Read Buku Loyera - Chichewa Lev. 21 Bible Online

Lev. 21 - Buku Loyera - Chichewa bible

Lev. 21

¹Chauta adauza Mose kuti, “Ulankhule ndi ansembe, ana a Aroni, ndipo uŵauze kuti: Pasapezeke ndi mmodzi yemwe amene adziipitse pokhudza munthu wakufa pakati pa abale ake.

²Koma angathe kukhudza mai wake, bambo wake, mwana wake wamwamuna, mwana wake wamkazi,

³kapena mlongo wake wosakwatiwa amene amakhala pafupi naye, poti chikhalire alibe mwamuna.

⁴Wansembe asadziipitse pa imfa ya munthu amene wakwatira naye ku banja limodzi.

⁵ Ansembe asamete tsitsi kumutu kwao, kapena kumeta m'mphepete mwa ndevu zao, kapenanso kudzichekacheka pa thupi.

⁶Akhale oyera pamaso pa Ine Mulungu, ndipo asachititse manyazi dzina langa. Amapereka nsembe zotentha pa moto, chakudya cha Mulungu wao, nchifukwa chake azikhala oyera.

⁷Asakwatire mkazi wachiwerewere kapena mkazi amene wadziipitsa, ndiponso asakwatire mkazi amene mwamuna wake wamsudzula, pakuti wansembe ndi woyera pamaso pa Mulungu wake.

⁸Akhale munthu woyera kwa inu, chifukwa amapereka chakudya cha Mulungu wanu. Akhale munthu woyera kwa inu, chifukwa Ine Chauta amene ndimakuyeretsani, ndine woyera.

⁹Ndipo mwana wamkazi wa wansembe aliyense akadziipitsa pokhala wachiwerewere, amaipitsa bambo wake. Mwanayo ayenera kumtentha pa moto.

¹⁰“Munthu amene ali mkulu wa ansembe onse, amene adamdzoza pa mutu ndi mafuta, ndiponso amene adapatulidwa pakumuveka zovala zaunsembe, asalekerere tsitsi lake, kapena kung'amba zovala zake kusonyeza kuti ali pamaliro.

¹¹Asakaloŵe kumene kuli munthu wakufa aliyense ndi kudziipitsa, ngakhale mtembo wa bambo wake kapena wa mai wake.

¹²Asatuluke m'malo oyera kapena kuipitsa malo oyera a Mulungu wake, pakuti mafuta odzozera a Mulungu wake amene adamdzoza nawo ali pa iye. Ine ndine Chauta.

¹³Ndipo akwatire mnamwali wosadziŵa mwamuna,

¹⁴asakwatire mkazi wamasiye kapena mkazi wosudzulidwa, kapenanso mkazi wachiwerewere. Koma akwatire mnamwali wosadziŵa mwamuna pakati pa anthu a mtundu wake, amene sanadziŵeko mwamuna,

¹⁵kuti asaloŵetse mtundu wosayera pakati pa ana ake, pakuti Ine ndine Chauta amene ndinamuyeretsa.”

¹⁶Chauta adauza Mose kuti,

¹⁷“Uza Aroni kuti munthu aliyense mwa zidzukulu zake pa mibadwo yonse, amene ali ndi chilema, asabwere kudzapereka nsembe kwa Mulungu wake.

¹⁸Munthu aliyense wachilema sayenera kusendera pafupi, monga munthu wakhungu kapena wopunduka miyendo, munthu wopunduka nkhope kapena wokhala ndi chiwalo china chachitali dziŵi,

¹⁹munthu wa phazi lopunduka kapena wa dzanja lopunduka,

²⁰munthu wanundu kapena kafupidolo, munthu wa maso opunduka, munthu wa nthenda yonyerenyesa, kapena wamphere, kapenanso wotswanyika mavalo.

²¹Mwa zidzukulu za wansembe Aroni pasadzapezeke munthu ndi mmodzi yemwe wokhala ndi chilema, amene adzapereke nsembe zopsereza kwa Chauta. Popeza kuti ali ndi chilema, sayenera kusendera pafupi ndi guwa kuti akapereke zakudya za Mulungu wake.

²²Koma angathe kudya chakudya choperekedwa kwa Mulungu wake, buledi wopatulika kopambana uja, pamodzi ndi zotsalira zopatulika za nsembe.

²³Koma asadzabwere pafupi ndi nsalu yochinga, kapena kuyandikira guwa, chifukwa ali ndi chilema, kuwopa kuti angadzaipitse malo anga oyera. Pakuti Ine ndine Chauta amene ndidapatula malo amenewo.”

²⁴Zimenezi ndizo zimene Mose adauza Aroni ndi ana ake aamuna ndiponso Aisraele onse.