kwa Mulungu amene adaŵakantha uja, sadalape ndi kufunafuna Chauta Wamphamvuzonse.

¹⁴Nchifukwa chake Chauta wadula mutu wa Israele pamodzi ndi mchira womwe, nthambi ya kanjedza ndi bango lomwe pa tsiku limodzi.

¹⁵Mutuwo ukutanthauza akuluakulu ndi olemekezeka, mchirawo ukutanthauza aneneri ophunzitsa zabodza.

¹⁶Pakuti amene amatsogolera anthuŵa amaŵasokeza, ndipo otsogoleredwawo amatayika.

¹⁷Nchifukwa chake Ambuye sadzakondwera nawo achinyamata, ndipo sadzaŵachitira chifundo ana amasiye ndi akazi amasiye. Pakuti aliyense ndi wosasamala za Mulungu ndiponso ndi wochimwa. Pakamwa paliponse pamalankhula zopusa. Komabe mkwiyo wa Mulungu sudaŵachoke chifukwa cha zonsezi, ndipo mkono wake uli chisamulirecho kufuna kuŵalanga.

¹⁸Kuipa kwa anthuwo kumayaka ngati moto, moto wake wotentha mkandankhuku ndi minga. Umayatsanso nkhalango ndipo utsi wake umachita kuti toloo ngati mtambo wochindikira.

¹⁹Nchifukwa chake mkwiyo wa Chauta Wamphamvuzonse watentha dziko, ndipo anthu ali ngati nkhuni zosonkhera moto. Palibe munthu wochitira chifundo mbale wake.

²⁰Ku dzanja lamanja amapeza ndi kudya chakudya, koma osakhuta, ku dzanja lamanzere amapeza ndi kudya chakudya, koma njala ali nayobe. Kwatsala nkumangodyana okhaokha.

²¹Amanase akuthira Aefuremu nkhondo, Aefuremu akuthira Amanase nkhondo. Onsewo pamodzi akumenyana ndi Yuda. Komabe mkwiyo wa Mulungu sudaŵachoke chifukwa cha zonsezi, ndipo mkono wake uli chisamulirecho kufuna kuŵalanga.