Read Buku Loyera - Chichewa Yer. 28 Bible Online

Yer. 28 - Buku Loyera - Chichewa bible

Yer. 28

¹ Chaka chomwecho mwezi wachisanu wa chaka chachinai, Zedekiya ataloŵa ufumu wa ku Yuda, Hananiya mwana wa Azuri mneneri wa ku Gibiyoni, adalankhula nane ku Nyumba ya Chauta. Ansembe ndi anthu onse alikumva, iye adati,

²Chauta Wamphamvuzonse, Mulungu wa Israele, akunena kuti, “Ndathyola goli laukapolo la mfumu ya ku Babiloni.

³Zisanathe zaka ziŵiri, ndidzabwezera ziŵiya zonse za ku Nyumba yanga ku malo ano, zimene Nebukadinezara, mfumu ya ku Babiloni, adazichotsa kuno kupita nazo ku Babiloni.

⁴Ndidzambwezanso ku malo ano Yehoyakini, mwana wa Yehoyakimu mfumu ya ku Yuda. Ndidzabweza akapolo onse ochokera ku Yuda amene adatengedwa kupita ku Babiloni. Motero ndidzathyola goli laukapolo la mfumu ya ku Babiloni.”

⁵Apo mneneri Yeremiya adayankha mneneri Hananiya pamaso pa ansembe ndi anthu onse amene anali m'Nyumba ya Chauta. Adati,

⁶“Inde momwemo! Chauta achitedi choncho. Chauta achitedi zimene walosazi, pakubwezera ziŵiya za ku Nyumba yake ndi akapolo onse ku malo ano kuchokera ku Babiloni.

⁷Komabe ungomva zimene nditi ndikuuze iweyo ndi anthu onse.

⁸Aneneri amene adatsogola kale ankalosa za nkhondo, za njala ndi za mliri, zodzagwera maiko ambiri ndi maufumu otchuka.

⁹Koma ngati mneneri alosa za mtendere, zimene walosazo zikachitikadi, pamenepo zidzadziŵika kuti Chauta adamtumadi.”

¹⁰Pamenepo mneneri Hananiya adachotsa goli m'khosi mwa mneneri Yeremiya nalithyola.

¹¹Adauza anthu onse kuti, “Chauta akuti, ‘Umu ndimo m'mene ndidzathyolera goli laukapolo la Nebukadinezara mfumu ya ku Babiloni. Ndidzalichotsa m'khosi mwa anthu a mitundu yonse zisanathe zaka ziŵiri.’ ” Zitatero mneneri Yeremiya adachokapo.

¹²Patapita nthaŵi pang'ono Hananiya atathyola goli m'khosi mwa Yeremiya, Chauta adauza Yeremiya kuti,

¹³“Pita ukamuuze Hananiya mau a Chauta akuti, ‘Iweyo wathyola goli lamtengo, m'malo mwake Ine ndidzaika goli lachitsulo.

¹⁴Chauta Wamphamvuzonse, Mulungu wa Israele, akunena kuti, Ndaika goli lachitsulo m'khosi mwa anthu a mitundu yonseyi, kuti azitumikira Nebukadinezara, mfumu ya ku Babiloni. Adzamutumikiradi, ndipo ndampatsanso ulamuliro ngakhale pa nyama zakuthengo.’ ”

¹⁵Tsono Yeremiya adauza Hananiya kuti, “Mvera, iwe Hananiya, Chautatu sadakutume, ndipo iweyo wanyenga anthuŵa kuti azimvera ulosi wabodza.

¹⁶Nchifukwa chake Chauta akunena kuti, ‘Chenjera, ndidzakuchotsa pa dziko lapansi. Ufa chaka chino chisanathe, chifukwa chakuti wakhala ukulalikira zopandukira Chauta.’ ”

¹⁷Zidachitikadi kuti mneneri Hananiya adafa chaka chomwecho, mwezi wachisanu ndi chiŵiri.