Read Buku Loyera - Chichewa Lev. 9 Bible Online

Lev. 9 - Buku Loyera - Chichewa bible

Lev. 9

¹Pa tsiku lachisanu ndi chitatu, Mose adaitana Aroni, ana ake ndi atsogoleri a Aisraele.

²Adauza Aroniyo kuti, “Utenge mwanawang'ombe wamphongo kuti akhale nsembe yopepesera machimo, ndi nkhosa yamphongo kuti ikhale nsembe yopsereza. Zonsezo zikhale zopanda chilema, ndipo uzipereke pamaso pa Chauta.

³Tsono uuze Aisraele kuti, ‘Tengani tonde kuti muperekere nsembe yopepesera machimo. Mutengenso mwanawang'ombe ndi mwanawankhosa. Aŵiri onsewo akhale a chaka chimodzi, opanda chilema, kuti akhale nsembe yopsereza.

⁴Mutengenso ng'ombe ndi nkhosa kuti zikhale nsembe zachiyanjano zoti aziphere pamaso pa Chauta. Mubwerenso ndi zopereka za zakudya zosakaniza ndi mafuta, pakuti lero Chauta akuwonekerani.’ ”

⁵Zonse zimene Mose adalamula anthuwo, iwo adabwera nazo pakhomo pa chihema chamsonkhano. Ndipo mpingo wonse udasendera pafupi, nupembedza Chauta.

⁶Apo Mose adati, “Nazi zimene Chauta akukulamulani kuti muchite, kuti ulemerero wake ukuwonekereni.”

⁷ Pamenepo Moseyo adauza Aroni kuti, “Sendera pafupi ndi guwa, ndipo upereke nsembe yopepesera machimo ndi nsembe yopsereza, kuti uchite mwambo wopepesera machimo ako ndi machimo a Aisraele. Ubwere ndi zopereka za anthuwo ndipo uchite mwambo wopepesera machimo ao, monga momwe Chauta walamulira.”

⁸Choncho Aroni adasendera pafupi ndi guwa, napha mwanawang'ombe woperekera nsembe yopepesera machimo, nsembeyo ya iye mwini wake.

⁹Ndipo ana ake adapereka magazi kwa Aroni. Iyeyo adaviika chala chake m'magazimo, naŵapaka pa nyanga za guwa, nathira magaziwo patsinde pa guwa lomwelo.

¹⁰Koma mafuta ndi imso, pamodzi ndi mphumphu ya mafuta akuchiŵindi, za nsembe yopepesera machimoyo, adazitenthera pa guwa, monga momwe Chauta adaalamulira Mose.

¹¹Nyama yake ndi chikopa chake, adazitenthera kunja kwake kwa mahema.

¹²Tsono adapha nyama ya nsembe yopsereza, ndipo ana ake a Aroniyo atampatsira magazi, iye adawaza magaziwo pa guwa molizungulira.

¹³Pambuyo pake adampatsira nyama ya nsembe yopsereza yoduladula, pamodzi ndi mutu wake womwe, ndipo iye adazitentha pa guwa.

¹⁴Kenaka atatsuka matumbo ndi miyendo, adazitentha paguwa pomwepo, pamodzi ndi nsembe yopsereza ija.

¹⁵Tsono adapereka zopereka za anthuwo, natenga mbuzi ya nsembe yopepesera machimo a anthuwo, naipha nkuipereka ngati nsembe yopepesera machimo, monga adachitira ndi nsembe yopepesera machimo yoyambayo.

¹⁶Apo adabwera ndi nsembe yopsereza, naipereka potsata mwambo wake.

¹⁷Adaperekanso chopereka cha chakudya, natapako ufawo dzanja limodzi nautentha pa guwa, kuwonjezera pa nsembe yopsereza yam'maŵayo.

¹⁸ Tsono adaphanso ng'ombe ndi nkhosa yamphongo, kuperekera anthu nsembe yachiyanjano. Pambuyo pake ana a Aroni adampatsira magazi, ndipo iye adathira magaziwo pa guwa molizungulira.

¹⁹Adampatsiranso mafuta ang'ombe ndi mafuta a nkhosa yamphongo, mchira wamafuta, mafuta okuta matumbo, imso pamodzi ndi mphumphu ya mafuta akuchiŵindi.

²⁰Anawo adaika mafuta pa nganga, ndipo Aroni adatentha mafutawo pa guwa.

²¹Koma Aroni adaweyula ngangazo ndi ntchafu ya ku dzanja lamanja, kuti zikhale chopereka choweyula pamaso pa Chauta, monga momwe Mose adaalamulira.

²² Tsono Aroni adakweza manja ake pa Aisraele naŵadalitsa. Ndipo adatsika paguwa, pomwe adaperekera nsembe yopepesera machimo, nsembe yopsereza ndi nsembe yachiyanjano.

²³Pamenepo Mose pamodzi ndi Aroni adakaloŵa m'chihema chamsonkhano. Atatulukamo, adadalitsa anthu aja, ndipo ulemerero wa Chauta udaonekera anthu onsewo.

²⁴Pompo moto udatuluka pamaso pa Chauta nupserezeratu nsembe yopsereza ndi mafuta omwe, zimene zinali paguwapo. Ndipo anthu ataona motowo, adafuula naŵeramitsa nkhope zao pansi.