Read Buku Loyera - Chichewa Yer. 25 Bible Online

Yer. 25 - Buku Loyera - Chichewa bible

Yer. 25

¹ Naŵa mau amene adadza kwa Yeremiya, onena za anthu onse a ku Yuda. Mauŵa adafika chaka chachinai cha ufumu wa Yehoyakimu mwana wa Yosiya, mfumu ya ku Yuda, ndiye kuti chaka choyamba cha ufumu wa Nebukadinezara, mfumu ya ku Babiloni.

²Mneneri Yeremiya adauza anthu onse a ku Yuda ndi onse okhala ku Yerusalemu kuti,

³“Pa zaka 23, kuyambira chaka cha 13 cha ufumu wa Yosiya mwana wa Amoni mfumu ya ku Yuda, mpaka lero lino, ndakhala ndikulandira mau a Chauta ndi kumavutika nkukuuzani, koma inu simudamvere.

⁴Inu simudamvere kapena kutchera khutu, ngakhale kuti Chauta sadaleke kukutumirani aneneri, atumiki ake.

⁵Aneneriwo ankati, ‘Aliyense mwa inu akaleka makhalidwe ake oipa ndi ntchito zake zoipa, ndiye kuti mudzakhala m'dziko limene Chauta adakupatsani inu ndi makolo anu mpaka muyaya.

⁶Musamatsate milungu ina, kumaitumikira ndi kumaipembedza. Musamapute mkwiyo wanga ndi mafano opanga ndi manja anu. Tsono Ine sindidzakuwonongani.’

⁷Komabe simudandimvere. Mudaputa mkwiyo wanga ndi mafano amene mudapanga ndi manja anu, motero mudadziwononga nokha,” akuterotu Chauta.

⁸Motero Chauta Wamphamvuzonse akunena kuti, “Chifukwa choti simudamvere mau anga,

⁹ndidzaitana mafuko onse akumpoto, pamodzi ndi mtumiki wanga Nebukadinezara, mfumu ya ku Babiloni. Ndidzaŵatuma kuti adzathire nkhondo dzikoli ndi anthu ake, ndiponso anthu a mitundu ina yozungulira dzikoli. Ndidzaŵaononga kwathunthu ndi kuŵasandutsa chinthu chonyansa, chonyozeka ndiponso chochititsa manyazi mpaka muyaya.

¹⁰ Ndidzathetsa chimwemwe chonse ndi kusangalala konse pakati pao. Ndidzaletseratu mau achikondwerero a mkwati wamwamuna ndi mkwati wamkazi. Sikudzamvekanso phokoso la mphero, ndipo ndidzazima nyale zonse.

¹¹ Dziko lonseli lidzakhala chipululu ndi bwinja. Pa zaka makumi asanu ndi aŵiri mitundu imeneyi idzatumikira mfumu ya ku Babiloni.

¹²Zaka makumi asanu ndi aŵirizo zitatha, ndidzailanga mfumu ya ku Babiloniyo pamodzi ndi anthu ake chifukwa cha zoipa zao, ndipo dziko lao ndidzalisandutsa bwinja mpaka muyaya.

¹³Ndidzachita zonse zimene ndidanena zokhudza dziko limenelo, zonse zimene zidalembedwa m'bukumu, ndiponso zonse zimene mneneri Yeremiya adalosa zotsutsa anthu ameneŵa.

¹⁴Iwo adzakhala akapolo a anthu a mitundu yochuluka ndi a mafumu otchuka. Motero ndidzaŵabwezera potsata zochita zao ndi ntchito za manja ao.”

¹⁵Chauta, Mulungu wa Israele, adandiwuza kuti, “Tenga chikho ichi chodzaza ndi mkwiyo wanga, ndipo ukamwetse anthu a mitundu yonse kumene nditi ndikutume.

¹⁶Atamwa, adzayamba kudzandira ndipo adzachita misala chifukwa cha nkhondo imene ndikutumiza pakati pao.”

¹⁷Tsono ndidalandira chikhocho kumanja kwa Chauta ndipo ndidapatsa anthu a mitundu yonse, kuti amwe monga momwe Chauta adaandilamulira.

¹⁸Adandituma ku Yerusalemu, ku mizinda ya ku Yuda, kwa mafumu ake ndi kwa akalonga ake, kuti ndiŵasandutse ngati bwinja, ndi chinthu chonyozeka ndi chomachiseka monga m'mene aliri tsopanomu.

¹⁹Adanditumanso kwa Farao, mfumu ya ku Ejipito, kwa nduna zake, kwa akalonga ake, kwa anthu ake onse,

²⁰ndi kwa anthu a mitundu ina yachilendo yokhala pakati pao. Adanditumanso kwa mafumu onse a ku dziko la Uzi, kwa mafumu onse a Afilisti, ndiye kuti ku Asikeloni, ku Gaza, ku Ekeroni ndi ku chigawo chotsala cha ku Asidodi.

²¹Adanditumanso ku Edomu, ku Mowabu ndiponso kwa Aamoni.

²²Adandituma kwa mafumu onse a ku Tiro ndi Sidoni, ndiponso kwa mafumu a maiko a m'mbali mwa nyanja, ndiye kuti

²³ku Dedani, ku Tema, ku Buzi ndi kwa onse ometa cham'mbali.

²⁴Adanditumanso kwa mafumu onse a ku Arabiya ndi kwa ena aja okhala m'chipululu.

²⁵Adandituma kwa mafumu onse a ku Zimiri, kwa mafumu onse a ku Elamu, kwa mafumu onse a ku Mediya,

²⁶kwa mafumu onse akumpoto, akufupi ndi akutali omwe, ndi kwa maufumu onse a dziko lonse lapansi. Potsiriza, atamwa onsewo, idzamwe ndi mfumu ya ku Babiloni.

²⁷“Kenaka udzaŵauze kuti, Chauta Wamphamvuzonse, Mulungu wa Israele, akunena kuti, ‘Imwani, muledzere, musanze, mugwe osadzukanso, chifukwa cha nkhondo imene ndikutumiza pakati panu.’ ”

²⁸“Akakana kulandira chikho kumanja kwako kuti amwe, uŵauze kuti, Chauta Wamphamvuzonse akunena kuti, Muyenera kumwa!

²⁹Tsopanotu ndiyamba ndalanga mzinda umene umadziŵika ndi dzina langa. Kodi mukuganiza kuti inuyo simudzalangidwa? Iyai, simungathe kupulumuka. Ndithu, nditumiza nkhondo kwa anthu onse okhala pa dziko lapansi,” akutero Chauta Wamphamvuzonse.

³⁰“Tsono iwe, ulengeze mau oŵatsutsa, uŵauze kuti, ‘Chauta adzakhuluma kumwamba, mau ake adzamveka ngati bingu kuchokera ku malo ake opatulika. Zoonadi, adzakhuluma, kukalipira anthu ake, adzafuula kwambiri ngati anthu oponda mphesa, polimbana ndi anthu onse a pa dziko lapansi.

³¹Phokoso lalikululo lidzamveka pa dziko lonse lapansi, chifukwa Chauta akuŵazenga mlandu anthu a mitundu yonse. Akuti aweruza anthu onse, ndipo oipa adzaphedwa ndi lupanga, akuterotu Chauta.’ ”

³²Chauta Wamphamvuzonse akunena kuti, “Onani, tsoka likuti likachoka pa mtundu wina likukagwa pa mtundu winanso. Ndipo ku malekezero a dziko lapansi kukuyambika mphepo yamkuntho.”

³³Pa tsiku limenelo, onse ophedwa ndi Chauta adzangoti vuu pa dziko lonse lapansi. Palibe amene adzaŵalire, kapena kukaŵaika m'manda. Adzangosiyidwa ngati ndoŵe ponseponse.

³⁴Inu abusa lirani kwambiri, fuulani kwamphamvu. Inu atsogoleri a anthu anga, dzolani phulusa. Nthaŵi yanu yokaphedwa yafika, ndipo mudzachita kuphedwa ngati nkhosa zamphongo.

³⁵Abusawo adzasoŵa kothaŵira, eniake a nkhosa adzasoŵa njira yopulumukira.

³⁶Mverani, abusa akulira, eniake a nkhosa akulira kwambiri, pakuti Chauta akuwononga busa lao.

³⁷Makola ao a nkhosa, amene adaali pa mtendere, akusanduka mabwinja chifukwa cha ukali woopsa wa Chauta.

³⁸Chauta waŵasiya anthu ake ngati mkango wosiya phanga lake, ndipo dziko lao lasanduka chipululu, chifukwa cha mazunzo a nkhondo ndi mkwiyo woopsa wa Chauta.