Read Buku Loyera - Chichewa Yer. 22 Bible Online

Yer. 22 - Buku Loyera - Chichewa bible

Yer. 22

¹Chauta adandiwuza kuti, “Pita ku nyumba ya mfumu ya ku Yuda, ukaiwuze kuti,

²‘Iwe mfumu ya ku Yuda, imva mau a Chauta. Imva iwe amene umakhala pa mpando waufumu wa Davide, iweyo pamodzi ndi atumiki ako ndiponso anthu ako amene amaloŵera pa zipata izi.

³Chautatu akuti uziweruza molungama ndi mosakondera. Munthu amene adambera zake uzimpulumutsa kwa womsautsa. Usavutitse mlendo, mwana wamasiye kapena mkazi wamasiye. Usakhetse magazi a anthu osachimwa pa malo ano.

⁴Ndithu, ukamadzamvera mau aŵa, ndiye kuti mafumu okhala pa mpando waufumu wa Davide adzapitirirabe kumalamulira. Azidzaloŵera pa zipata izi za ku nyumba ya mfumu, atakwera pa magaleta ndi pa akavalo, iwowo pamodzi ndi atumiki ao ndi anthu ao.

⁵Koma ngati sudzamvera mau anga, ndikulumbira pali Ine ndemwe, kuti nyumba imeneyi idzasanduka bwinja!’ ” Akuterotu Chauta.

⁶Naŵa mau a Chauta onena za nyumba ya mfumu ya ku Yuda: “Ngakhale iwe ndimakukonda ngati Giliyadi, kapena ngati nsonga ya phiri la Lebanoni, komabe ndidzakusandutsa chipululu, mzinda wopanda anthu.

⁷Ndidzatuma anthu oti adzakuwononge, aliyense ali ndi zida zake. Adzadula mikungudza yako yokoma, nadzaiponya pa moto.

⁸“Pamene anthu a mitundu ina adzadutse pa mzinda umenewu, azidzafunsana kuti, ‘Kodi chifukwa chiyani Chauta adaononga chotere mzinda waukuluwu?’

⁹Yankho lake lidzakhala lakuti, ‘Nchifukwa chakuti anthu akewo adasiya chipangano chimene adapangana ndi Chauta, Mulungu wao. Adayamba kupembedza milungu ina ndi kumaitumikira.’ ”

¹⁰Musailire mfumu, musaŵaimbire nyimbo malemuwo. Koma mulire amene wachotsedwa m'dziko lake chifukwa sadzabwereranso, sadzaliwonanso dziko lake.

¹¹ Paja Salumu, mwana wa Yosiya, mfumu ya ku Yuda, adaloŵa m'malo mwa atate ake pa mpando waufumu umene adausiya. Tsono ponena za amene uja Chauta akuti, “Iyeyo sadzabwereranso.

¹²Adzafera ku dziko laukapolo, ndipo sadzaliwonanso dziko lino.”

¹³“Tsoka kwa munthu womanga nyumba yake mopanda chilungamo, womanga zipinda zake monyenga, pogwiritsa ntchito anthu, koma osaŵapatsa malipiro a ntchito yao.

¹⁴Munthuyo amanena kuti, ‘Ndidzadzimangira nyumba yaikulu, ya zipinda zam'mwamba zikuluzikulu, ndidzaikamo mawindo, ndi kukhomamo matabwa a mkungudza, ndipo ndidzaipaka utoto wofiira.’

¹⁵Kodi uganiza kuti ndiwe mfumu poti nyumba zako ndi zamkungudza? Ganiza za bambo wako: suja anali nazo zosoŵeka zonse? Suja ankaweruza molungama ndi mosakondera? Ndipo paja zonse zidamuyendera bwino.

¹⁶Ankateteza anthu otsika ndi osauka, ndipo zonse zinkamuyendera bwino. Kodi zimenezi sizidaonetse kuti ankandidziŵa?” Akuterotu Chauta.

¹⁷“Koma iwe maganizo ako ndi mtima wako sizili penanso, zili pa phindu lonyenga, pa zopha anthu osalakwa, ndi pa zankhanza ndi zozunza ena.”

¹⁸ Nchifukwa chake Chauta ponena za Yehoyakimu mwana wa Yosiya, mfumu ya ku Yuda, akuti, “Sipadzakhala womulira munthu ameneyo kuti, ‘Kalanga ine, mbale wanga!’ Kapena kuti, ‘Kalanga ine, mlongo wanga!’ Sipadzakhala womulira kuti, ‘Kalanga ine, mbuye wanga!’ Kapena kuti, ‘Kalanga ine, mfumu yanga.’

¹⁹Adzamuika ngati bulu basi, kuchita kumguguza nkukamtaya kuseri kwa zipata za Yerusalemu.”

²⁰“Tsono inu anthu a ku Yerusalemu, kwerani ku mapiri ku Lebanoni, mukalire mofuula kumeneko, mau anu amveke mpaka ku Basani. Mulire mofuula muli ku Abarimu, chifukwa onse amene munkaŵadalira aonongeka.

²¹Ndidaakuchenjezani pamene zinthu zinkakuyenderani bwino. Koma inu mudati, ‘Sitidzamvera.’ Ndi m'mene mwakhala mukuchitira kuyambira muli ana aang'ono, simudamvere mau anga.

²²Mphepo idzakuchotserani abusa anu onse, ndipo amene munkaŵadalira adzatengedwa ukapolo. Tsono mudzanyozedwa, mudzachita manyazi, chifukwa cha zolakwa zanu zochuluka.

²³Inu amene mumakhala ku nyumba ya ku Lebanoni ija, amene mudamanga nyumba zanu pakati pa mikungudza, mudzalira kwambiri pamene zoŵaŵa zidzakugwerani, zonga za mkazi pa nthaŵi yake yochira.”

²⁴ Chauta akuti, “Pali Ine ndemwe, iwe Yehoyakini,[3] mwana wa Yehoyakimu mfumu ya ku Yuda, ngakhale ukadakhala ngati mphete ya ku dzanja langa lamanja, ndikadakuvula nkukutaya.

²⁵Ndidzakupereka kwa anthu ofuna kukupha, amene umaŵaopa, ndiye kuti kwa Nebukadinezara mfumu ya ku Babiloni ndi anthu ake.

²⁶Ndidzakupititsa ku dziko lina pamodzi ndi mai wako amene adakubala. Simudabadwire kumeneko, komabe nonsenu mudzafera kumeneko.

²⁷Simudzabwereranso kudziko kumene mudzafuna kubwerera.”

²⁸Ine ndidati, “Kodi ndiye kuti Yehoyakiniyu wakhala ngati mbiya yonyozeka, yosweka, chinthu chimene anthu sakuchisamala? Nanga chifukwa chiyani iyeyu ndi ana ake akuŵachotsa ndi kuŵaponya ku dziko losadziŵika konse?”

²⁹Iwe dziko, iwe dziko, iwe dziko, imva mau a Chauta.

³⁰Chauta akuti, “Munthu ameneyu mumtenge ngati wopanda ana, munthu amene sadzakhoza pa moyo wake. Ndithu, palibe ndi mmodzi yemwe mwa zidzukulu zake amene adzakhale pa mpando waufumu wa Davide ndi kudzalamuliranso Yuda.”