Read Buku Loyera - Chichewa Lev. 7 Bible Online

Lev. 7 - Buku Loyera - Chichewa bible

Lev. 7

¹“Nsembe yopepesera kupalamula njoyera kopambana. Lamulo lake ndi ili:

²pamalo pomwe amaphera nsembe yopsereza, azipheraponso nsembe yopepesera kupalamula, ndipo awaze magazi ake pa guwa mozungulira.

³Tsono apereke mafuta ake onse, mchira wamafuta ndi mafuta okuta matumbo.

⁴Aperekenso imso ziŵiri pamodzi ndi mafuta ake omwe cham'chiwunomu, ndiponso mphumphu ya mafuta akuchiŵindi ochotsa ndi imso zija.

⁵Wansembe azitenthere pa guwa zonsezo, kuti zikhale nsembe yotentha pa moto, yopereka kwa Chauta. Imeneyo ndiyo nsembe yopepesera kupalamula.

⁶Munthu wamwamuna aliyense wa m'banja la ansembe angathe kudyako. Aidyere pa malo oyera. Imeneyo ndiyo nsembe yoyera kopambana.

⁷Nsembe yopepesera kupalamula njofanafana ndi nsembe yopepesera machimo, ndipo nsembe ziŵiri zonsezo zili ndi lamulo limodzi lokha. Wansembe wochita mwambo wopepesera machimo ndiye amene nyamayo ikhale yake.

⁸Ndipo wansembe wopereka nsembe yopsereza ya munthu wina aliyense, atenge chikopa cha nsembe yopserezayo kuti chikhale chake.

⁹Tsono chopereka chilichonse cha chakudya chophika mu uvuni, kapena cha zonse zimene amakazinga mu mphika kapena m'chiwaya, zikhale za wansembe amene apereke zimenezo.

¹⁰Ndipo chopereka chilichonse cha chakudya chosakaniza ndi mafuta kapena chouma, chikhale cha ana onse a Aroni. Anawo aigaŵane molingana.

¹¹“Lamulo la nsembe yachiyanjano imene aliyense angathe kupereka kwa Chauta ndi ili:

¹²akaipereka chifukwa cha kuthokoza, pamodzi ndi nsembe yothokozerayo apereke makeke osafufumitsa, osakaniza ndi mafuta, timitanda ta buledi wosafufumitsa, topyapyala, topaka mafuta, ndiponso makeke a ufa wosalala wosakaniza bwino ndi mafuta.

¹³Pamodzi ndi nsembe yachiyanjano yothokozerayo, abwere ndi mitanda ya buledi wotupitsa.

¹⁴Kenaka atengeko mtanda umodzi pa mtundu uliwonse wa buledi, kuti ukhale nsembe yopereka kwa Chauta. Mtanda umenewo ndi wake wa wansembe amene awaze magazi a nsembe zachiyanjano.

¹⁵Nyama ya nsembe yachiyanjano yothokozerayo aidye pa tsiku lopereka nsembe yakeyo. Asaisungeko mpang'ono pomwe kufikira m'maŵa mwake.

¹⁶Koma nsembe yake ikakhala yoti waipereka moilumbirira kapena mwaufulu, aidye pa tsiku lomwe akuiperekalo, ndipo nyama yotsala aidye m'maŵa mwake.

¹⁷Koma nyama yotsalako kufikira tsiku lachitatu, aitenthe pa moto.

¹⁸Ngati munthu adya nyama ya nsembe yachiyanjano pa tsiku lachitatu, amene waiperekayo Mulungu sadzamulandira, ndipo nsembeyo sidzampindulira kanthu. Idzakhala chinthu chonyansa ndipo amene adzadye imeneyo adzakhala wopalamula.

¹⁹“Nyama imene ikhudza chinthu chilichonse chonyansa pa zachipembedzo, munthu asaidye, koma itenthedwe pa moto. Onse amene ali osaipitsidwa pa zachipembedzo angathe kudya nyama ya nsembe.

²⁰Koma munthu woipitsidwa akadya nyama ya nsembe yachiyanjano yopereka kwa Chauta, achotsedwe pakati pa Aisraele anzake.

²¹Ndipo wina aliyense akakhudza chinthu chonyansa pa zachipembedzo, kaya nchonyansa cha munthu kapena cha nyama, kapenanso chonyansa china chilichonse, tsono nadyako nyama ya nsembe yachiyanjano yopereka kwa Chauta, munthuyo achotsedwe pakati pa Aisraele anzake.”

²²Chauta adauza Mose kuti,

²³“Uza Aisraele kuti asadye mafuta ang'ombe, kapena ankhosa kapenanso ambuzi.

²⁴Mafuta a nyama yofa yokha, ndi mafuta a nyama yojiwa ndi zilombo, angathe kuŵagwiritsa ntchito zina zilizonse, koma iwowo asadye.

²⁵Pakuti munthu amene adya mafuta a nyama yoperekedwa kwa Chauta kuti ikhale nsembe yotentha pamoto, ayenera kuchotsedwa pakati pa Aisraele anzake.

²⁶ Ndiponso kulikonse kumene akakhale, asadye magazi aliwonse, ambalame kapena anyama.

²⁷Munthu aliyense wophwanya lamulo limeneli, ayenera kuchotsedwa pakati pa Aisraele anzake.”

²⁸Chauta adauza Mose kuti,

²⁹“Uza Aisraele kuti, ‘Munthu amene apereka nsembe yake yachiyanjano kwa Chauta, abwere ndi gawo la nsembeyo kwa Chauta. Pa nsembe yake yachiyanjanoyo

³⁰atengeko ndi manja ake zigawo zoyenera kuzitentha, zopereka kwa Chauta, ndiye kuti mafuta ndi nganga yomwe. Tsono ngangayo aiweyule kuti ikhale chopereka choweyula kwa ine.

³¹Apo wansembe atenthe mafuta pa guwa, koma ngangayo ikhale ya Aroni ndi ana ake.

³²Wansembe mumpatsenso ntchafu ya ku dzanja lamanja, kuti ikhale chopereka cha pa nsembe yanu yachiyanjano.

³³Pakati pa ana a Aroni, wansembe amene apereka magazi ndi mafuta a nsembe yachiyanjano, ndiye adzalandire ntchafu ya ku dzanja lamanja ngati chigawo chake.

³⁴Choncho nganga yopereka moweyula manjayo, pamodzi ndi ntchafu yoperekayo, ndikuzichotsa zonsezo kwa Aisraele. Ndikuzichotsa pa nsembe zao zachiyanjano, ndipo ndikuzipereka kwa wansembeyo Aroni ndi kwa ana ake, kuti zikhale chigawo chao nthaŵi zonse.

³⁵Chimenecho ndicho chigawo cha Aroni ndi cha ana ake, chotapa pa zopereka kwa Chauta zoyenera kutentha pa moto, chimene chidapatulidwa kuti chikhale chigawo chao, pa tsiku limene iwo adaperekedwa kuti akhale ansembe otumikira Chauta.

³⁶Chauta ndiye amene adalamula Aisraele kuti azipereka zimenezi kwa ansembe, pa tsiku limene adadzozedwa. Zimenezo ndizo chigawo chao nthaŵi zonse pa mibadwo yao yonse.’ ”

³⁷Ameneŵa ndiwo malamulo a nsembe zonsezi: yopsereza, ya chakudya, yopepesera machimo, yopepesera kupalamula, yakudzoza, ndiponso yachiyanjano.

³⁸Malamulo ameneŵa ndi amene Chauta adapereka kwa Mose pa phiri lija la Sinai, pa tsiku limene adalamula Aisraele kuti abwere ndi nsembe zao kwa Chauta, ku chipululu cha Sinai chija.