Read Buku Loyera - Chichewa Lev. 13 Bible Online

Lev. 13 - Buku Loyera - Chichewa bible

Lev. 13

²“Munthu akakhala ndi chithupsa pathupi pake, kapena m'buko, kapena chikanga, ndipo mwina nkusanduka ngati nthenda ya khate pakhungu pakepo, munthuyo abwere naye kwa wansembe Aroni kapena kwa aliyense mwa ana ake amene ali ansembe.

³Wansembe aonetsetse pakhungu pali nthendapo. Akapeza kuti ubweya wa pamalo pali nthendapo wasanduka woyera, ndipo kuti nthendayo yazama ndithu kupitirira khungu, ndiye kuti limenelo ndi khate. Wansembe atamuwonetsetsa ndithu, amutchule kuti ndi woipitsidwa.

⁴Koma pakhungupo pakamaoneka kuti mpoyera, ndipo nthendayo sidapitirire khungu, ndipo ubweya wapamalopo sudasanduke woyera, wansembeyo amuike padera munthu wodwalayo masiku asanu ndi aŵiri.

⁵Wansembe amuwonetsetse wodwalayo pa tsiku lachisanu ndi chiŵiri. Akaiwona nthendayo kuti sidafalikire pa khungu, pamenepo wansembeyo amtsekere munthu uja masiku asanu ndi aŵiri ena.

⁶Tsono wansembe uja amuwonetsetsenso wodwalayo pa tsiku lachisanu ndi chiŵiri. Pakhungu pakakhala pothimbirira, nthendayo yosafalikira pakhungupo, wansembe amutchule munthuyo kuti ndi wosaipitsidwa. Umenewo ndi m'buko chabe, tsono wodwalayo achape zovala zake, ndipo adzakhala woyeretsedwa.

⁷Koma m'bukowo ukafalikira pa khungu, munthuyo atadziwonetsa kale kwa wansembe kuti amuyeretse, munthuyo akaonekerenso pamaso pa wansembe.

⁸Wansembe amuwonetsetsenso munthuyo. Akaona kuti m'bukowo wafalikiradi pa khungu, atchule wodwalayo kuti ndi woipitsidwa, limenelo ndi khate.

⁹“Munthu akagwidwa ndi nthenda ya khate, abwere naye kwa wansembe.

¹⁰Wansembe amuwonetsetse. Akakhala ndi chithupsa cha maonekedwe oyera pa khungu, chimene chasandutsa ubweya wapamalopo kukhala woyera, ndipo pachithupsapo pakakhala zilonda,

¹¹limenelo ndi khate lachikhalire limene lili pakhungu pakelo, ndipo wansembe amutchule kuti ndi woipitsidwa. Sikufunika kumtsekera chifukwa ndi woipitsidwadi.

¹²Khatelo likafalikira pa khungu, kotero kuti likhala litagwira khungu lonse la munthu wodwalayo kuyambira kumutu mpaka kumapazi, monga m'mene wansembe angaonere,

¹³pamenepo wansembeyo aonetsetse. Khatelo likakhala litagwira thupi lonse, wodwalayo amutchule kuti ndi wosaipitsidwa. Thupi lonse lasanduka loyera ndipo munthuyo ndi wosaipitsidwa.

¹⁴Koma pathupi pake pakaoneka zilonda, ndiye kuti munthuyo ndi woipitsidwa.

¹⁵Tsono wansembe aonetsetse zilondazo, ndipo munthu wodwalayo amtchule kuti ndi woipitsidwa. Zilondazo nzoipitsa poti limenelo ndi khate.

¹⁶Koma zilondazo zikasinthikanso ndi kusanduka zoyera, pamenepo munthu wodwalayo abwere kwa wansembe.

¹⁷Tsono wansembeyo amuwonetsetse. Zilondazo zikakhala kuti zasanduka zoyera, wansembeyo amutchule munthu wodwalayo kuti ndi wosaipitsidwa. Ndi woyera ameneyo.

¹⁸“Pa khungu la munthu wodwalayo pakakhala chithupsa choti chidapola,

¹⁹ndipo pamene panali chithupsacho pakatuluka zotupatupa zoyera kapena banga loyera mofiirira, aziwonetse kwa wansembe.

²⁰Wansembe aonetsetse bwino, ndipo chithupsacho chikazama, ubweya wake nusanduka woyera, wansembeyo amutchule munthu wodwala uja kuti ndi woipitsidwa. Imeneyo ndi nthenda ya khate imene yaphulika pachithupsapo.

²¹Koma wansembe akaonetsetsa, napeza kuti ubweya wake sudasanduke woyera, ndipo chithupsacho sichidazame, koma chikuzimirira, wansembeyo amuike padera wodwalayo masiku asanu ndi aŵiri.

²²Nthendayo ikafalikira pa khungu, wansembe amutchule wodwalayo kuti ndi woipitsidwa, limenelo ndi khate.

²³Koma bangalo likakhala pa malo amodzi, osafalikira, chimenecho nchipsera cha chithupsa. Wansembe amutchule wodwalayo kuti ndi wosaipitsidwa.

²⁴“Munthu akakhala ndi bala lamoto, ndipo chilonda cha balalo chikasanduka banga loyera mofiirira kapena loyera kumene,

²⁵wansembe aliwonetsetse. Ubweya wapabangapo ukasanduka woyera, ndipo balalo likaoneka kuti lazama, limenelo ndi khate lomwe laphulika pa balalo. Wansembe atchule wodwalayo kuti ndi woipitsidwa. Imeneyo ndi nthenda ya khate.

²⁶Koma wansembe akaonetsetsa, napeza kuti ubweya wake sudasanduke woyera, ndipo balalo silidazame, koma likuzimirira, wansembe amuike padera wodwalayo masiku asanu ndi aŵiri.

²⁷Pa tsiku lachisanu ndi chiŵirilo, ngati bangalo lafalikira pa khungu, wansembe amutchule wodwalayo kuti ndi woipitsidwa. Imeneyo ndi nthenda ya khate.

²⁸Koma bangalo likakhala pa malo amodzi losafalikira pa khungu, ndipo likuzimirira, limenelo ndi thuza la balalo. Wansembeyo amtchule wodwalayo kuti ndi wosaipitsidwa, popeza kuti nchipsera cha bala lamoto chabe.

²⁹“Mwamuna kapena mkazi akakhala ndi nthenda kumutu kapena kundevu,

³⁰wansembe aiwonetsetse nthendayo. Ikaoneka kuti ikuzama, ndipo ubweya ukakhala wachikasu ndi wotetemera, wansembeyo amutchule wodwalayo kuti ndi woipitsidwa. Imeneyo ndi mfundu yonyerenyesa, khate lakumutu kapenanso lakundevu.

³¹Wansembe ataiwonetsetsa mfundu yonyerenyesayo, niwoneka kuti sidazame, ndipo palibe ubweya wakuda pamalopo, wansembeyo amuike padera munthu wodwala mfundu yonyerenyesayo masiku asanu ndi aŵiri.

³²Pa tsiku lachisanu ndi chiŵiri, wansembe aiwonenso nthendayo. Mfunduyo ikakhala yakuti sidafalikire, ndipo palibe ubweya wachikasu, ndipo mfunduyo ikaoneka kuti sidazame,

³³wodwalayo amete, koma mfunduyo asaimete. Wansembe amtsekere masiku asanu ndi aŵiri ena munthu wodwala mfundu yonyerenyesayo.

³⁴Pa tsiku lachisanu ndi chiŵiri, wansembe aiwonetsetsenso mfunduyo, ndipo ikakhala yakuti sidafalikire pa khungu, ndiponso ikaoneka kuti sidazame, wansembe atchule wodwalayo kuti ndi wosaipitsidwa. Tsono wadwalayo achape zovala zake, ndipo akhale wosaipitsidwa.

³⁵Koma mfunduyo ikafalikira pa khungu, wodwalayo atayeretsedwa kale,

³⁶pamenepo wansembe amuwonetsetse wodwalayo. Mfunduyo ikakhala itafalikira pa khungu, wansembe asafunefune ubweya wachikasu ai, munthuyo ndi woipitsidwa.

³⁷Koma wansembe akaipenyetsetsa mfunduyo napeza kuti pamera ubweya wakuda, ndiye kuti mfunduyo ndi yopola. Tsono wansembe amtchule wodwalayo kuti ndi wosaipitsidwa.

³⁸“Mwamuna kapena mkazi akakhala ndi maŵanga oyera pa khungu,

³⁹wansembe aonetsetse bwino. Maŵanga apakhunguwo akakhala oyerera, ndiye kuti ndi mibuko chabe yotuluka pakhungupo. Tsono munthuyo ndi wosaipitsidwa.

⁴⁰“Tsitsi la munthu likatha kumutu chapankhongo, ndiye kuti ndi dazi limenelo, koma munthuyo ndi wosaipitsidwa.

⁴¹Munthu akakhala wopanda tsitsi pa mphumi ndiponso m'litsipa, ndiye kuti ali ndi dazi lapamphumi, koma ndi wosaipitsidwa.

⁴²Koma pa dazi lapankhongo kapena lapamphumi pakakhala banga la nthenda loyera mofiirira, limenelo ndi khate limene likutuluka pa nkhongo kapena pa mphumi.

⁴³Tsono wansembe amuwonetsetse wodwalayo, ndipo banga lotupalo likakhala loyera mofiirira pa dazi lapankhongolo kapena lapamphumilo, monga m'mene limaonekera khate pa khungu,

⁴⁴ndiye kuti munthuyo ndi woipitsidwa ndithu. Wansembe ayenera kumtchula kuti ndi woipitsidwa, ali ndi khate lakumutu.

⁴⁵“Munthu wakhate avale nsanza, ndipo tsitsi lake alilekerere, aphimbe mlomo wake wam'mwamba, ndipo azifuula kuti, ‘Ndine woipitsidwa, ndine woipitsidwa.’

⁴⁶Wodwalayo adzakhalabe woipitsidwa nthaŵi zonse pamene ali ndi nthendayo, ndipo akhale payekha kunja kwa mahema.

⁴⁷“Chovala chaubweya kapena chathonje chikakhala ndi nguwi

⁴⁸kapena nsalu yathonje kapena yaubweya, kapenanso chikopa kapena chinthu chilichonse chopangidwa ndi chikopa,

⁴⁹ndipo nguwiyo ikakhala ndi maonekedwe achisipu kapena ofiira pa chovalapo, kapena pa thonje loluka, kapena pa chikopa, kaya pa chinthu chilichonse chopangidwa ndi chikopa, imeneyo ndi nguwi ndithu, ndipo chovalacho achiwonetse kwa wansembe.

⁵⁰Wansembeyo aiwonetsetse nguwiyo. Chovalacho achiike padera masiku asanu ndi aŵiri.

⁵¹Pa tsiku lachisanu ndi chiŵiri aiwonetsetsenso nguwiyo. Ikakhala itafalikira pa chovalacho, kapena pa chikopa cha ntchito ya mtundu uliwonse, imeneyo ndi nguwi yoopsa. Chovalacho ndi choipitsidwa.

⁵²Tsono wansembe achitenthe chovalacho, chifukwa nguwiyo yaipitsa chovala chaubweya kapena chathonjecho, kapena chinthu chilichonse chopangidwa ndi chikopa, poti imeneyo ndi nguwi yoopsa. Chinthucho achitenthe.

⁵³“Wansembe akaonetsetsa napeza kuti nguwiyo sidafalikire pa chovalacho, kapena pa chinthu chilichonse chopangidwa ndi chikopa,

⁵⁴wansembeyo alamule kuti achape chovalacho, ndipo achiike padera masiku asanu ndi aŵiri ena.

⁵⁵Ndipo wansembe achiwonetsetse chovala chimenecho chitachapidwa. Ngati banga la nguwiyo silidasinthe maonekedwe ake, ngakhale kuti siidafalikire, chovalacho nchoipitsidwa ndithu. Muchitenthe, osasamala zakuti banga la nguwiyo lili kumbuyo kapena kumaso.

⁵⁶“Koma wansembe akaonetsetsa napeza kuti nguwiyo njothimbirira atachapa chovalacho, ang'ambe banga la nguwilo pa chovala chathonjecho kapena chachikopacho.

⁵⁷Bangalo likaonekanso pa chovalacho kapena pa chinthu chilichonse chopangidwa ndi chikopa, ndiye kuti nguwiyo ikufalikira. Zonse zanguwizo muzitenthe.

⁵⁸Koma chovala, kapena chinthu chilichonse chopangidwa ndi chikopa, mukachapa, tsono nguwiyo nkuchoka, muchapenso kachiŵiri, ndipo chidzakhala choyeretsedwa.”

⁵⁹Limeneli ndi lamulo la nguwi yokhala pa chovala chaubweya kapena m'chovala chathonje, kapenanso m'chinthu chilichonse chopangidwa ndi chikopa, kuti muzisiyanitsa pakati pa chinthu choipitsidwa ndi chosaipitsidwa.