Read Buku Loyera - Chichewa Yer. 29 Bible Online

Yer. 29 - Buku Loyera - Chichewa bible

Yer. 29

¹ Yeremiya adatumiza kalata kuchokera ku Yerusalemu yopita kwa atsogoleri amene anali ku ukapolo, ndiponso kwa ansembe, aneneri, ndi anthu ena onse amene Nebukadinezara adaaŵatenga ukapolo ku Yerusalemu kupita nawo ku Babiloni.

²Zimenezi zidachitika pamene Yehoyakini ndi mfumukazi, nduna za mfumu ndi akuluakulu a ku Yuda ndi ku Yerusalemu, ndiponso anthu aluso ndi osula, anali atachoka ku Yerusalemu.

³Yeremiya kalatayo adapatsira Elasa mwana wa Safani, ndi Gemariya mwana wa Hilikiya, amene Zedekiya mfumu ya ku Yuda adaaŵatuma ku Babiloni kwa mfumu Nebukadinezara. M'kalatamo adaalembamo kuti,

⁴“Anthu onse a ku Yerusalemu, amene adatengedwa ukapolo kupita ku Babiloni, Chauta Wamphamvuzonse, Mulungu wa Israele, akuŵauza kuti,

⁵‘Mangani nyumba, muzikhalamo. Limani minda, mudye zipatso zake.

⁶Mukwatire, ndipo mubale ana aamuna ndi ana aakazi. Ana aamunawo muŵasankhire akazi, ana aakaziwo muŵasankhire amuna, kuti abale ana aamuna ndi ana aakazi. Ndipo muchulukane kumeneko, osachepa.

⁷Muzikometsa ku mizinda kumene ndidakupirikitsirani ku ukapoloko, kuti zonse zizikuyenderani bwino. Muzipempherera mizindayo kwa Chauta, chifukwa choti mizindayo ikakhala pa mtendere, inunso mudzakhala pabwino.

⁸Chauta Wamphamvuzonse, Mulungu wa Israele, akunena kuti, Aneneri asakunyengeni, ngakhale oombeza amene ali pakati panu, ndipo musamvere maloto ao.

⁹Ndithu amakuloserani zabodza m'dzina langa, Ine sindidaŵatume,’ ” akutero Chauta.

¹⁰ Chauta akunena kuti, “Zitatha zaka makumi asanu ndi aŵiri ku Babiloni, ndidzakuyenderani ndi kuchitadi zimene ndidakulonjezani zija, ndipo ndidzakubwezerani ku malo ano.

¹¹Zoona, Ine ndiye amene ndimadziŵa zimene ndidakukonzerani, zakuti mudzakhala pabwino osati poipa, kuti mukhale ndi chiyembekezo chenicheni pa zakutsogolo.

¹²Nthaŵi imeneyo mudzandiitana ndi kumanditama mopemba, ndipo ine ndidzakumverani.

¹³ Mudzandifunafuna, ndipo mudzandipeza. Mukadzandifunafuna ndi mtima wanu wonse,

¹⁴mudzandipezadi,” akuterotu Chauta. “Ndidzakubwezerani zabwino zanu, ndi kukusonkhanitsani kuchokera ku mitundu ina ya anthu ndi kumalo konse kumene ndidakupirikitsirani. Ndidzakubwezerani kumalo kumene mudaali, ndisanakutumizeni ku ukapolo.”

¹⁵Inu mumanena kuti, “Chauta adatipatsa aneneri athu ku Babiloni.”

¹⁶Koma Chauta alipo ndi mau pa za mfumu imene ikukhala pa mpando waufumu wa Davide, ndi pa za anthu onse okhala mu mzinda uno, ndiye kuti anzanu a m'dzikomo amene sadatengedwe nao ukapolo.

¹⁷Akunena kuti, “Ndidzaŵapha ndi nkhondo, njala ndi mliri. Ndidzaŵasandutsa ngati nkhuyu zoola kwambiri, zosatinso nkudyeka ai.

¹⁸Ndidzaŵapha ndi nkhondo, njala ndi mliri, ndipo ndidzaŵasandutsa chinthu chonyansa kwa anthu a maufumu onse a pa dziko lapansi. Adzakhala otembereredwa ndi ochititsa mantha, oŵaseka ndi onyozeka, pakati pa mitundu yonse ya anthu kumene ndidaŵapirikitsira.

¹⁹Izi zidzatero chifukwa sadamvere mau anga, pamene Ine ndidakhala ndikuŵatumizira aneneri, atumiki anga. Koma inunso simudamvere,” akuterotu Chauta.

²⁰“Nchifukwa chake tsono inu akapolo nonse amene ndidakutengani ukapolo kuchoka ku Yerusalemu kupita ku Babiloni, mverani mau a Ine Chauta.

²¹“Chauta Wamphamvuzonse wanenapo mau pa za Ahabu mwana wa Kalaya, ndi za Zedekiya mwana wa Maseiya, amene ankakuloserani zabodza m'dzina la Chautayo. Akuti, Ndidzaŵapereka kwa Nebukadinezara mfumu ya ku Babiloni, ndipo iyeyo adzaŵapha inu mukupenya.

²²Chifukwa cha anthu aŵiriwo, maina ao azidzaŵatchula anthu a ku Yuda okhala ku Babiloni potemberera anzao. Azidzati, ‘Chauta achite nawe monga m'mene adachitira ndi Zedekiya ndi Ahabu amene mfumu ya ku Babiloni adaŵatentha!’

²³Zoonadi makhalidwe ao ku Israele analidi oipa, ankachita chigololo ndi akazi a eniake, ankalosa zabodza m'dzina langa, Ine osaŵalamula. Ine ndikuzidziŵa, ndingathe kuzichitira umboni zimenezi,” akuterotu Chauta.

²⁴Semaya wa ku Nehelamu ukamuuze kuti,

²⁵“Mau a Chauta Wamphamvuzonse, Mulungu wa Israele, ndi aŵa akuti: Iweyo udatumiza kalata m'dzina lako kwa anthu onse a ku Yerusalemu, kwa Zefaniya wansembe mwana wa Maseiya, ndi kwa ansembe onse. M'kalatamo udanena kuti

²⁶Chauta wakuika iwe Zefaniya, kuti ukhale wansembe m'malo mwa wansembe Yehoyada. Wakuika kuti ukhale kapitao woyang'anira Nyumba ya Chauta. Uzimponya m'ndende ndi kumuveka goli munthu aliyense wamsala amene amadziyesa mneneri.

²⁷Nanga chifukwa chiyani tsono sudamchite zimenezi Yeremiya wa ku Anatoti, amene amakhala ngati mneneri pakati panu?

²⁸Ifetu ku Babiloni kuno Yeremiyayo watitumizira mau akuti: Ukapolo wanu ukhala wautali. Mangani nyumba zoti muzikhalamo, ndipo limani minda kuti muzidya zipatso zake.”

²⁹Kalata ya Semayayo wansembe Zefaniya adaiŵerengera pamaso pa mneneri Yeremiya.

³⁰Tsono Chauta adauza Yeremiya kuti,

³¹“Utume uthenga kwa akapolo onse, uŵauze mau a Chauta onena za Semaya wa ku Nehelamu, akuti, Semaya wakuloserani, ngakhale sindidamtume, ndipo wakunyengani kuti muzikhulupirira zabodza.

³²Nchifukwa chake Ine Chauta ndikunena kuti: Ndidzamlanga Semaya pamodzi ndi zidzukulu zake. M'banja lakelo palibe munthu amene adzakhale pakati pa mtundu uno wa anthu, amene adzaone zabwino zomwe ndidzachitira anthu anga, chifukwa iyeyo walalika zondipandukira,” akuterotu Chauta.