Read Buku Loyera - Chichewa Yer. 13 Bible Online

Yer. 13 - Buku Loyera - Chichewa bible

Yer. 13

¹Chauta adandiwuza kuti, “Pita ukagule mpango wa nsalu yabafuta, ukavale m'chiwuno, koma osakauviika m'madzi.”

²Choncho ndidakagula mpango, monga momwe Chauta adaandiwuzira, ndipo ndidauvala m'chiwuno.

³Chauta adandiwuzanso mau kachiŵiri kuti,

⁴“Tenga mpango uja udagula nkuvala m'chiwuno mwakowu. Unyamuke nkupita msanga ku mtsinje wa Yufurate. Kumeneko ukabise mpangowo m'ming'alu yam'mathanthwe.”

⁵Tsono ndidapitadi kukaubisa mpangowo ku Yufurate, monga momwe Chauta adaandiwuzira.

⁶Patapita masiku ambiri Chauta adandiwuza kuti, “Nyamuka, pita ku Yufurate, ukatenge mpango wam'chiwuno uja umene ndidaakuuza kuti ukaubise kumeneko.”

⁷Ine ndidapita ku Yufurate, ndipo ndidakumba pa malo amene ndidaubisa paja, nkuutenga. Koma ndidaona kuti ndi woonongeka kotheratu, wopandanso ntchito.

⁸Apo mau a adandifikanso:

⁹Chauta adandiwuza kuti, “Ndimotu m'mene ndidzaonongere zimene a ku Yuda ndi a ku Yerusalemu amanyadira.

¹⁰Anthu oipaŵa akana kumvera mau anga. Atsata milungu ina, namaitumikira nkumaipembedza. Iwowo adzakhala ngati mpango wopanda ntchitowu.

¹¹Monga mpango umakanirira m'chiwuno mwa munthu, chonchonso ndidakonza kuti banja lonse la Israele ndi la Yuda lindikangamire kuti onse akhale anthu anga, kuti adzatamande dzina langa ndi kundilemekeza. Koma iwowo sadamvere.

¹²“Ukaŵauze anthu mau amene Ine Chauta Mulungu wa Israele ndikunena, akuti: Mtsuko uliwonse wa vinyo adzaudzaza ndi vinyo. Iwowo adzakuyankha kuti, ‘Tikudziŵa bwino kuti mtsuko uliwonse wa vinyo adzaudzaza ndi vinyo.’

¹³Tsono ukaŵauze kuti, Chauta akuti, Ndidzaŵamwetsa vinyo anthu onse am'dzikomo mpaka kuledzera. Anthuwo ndi aŵa: mafumu okhala pa mpando wa Davide, ansembe, aneneri, ndi onse okhala mu Yerusalemu.

¹⁴Ndidzaŵagundanitsa mitu kuti aphwanyane okhaokha, atate ndi ana ao!” Akuterotu Chauta. “Sindidzaŵachitira chifundo kapena kuŵamvera chisoni, kapena kukhululuka mtima mpaka nditaŵaononga.”

¹⁵Inu Aisraele, imvani ndipo tcherani khutu. Musakhale odzimva chifukwa ndi Chauta amene akulankhula.

¹⁶Mlemekezeni Chauta, Mulungu wanu, asanagwetse mdima, mapazi anu asanakhumudwe m'chisisira cham'mapiri, asanasandutse kuŵala, kumene mukukufuna, kuti kukhale mdima wandiweyani.

¹⁷Koma mukapanda kumvera, mtima wanga udzalira m'seri chifukwa cha kunyada kwanu. M'maso mwanga mudzadzaza misozi yoŵaŵa chifukwa choti nkhosa za Chauta zatengedwa ukapolo.

¹⁸Uza mfumu pamodzi ndi mai wake kuti, “Tsikani pa mipando yaufumu, poti zisoti zanu zokongola zaufumu zagwa pansi.

¹⁹Mizinda yanu ya ku Negebu aitsekera kunja, palibe wina woti nkuitsekula. Yuda yense watengedwa ukapolo, watengedwa yense ukapolo.

²⁰“Ŵeramukani, inu a ku Yerusalemu, muwone adani amene akuchokera kumpoto. Kodi nkhosa zimene adakusungitsani zili kuti, nkhosa zanu zokongola zija?

²¹Kodi mudzatani akadzakuikirani kuti azikulamulirani anthu amene munkaŵayesa abwenzi anu? Kodi simudzamva zoŵaŵa zonga za mkazi pa nthaŵi yochira?

²²Mukamadzifunsa kuti, ‘Kodi zimenezi zatigwera bwanji?’ Nchifukwa cha machimo anu ambiri kuti zovala zanu zikwinzidwe, ndipo kuti akuchiteni zankhanza.

²³Kodi munthu wakuda nkusintha khungu lake? Kodi kambuku nkusintha maŵanga ake? Ndiye kuti inuyo, ozoloŵera kuchimwanu, mungathe kumachita zabwino ngati?

²⁴Chifukwa cha kuipa kwanuko, ndidzakumwazani ngati mankhusu, onka nauluka ndi mphepo yakuchipululu.

²⁵Zokuyenerani nzimenezi, chilango chimene ndakukonzerani chifukwa choti mwandiiŵala, mwakhala mukudalira milungu yonama,” akuterotu Chauta.

²⁶“Ine Chauta ndidzakwinza zovala zanu mpaka kumaso, ndipo maliseche anu adzaoneka.

²⁷Ndaona zonyansa zanu, zigololo zanu, kutchetcherera kwanu, ndi ziwerewere zanu zochitika pa mapiri, kuthengo. Tsoka kwa inu a ku Yerusalemu! Mudzakhala osayeretsedwabe pa zachipembedzo mpaka liti?”