Read Buku Loyera - Chichewa Yer. 31 Bible Online

Yer. 31 - Buku Loyera - Chichewa bible

Yer. 31

¹Chauta akunena kuti, “Pa nthaŵi imeneyo ndidzakhala Mulungu wa mabanja onse a Israele, ndipo iwo adzakhala anthu anga.”

²Mau a Chauta ndi aŵa, “Anthu amene adapulumuka ku nkhondo, ndidaŵakomera mtima m'chipululu. Pamene Aisraele ankafuna kupumula,

³Ine ndidaŵaonekera ndili chakutali. Inu Aisraele ndakukondani kwambiri ndi chikondi chopanda malire, ndakhala wokhulupirika kwa inu mpaka tsopano.

⁴Ndidzakusamaliraninso inu anthu a ku Israele, motero mudzapezanso bwino. Mudzakondwanso poimba ting'oma tolira, ndipo mudzapita nawo limodzi anthu ovina mwachimwemwe.

⁵Mudzalimanso minda yamphesa pa mapiri a Samariya. Alimi adzabzala mphesa ndipo adzadya zipatso zake.

⁶Lidzafika tsiku pamene alonda a pa mapiri a Efuremu adzafuula kuti, ‘Tiyeni, tipite ku Ziyoni kwa Chauta, Mulungu wathu!’ ”

⁷Chauta akuti, “Imbani mokweza ndi mosangalala chifukwa cha Yakobe. Fuulani chifukwa cha mtundu wopambana mitundu yonse. Lalikani, tamandani ndi kulengeza kuti, ‘Chauta wapulumutsa anthu ake, wasunga otsala a Israele.’

⁸Ndidzaŵatulutsa kuchokera ku dziko lakumpoto. Ndidzaŵasonkhanitsa kuchokera ku malekezero a dziko lapansi. Ndidzasonkhanitsa akhungu ndi opunduka, akazi amene ali ndi pakati ndi amene ali pa nthaŵi yao yochira. Chidzakhala chinamtindi cha anthu obwerera kuno.

⁹Adzabwerera kwao akulira, koma Ine ndidzaŵaperekeza ndi mtima wachifundo. Ndidzaŵatsogolera ku mitsinje yodzaza ndi madzi. Sadzaphunthwa, njira yao idzakhala yosalala kwambiri. Ine ndine bambo wake wa Israele, Efuremu ndi mwana wanga wachisamba.

¹⁰“Mverani mau a Chauta, inu anthu a mitundu yonse. Mulalike mauwo ku maiko akutali a m'mbali mwa nyanja. Mulungu amene adabalalitsa Aisraele adzaŵasonkhanitsanso. Adzaŵasamala monga momwe mbusa amasamalira nkhosa zake.

¹¹Ndithu, Chauta waombola fuko la Yakobe. Adaŵapulumutsa m'mavuto amene sakadatha kutulukamo.

¹²Anthuwo adzabwera akuimba mofuula pa mapiri a Ziyoni, adzakhala osangalala kwambiri chifukwa cha zabwino zochuluka zochokera kwa Chauta. Zabwinozo ndi izi: tirigu, vinyo watsopano, mafuta, anaankhosa ndi anaang'ombe. Moyo wao udzakhala ngati munda wothirira, ndipo sadzamvanso chisoni.

¹³Anamwali adzavina mokondwa, achinyamata ndi okalamba omwe adzasangalala. Kulira kwao kuja ndidzakusandutsa chimwemwe. Ndidzaŵasangalatsa, ndidzaŵakondwetsa, nkuchotsa chisoni chao.

¹⁴Ansembe ndidzaŵadyetsa chakudya chabwino, ndipo anthu anga adzakhuta zabwino za chifundo changa,” akuterotu Chauta.

¹⁵Mau a Chauta ndi aŵa: “Imvani, kulira kukumveka ku Rama, kulira komvetsa chisoni. Rakele akulira ana ake. Sakutonthozeka, chifukwa choti ana ake asoŵa.”

¹⁶Chauta akunena kuti, “Tonthola, usadzenso misozi. Ndithu udzalandira mphotho ya ntchito zako, akutero Chauta. Ndipo anthu adzabwerako ku dziko la adani.

¹⁷Tsono chikhulupiriro chilipo pa zakutsogolo, zidzukulu zanu zidzabweranso kudziko kuno,” akutero Chauta.

¹⁸“Ndamva Aefuremu akulira mwachisoni kuti, ‘Inu mwatilanga ngati mwanawang'ombe wosaphunzitsidwa, ndipo taphunziradi kumvera. Mutibweze kuti tithe kubwerera, Pakuti inu ndinu Chauta, Mulungu wathu.

¹⁹Tsopano poti tatembenuka mtima, tikumva chisoni. Tsopano poti taphunzira, tikudzigunda pa mtima. Tachita manyazi ndipo tanyazitsidwa, chifukwa cha machimo athu apaubwana.’

²⁰Kodi suja Efuremu ndi mwana wanga wapamtima, mwana amene ndimakondwera naye kwambiri? Nthaŵi zonse ndikamamdzudzula, ndimamkumbukirabe ndi chikondi, mwakuti mtima wanga umamlakalaka. Ndimamumvera chifundo chozama zedi,” akuterotu Chauta.

²¹“Mudziikire zizindikiro, mudziikire zikwangwani. Muuyang'anitsitse mseuwo, mseu umene mudaadzera popita. Bwerera namwaliwe Israele, bwerera ku mizinda yako ija.

²²Kodi udzakhala ukutepeka mpaka liti, iwe mwana wanga wosakhulupirika? Zoona, Chauta walenga chinthu chatsopano pa dziko lapansi: mkazi ndiye atsogola kufunafuna mwamuna.”

²³Chauta Wamphamvuzonse, Mulungu wa Israele, akunena kuti, “Pamene ndidzabwezeranso anthu ufulu, kudzamvekanso mau ku dziko la Yuda ndi ku mizinda yake. Mau ake adzakhala akuti, ‘Chauta akudalitse iwe malo achilungamo, ndiponso iwe phiri loyera.’

²⁴Anthu adzakhala ku Yuda ndi ku mizinda yake, pamodzi ndi alimi ndi oŵeta nkhosa.

²⁵Ndidzatsitsimutsa anthu ofooka, ndipo anthu anjala ndidzaŵadyetsa chakudya nadzakhuta.”

²⁶Pamenepo ndidadzuka nkudzati maso mwalamwala, ndipo ndidaona kuti ai ndidaatipha tulo.

²⁷Chauta akunena kuti, “Ikubwera nthaŵi pamene ndidzachulukitsa anthu ndi ziŵeto mu Israele ndi Yuda.

²⁸Monga momwe ndidaŵasamalira, kuŵazula, kuŵapasula, kuŵagumula, kuŵaononga ndi kuŵachita zoipa, momwemonso ndidzasamala kuti ndiŵamange ndi kuŵabzalanso,” akuterotu Chauta.

²⁹ “Masiku amenewo anthu sadzanenanso kuti, ‘Makolo adya mphesa zosapsa, koma ana ndiye achita dziru.’

³⁰Koma munthu aliyense adzafa chifukwa cha machimo ake. Aliyense wodya mphesa zosapsa, ndi iye yemweyo amene adzachite dziru.”

³¹ Chauta akunena kuti, “Akubwera masiku pamene ndidzachite chipangano chatsopano ndi anthu a ku Israele ndi a ku Yuda.

³²Sichidzakhalanso ngati chipangano chija chimene ndidaachita ndi makolo ao, pamene ndidaŵagwira padzanja nkuŵatulutsa ku dziko la Ejipito. Chipangano chimenecho iwo adaphwanya, ngakhale ndinali Mbuye wao.

³³ Koma chipangano chimene ndidzachite ndi anthu a ku Israele atatha masiku amenewo, ndi ichi: Ndidzaika malamulo anga mwa iwo, ndidzachita kuŵalemba m'mitima mwao. Tsono Ineyo ndidzakhala Mulungu wao, ndipo iwowo adzakhala anthu anga.

³⁴ Nthaŵi imeneyo wina sazidzachitanso kuphunzitsa mnzake kapena mbale wake kuti adziŵe Chauta. Pakuti onsewo, ana ndi akulu omwe adzandidziŵa, Ndidzaŵakhululukira machimo ao, sindidzakumbukiranso machimo aowo,” akuterotu Chauta.

³⁵Chauta akunenanso kuti, “Iye amene amaŵalitsa dzuŵa masana, amene amaŵalitsa mwezi ndi nyenyezi usiku, amene amavundula nyanja kuti mafunde ake achite mkokomo, ndiye amene dzina lake ndi Chauta Wamphamvuzonse.

³⁶Ngati zochitika zimenezi zilekeka, Ine ndili pomwepo, pamenepo ndiye fuko la Israele lidzathe, ndipo silidzakhalanso mtundu wa anthu pamaso panga mpaka muyaya.

³⁷Atangopezeka munthu wotha kupima zakumwamba nkufufuza maziko a dziko lapansi, pamenepo Inenso ndidzalitaya fuko lonse la Israele, chifukwa cha zoipa zimene iwo adachita,” akuterotu Chauta.

³⁸Chauta akuti, “Ikubwera nthaŵi pamene mzinda uja wa Chauta udzamangidwanso kuyambira ku Nsanja ya Hananele mpaka ku Chipata cha Ngodya.

³⁹Kuyambira pamenepo malire ake adzapitirira mpaka ku phiri la Garebe, nkudzakhota kuloza ku Gowa.

⁴⁰Chigwa chonse m'mene amatayiramo mitembo ndi phulusa, ndiponso minda yonse kuyambira ku mtsinje wa Kidroni mpaka ku ngodya ya Chipata cha Kavalo chakuvuma, zonsezo zidzakhala zopatulikira Chauta. Mpakampaka mzinda wa Yerusalemu sudzaonongedwanso kapena kugwetsedwa.”