Read Buku Loyera - Chichewa Lev. 18 Bible Online

Lev. 18 - Buku Loyera - Chichewa bible

Lev. 18

¹Chauta adauza Mose kuti,

²“Uza Aisraele kuti, Ine ndine Chauta, Mulungu wanu.

³Musamachita zimene amachita anthu a ku Ejipito kumene munkakhala kuja, ndiponso musadzachite zimene amachita anthu a ku Kanani kumene ndikukufikitsaniko. Musatsate miyambo yao.

⁴Muzichita zimene ndikukulamulani, ndi kutsata malamulo anga ndi kuŵamvera. Ine ndine Chauta, Mulungu wanu.

⁵ Nchifukwa chake muchite zimene ndikukulamulani ndipo muzimvera malamulo anga, motero mudzakhala ndi moyo. Ine ndine Chauta.

⁶“Munthu wina aliyense mwa inu asagone ndi wachibale wake. Ine ndine Chauta.

⁷Usachititse manyazi bambo wako pakugona ndi mai wako. Ameneyo ndi mai wako, usamchititse manyazi.

⁸ Usachititse manyazi bambo wako pakugona ndi mkazi wake aliyense.

⁹ Usagone ndi mlongo wako, mwana wamkazi wa bambo wako, kapena mwana wamkazi wa mai wako, ngakhale abadwire kwanu kapena kuchilendo.

¹⁰Usagone ndi mdzukulu wako, mwana wa mwana wako wamwamuna, kapena mdzukulu wako, mwana wa mwana wako wamkazi, chifukwa kuteroko nkudzivula.

¹¹Usagone ndi mwana wamkazi wa mkazi wa bambo wako amene bambo wakoyo adabala, poti ameneyo ndi mlongo wako.

¹² Usagone ndi mlongo wa bambo wako, poti ameneyo ndi thupi limodzi ndi bambo wako.

¹³Usagone ndi mbale wa mai wako, poti ameneyo ndi thupi limodzi ndi mai wako.

¹⁴Usagone ndi mkazi wa mbale wa bambo wako, poti ameneyo ndi mai wako.

¹⁵ Usagone ndi mkazi wa mwana wako, poti ameneyo ndi mpongozi wako.

¹⁶ Usagone ndi mkazi wa mbale wako, chifukwa kuteroko nkuvula mbale wako.

¹⁷ Usagone ndi mkazi ndiponso ndi mwana wamkazi wa mkaziyo, ndipo usagone ndi mwana wamkazi wa mwana wake wamwamuna, kapena mwana wamkazi wa mwana wake wamkazi. Amenewo ndi thupi lake la mkaziyo, ndipo kuteroko nkuchita chinthu choipa kwambiri.

¹⁸Ndipo usakwatire mbale wa mkazi wako ndi kumuvula pamene mbale wako ali moyo.

¹⁹ “Usayandikire mkazi kuti umvule pamene ali wosamba.

²⁰ Usagone ndi mkazi wa mnzako ndi kudziipitsa naye.

²¹Usatenge mwana wako aliyense kuti umpereke ngati nsembe yamoto kwa Moleki,[4] kuti ungaipitse dzina la Mulungu wako. Ine ndine Chauta.

²² Usagone ndi mwamuna ngati mkazi. Chimenecho ndi chinthu chonyansa.

²³ Ndipo usagone ndi nyama ndi kudziipitsa nayo, ngakhalenso mkazi aliyense asadzipereke kwa nyama kuti agone nayo, pakuti chimenecho ndi chisokonezo choopsa.

²⁴“Musadziipitse ndi zinthu zimenezi, chifukwa mitundu ina ya anthu amene ndikuipirikitsa inu mukubwera, idadziipitsa ndi zoipa zoterezi.

²⁵Dziko lidaipa kotero kuti ndidalanga tchimo lake, ndipo dzikolo lidasanza anthu ake okhalamo.

²⁶Koma inuyo mutsate malamulo anga ndi kuchita zimene ndikukulamulani. Musachite chilichonse mwa zonyansazi, ngakhale inu mbadwanu kapena mlendo wokhala pakati panu.

²⁷Pajatu anthu am'dzikomo amene adaalipo inu musanafike, ankachita zonyansa zonsezi, kotero kuti dziko lidaipitsidwa.

²⁸Musachite zimenezi kuti dziko lingakusanzeni mukaliipitsa, monga momwe lidasanzira mtundu wa anthu umene udaalipo m'dzikomo, inu musanafike.

²⁹Pakuti aliyense amene adzachita zonyansa zimenezi, adzachotsedwa pakati pa anthu anzake.

³⁰Tsono mverani malamulo anga oletsa kutsata zonyansa zimene anthu ankazichita, inu musanafike. Musadziipitse nazo konse. Ine ndine Chauta, Mulungu wanu.”