Read Buku Loyera - Chichewa Lev. 3 Bible Online

Lev. 3 - Buku Loyera - Chichewa bible

Lev. 3

¹“Ngati munthu apereka nsembe yachiyanjano kwa Chauta, nsembe yake ikakhala ya ng'ombe yamphongo kapena yaikazi, ikhale yopanda chilema.

²Munthuyo asanjike dzanja lake pamutu pa ng'ombeyo, ndipo aiphere pa khomo la chihema chamsonkhano. Pomwepo ansembe, ana a Aroni, aliwaze magazi guwa molizungulira.

³Ndipo pa nsembe yachiyanjanoyo, yopereka kwa Chauta ndi yoyenera kuitentha pa moto, atapepo mafuta okuta matumbo.

⁴Apatulenso imso ziŵiri, pamodzi ndi mafuta ake omwe, ndiponso mphumphu ya mafuta akuchiŵindi, ochotsa pamodzi ndi imso zija.

⁵Tsono ana a Aroni atenthe zonsezo pa guwa, pamodzi ndi nsembe yopsereza imene ili pa nkhuni pamotopo. Imeneyo ndiyo nsembe yotentha pa moto, ya fungo lokomera Chauta.

⁶“Ngati munthu apereka nsembe yachiyanjano kwa Chauta, nsembe yake ikakhala nkhosa yamphongo kapena yaikazi, ikhale yopanda chilema.

⁷Akapereka nkhosa kuti ikhale nsembe, abwere nayo pamaso pa Chauta.

⁸Asanjike dzanja lake pamutu pa nkhosayo, ndipo aiphere pa khomo la chihema chamsonkhano. Pambuyo pake ana a Aroni aliwaze magazi guwa molizungulira.

⁹Tsono pa nsembe yachiyanjanoyo yopereka kwa Chauta ndi yoyenera kuitentha pa moto, atapepo mafuta onse a nkhosayo, ndiye kuti mchira wonona wathunthu, ataudula m'tsinde pafupi ndi msana, mafuta okuta matumbo, mafuta ena onse okhala pamatumbopo,

¹⁰impso ziŵiri pamodzi ndi mafuta ake omwe, ndiponso mphumphu ya mafuta akuchiŵindi, ochotsa pamodzi ndi imso zija.

¹¹Tsono wansembe atenthe zonsezo pa guwa, kuti zikhale chakudya chotentha pa moto, chopereka kwa Chauta.

¹²“Ngati munthu akuti apereke mbuzi, abwere nayo pamaso pa Chauta.

¹³Asanjike dzanja lake pamutu pa mbuziyo, ndipo aiphere pakhomo pa chihema chamsonkhano. Pambuyo pake ana a Aroni aliwaze magazi guwa molizungulira.

¹⁴Tsono pa nsembe yopereka kwa Chautayo ndipo yoyenera kuitentha pa moto, atapepo mafuta okuta matumbo ndi mafuta ena onse okhala pamatumbopo.

¹⁵Apatulenso imso ziŵiri pamodzi ndi mafuta ake omwe cham'chiwunomu, ndiponso mphumphu ya mafuta akuchiŵindi, ochotsa pamodzi ndi imso zija.

¹⁶Wansembe atenthe zonsezo pa guwa, kuti zikhale chakudya chotentha pa moto, cha fungo lokoma. Mafuta onse nga Chauta.

¹⁷Limeneli likhale lamulo lamuyaya pa mibadwo yanu yonse, kuti musadzadye mafuta kapena magazi kulikonse kumene mudzakhale.”