Read Buku Loyera - Chichewa Yer. 30 Bible Online

Yer. 30 - Buku Loyera - Chichewa bible

Yer. 30

¹Chauta adauza Yeremiya kuti,

²“Ine Chauta, Mulungu wa Israele, ndikunena kuti, Lemba m'buku zonse zimene ndakuuza.

³Nthaŵi ikubwera yoti ndidzaŵabwezere anthu anga, Israele ndi Yuda, ku dziko limene ndidapatsa makolo ao, ndipo lidzakhaladi lao.”

⁴Mau amene akunena za Israele ndi Yuda ndi aŵa:

⁵“Tamva kulira kwankhaŵa, kufuula kwamantha, ndipo palibe mtendere paliponse.

⁶Funsani kuti muzindikire, Kodi munthu wamwamuna angathe kubala mwana? Nanga nchifukwa chiyani ndikuwona munthu wamwamuna aliyense atagwira manja pa mimba ngati mkazi pa nthaŵi yake yochira? Chifukwa chiyani nkhope zonse zagwa?

⁷Kalanga ine! Tsiku limenelo nlalikulu kwambiri, sipadzakhala lina lofanana nalo. Idzakhala nthaŵi yamavuto kwa Yakobe, komabe adzapulumuka ku mavutowo.”

⁸Chauta Wamphamvuzonse akunena kuti, “Tsiku limenelo ndidzathyola goli laukapolo m'khosi mwao, ndidzadula zingwe zoŵamanga. Aisraele sadzakhalanso akapolo a alendo.

⁹Azidzangotumikira Chauta, Mulungu wao, ndi Davide, mfumu yao, amene ndidzaŵasankhulira.

¹⁰ “Nchifukwa chake musachite mantha inu a m'banja la Yakobe, mtumiki wanga, musataye mtima inu Aisraele,” akuterotu Chauta. “Ndithu ndidzakupulumutsani kuchokera ku dziko lakutali. Ndidzapulumutsanso zidzukulu zanu kuchokera kudziko kumene ali mu ukapolo. Nonsenu mudzabwereranso, ndipo mudzakhala ndi mtendere popanda okuwopsani.

¹¹Ine ndili nanu, ndipo ndidzakupulumutsani,” akuterotu Chauta. “Ndidzaononga mitundu yonse ya anthu kumene ndidakubalalitsani, koma inu sindidzakuwonongani kotheratu. Ndidzakulangani potsata chilungamo, sindingakulekerereni osakulangani konse.”

¹²Chauta akunena kuti, “Chilonda chanu nchosachizika, bala lanu nlonyeka.

¹³Palibe amene angathe kukutetezani pa mlandu wanu. Palibe mankhwala opoletsa chilonda chanu. Palibe mankhwala ochiza nthenda yanu.

¹⁴Abwenzi anu onse akuiŵalani, sakulabadiraninso. Ndakulangani mwankhanza, poti mlandu wanu ndi waukulu, machimo anu ndi ambiri.

¹⁵Chifukwa chiyani mukudandaula nacho chilonda chanu? Bala lanu silingapole ai. Mlandu wanu ndi waukulu, machimo anu ngambiri, nchifukwa chake ndakuchitani zimenezi.

¹⁶Tsono onse amene adakuwonongani inu, ndidzaŵaononga iwonso. Onse okuzunzani adzatengedwa ukapolo. Onse ofunkha zinthu zanu, nawonso zao zidzafunkhidwa. Ndipo onse okusakazani, ndidzachita zoti nawonso aŵasakaze.

¹⁷Koma inuyo, ndidzachiza matenda anu, ndidzapoletsa mabala anu, chifukwa anthu ena amati ndinu otayika, amati, ‘Ndi anthu a ku Ziyoni aŵa, opanda oŵasamala,’ ” akuterotu Chauta.

¹⁸Chauta akunena kuti, “Ndidzabwezeranso a banja la Yakobe ku dziko lao. Ndidzaonetsanso chikondi changa ku malo ake onse. Mzinda wa Yerusalemu uja udzamangidwanso pabwinja pake pompaja. Nyumba yaufumu idzamangidwanso pamalo pake.

¹⁹Anthuwo adzaimba nyimbo zoyamika Chauta, ndipo padzamveka phokoso la chisangalalo. Ndidzaŵachulukitsa, sadzakhalanso oŵerengeka ai. Ndidzaŵapatsa ulemerero, ena sadzaŵanyozanso.

²⁰Ana ao adzakhalanso monga m'mene adaaliri kale. Mpingo wao wonse ndidzaukhazikitsanso Mwiniwakene. Ndidzalanga onse oŵazunza.

²¹Wodzaŵalamulira adzakhala mmodzi mwa iwo. Mtsogoleri wao adzachokera pakati pao. Ineyo ndidzamkokera pafupi nane, ndipo iye adzayandikana nane. Ndanitu angalimbe mtima payekha kuti ayandikane ndi Ine?” Akutero Chauta.

²²“Motero inu mudzakhala anthu anga, ndipo Ine ndidzakhala Mulungu wanu.

²³“Onani, mphepo yamkuntho ya Chauta! Mkuntho wamphamvu wa kamvulumvulu, ukuwomba pa mitu ya anthu olakwa.

²⁴Mkwiyo wa Chauta sudzachoka mpaka utatsiriza kuchita zonse zimene mtima wa Chautayo ukufuna. Mudzamvetsa zimenezi masiku akubwerawo.”