Read Buku Loyera - Chichewa Lev. 19 Bible Online

Lev. 19 - Buku Loyera - Chichewa bible

Lev. 19

¹Chauta adauzanso Mose kuti,

² “Uza mpingo wonse wa Aisraele kuti, ‘Mukhale oyera pakuti Ine Chauta, Mulungu wanu, ndine woyera.

³ Aliyense mwa inu aziwopa mai wake ndi bambo wake. Muzisunga masiku anga a Sabata, Ine ndine Chauta, Mulungu wanu.

⁴ Musabwerere ku mafano, kapena kudzipangira nokha milungu ya zitsulo zosungunula. Ine ndine Chauta, Mulungu wanu.’

⁵“Mukamapereka nsembe yachiyanjano kwa Chauta, Mulungu wanu, muchite mwa njira yoti mulandiridwe.

⁶Muidye tsiku lomwe mwaiperekalo, kapena m'maŵa mwake, koma zotsalako mpaka pa tsiku lachitatu muzitenthe.

⁷Mukaidya pa tsiku lachitatu, kuteroko nkuchita chinthu chonyansa, ndipo nsembeyo sidzalandiridwa.

⁸Munthu aliyense amene aidye, adzasenza tchimo lake chifukwa chakuti waipitsa chinthu choyera cha Chauta. Munthu ameneyo achotsedwe pakati pa anthu anzake.

⁹ “Pamene mukolola m'minda mwanu, musakolole munda wanu mpaka m'malire mwenimweni, ndipo musatolenso khunkha lake.

¹⁰Musakolole mphesa zonse m'munda wanu wamphesa, ndipo musatolenso mphesa zakugwa m'munda mwanumo. Zimenezo musiyire anthu osauka ndiponso alendo, Ine ndine Chauta, Mulungu wanu.

¹¹ “Musabe, musachite zinthu zonyenga, ndipo musaname.

¹² Musalumbire m'dzina langa monyenga ndi kumaipitsa dzina la Ine Mulungu wanu pakutero. Ine ndine Chauta.

¹³ “Musachenjeretse mnzanu kapena kumubera zinthu zake. Musasunge malipiro a munthu wantchito usiku wonse mpaka m'maŵa.

¹⁴ Musatemberere gonthi, kapena kumuikira chokhumudwitsa munthu wakhungu. Koma muziwopa Mulungu wanu, Ine ndine Chauta.

¹⁵ “Musamaweruza mopanda chilungamo. Musachite tsankho pakati pa anthu osoŵa ndi anthu otchuka, koma muziweruza mnzanu mwachilungamo.

¹⁶Musamangoyendayenda uku ndi uku kumachita ukazitape pakati pa anthu a mtundu wanu. Musachite kanthu kalikonse kamene kangathe kudzetsa imfa ya munthu wina. Ine ndine Chauta.

¹⁷“Musadane ndi mbale wanu mumtima mwanu, koma mumdzudzule mosabisa kuti mungavomerezane naye pa tchimo lake.

¹⁸Musabwezere choipa, ndipo musakwiyire anthu a mtundu wanu, koma mukonde mnzanu monga momwe mumadzikondera inu nomwe. Ine ndine Chauta.

¹⁹ “Muzitsata malamulo anga. Musalole kuti ng'ombe zanu zikwerane ndi zoŵeta za mtundu wina. Musafese mbeu za mitundu iŵiri m'munda mwanu, ndipo musavale chovala chopangidwa ndi nsalu za mitundu iŵiri.

²⁰“Munthu akagona ndi mkazi amene ali mdzakazi wofunsidwa mbeta ndi munthu wina, koma wosaomboledwa kapenanso asanalandire ufulu wake, aimbidwe mlandu. Onsewo asaphedwe, chifukwa mkaziyo anali asanalandire ufulu wake.

²¹Koma mwamunayo abwere ndi nsembe yopepesera kupalamula kwake pamaso pa Chauta, pakhomo pa chihema chamsonkhano. Nsembe yopepesera kupalamulayo ikhale nkhosa yamphongo.

²²Wansembe achite mwambo wopepesera machimo a munthuyo ndi nkhosa yamphongo ya nsembe yopepesera kupalamulayo pamaso pa Chauta, chifukwa cha tchimo limene munthuyo adachita, ndipo tchimo adachitalo lidzakhululukidwa.

²³“Pamene muloŵa m'dzikomo ndi kubzala mitengo yamitundumitundu ya zipatso, zipatsozo zikhale zoletsedwa. Zikhale zoletsedwa kwa inu zaka zitatu, musadye pa nthaŵi imeneyo.

²⁴Pa chaka chachinai, zipatso zonse zidzakhala zopatulikira Chauta ngati nsembe yomtamandira.

²⁵Koma pa chaka chachisanu mudzatha kudya zipatso zake, kuti choncho mitengoyo idzakubalireni kwambiri. Ine ndine Chauta, Mulungu wanu.

²⁶ “Musadye nyama yamagazi. Musamaombeza kapena kuchita zaufiti.

²⁷ Musamamete mduliro kapena kumeta m'mphepete mwa ndevu zanu.

²⁸Musadzichekecheke pa thupi lanu chifukwa cha munthu wakufa kapena kudzitema mphini za mtundu uliwonse. Ine ndine Chauta.

²⁹ “Musaipitse mwana wanu wamkazi pakumsandutsa mkazi wachiwerewere[5] kuti dziko lingasanduke la anthu adama ndi loipa kwambiri.

³⁰Muzisunga masiku anga a Sabata ndi kulemekeza malo anga oyera, Ine ndine Chauta.

³¹ “Musamapita kwa anthu olankhula ndi mizimu ya anthu akufa, kapena kwa anyanga. Musaŵafunefune kuti angakuipitseni. Ine ndine Chauta, Mulungu wanu.

³²“Muzikhala mwaulemu pamaso pa munthu waimvi. Wokalamba muzimchitira ulemu, ndipo pakutero mudzaopa Mulungu wanu. Ine ndine Chauta.

³³ “Pamene mlendo akhala nanu m'dziko mwanu, musamchite choipa.

³⁴Mlendo amene akhala nanu, akhale ngati mbadwa pakati panu, ndipo mumkonde monga momwe mumadzikondera inu nomwe. Pajatu inunso mudaali alendo m'dziko la Ejipito. Ine ndine Chauta, Mulungu wanu.

³⁵ “Musamaweruza milandu molakwa, ndipo muyeso wanu woyesera utali wa zinthu, kulemera kwa zinthu kapena kuchuluka kwa zinthu, usamakhala wonyenga.

³⁶Miyeso yanu ya sikelo, miyeso yoyesera kulemera kwa zinthu, miyeso yotchedwa efa[6] ndi hini[7] izikhala yolungama. Ine ndine Chauta, Mulungu wanu, amene ndidakutulutsani ku dziko la Ejipito.

³⁷Muzimvera malamulo anga onse, muzichita monga momwe ndidakulamulirani, malamulowo muziŵatsata. Ine ndine Chauta.”