Read Buku Loyera - Chichewa Yer. 35 Bible Online

Yer. 35 - Buku Loyera - Chichewa bible

Yer. 35

¹ Pa nthaŵi imene Yehoyakimu, mwana wa Yosiya, anali mfumu ya ku Yuda, Chauta adalankhula nane ine Yeremiya. Adati,

²“Pita ku banja la Arekabu, ukaŵaitane anthu akumeneko kuti abwere m'chipinda chimodzi cha Nyumba ya Chauta. Atafika, uŵapatse vinyo kuti amwe.”

³Motero ndidabwera ndi Yazaniya (mwana wa Yeremiya winanso, mwana wa Habaziniya,) pamodzi ndi abale ake ndiponso ana ake onse aamuna, ndiye kuti banja lonse la Arekabu.

⁴Ndidabwera nawo ku nyumba ya Chauta, ku chipinda cha ophunzira a Hanani, mwana wa Igadaliya, munthu womvera Mulungu. Chipinda chimenechi chinali pafupi ndi chipinda cha akuluakulu, pamwamba pa chipinda cha Maseiya, mwana wa Salumu, mlonda wapakhomo.

⁵Tsono ndidaika mbiya zodzaza ndi vinyo ndi zikho zomwera pamaso pa Arekabuwo, ndipo ndidaŵauza kuti, “Nayu vinyo, imwani.”

⁶Koma iwowo adati, “Ife sitimwa vinyoyu, poti kholo lathu Yonadabu mwana wa Rekabu adatilamula kuti, ‘Musadzamwe vinyo, inuyo ndi ana anu omwe.

⁷Musadzamange nyumba kapena kubzala mbeu, kapena kulima minda yamphesa. Zinthu zimenezi musadzakhale nazo. M'malo mwake muzidzangokhala m'mahema pa moyo wanu wonse, kuti mukhale nthaŵi yaikulu m'dziko limene mukukhalamo.’

⁸Takhala tikutsata malamulo a kholo lathu Yonadabu, mwana wa Rekabu, ndipo pa moyo wathu wonse sitidamwe vinyo ifeyo, akazi athu, ana athu aamuna ndi ana athu aakazi.

⁹Sitidamange nyumba kuti tizikhalamo, kapena kulima minda yamphesa kapena minda ina iliyonse.

¹⁰Tangokhala m'mahema basi. Motero tamvera ndi kusunga malamulo onse a kholo lathu Yonadabu.

¹¹Koma pamene Nebukadinezara mfumu ya ku Babiloni adathira nkhondo dziko lino, tidanena kuti, ‘Tiyeni tichoke, tipite ku Yerusalemu kuti tithaŵe magulu ankhondo a Ababiloni ndi a Asiriya.’ Nchifukwa chake tikukhala kuno ku Yerusalemu.”

¹²Tsono mau a Chauta adadza kwa Yeremiya onena kuti,

¹³Chauta Wamphamvuzonse, Mulungu wa Israele akuti, “Pita ukafunse anthu a ku Yuda ndi anthu a ku Yerusalemu kuti, ‘Kodi simungatengeko nzeru ndi kumvera mau anga?’

¹⁴Lamulo la Yonadabu, mwana wa Rekabu, limene adalamula zidzukulu zake kuti asadzamwe vinyo, iwowo asungadi. Samwa vinyo mpaka lero lino chifukwa chomvera lamulo la kholo lao. Ndakhala ndikulankhula nanu kaŵirikaŵiri kukuchenjezani, komabe simudandimvere.

¹⁵Ndidatuma atumiki anga aneneri kuti adzakuuzeni kuti, ‘Aliyense mwa inu asiye ntchito zake zoipa. Konzani makhalidwe anu, ndipo muleke kutsata milungu ina, musamaipembedza. Motero mudzakhala m'dziko limene ndakupatsani inu ndi makolo anu.’ Komabe inu simudalabadeko, simudandimvere.

¹⁶Ana a Yonadabu, mwana wa Rekabu, adatsata lamulo limene kholo lao lidaŵapatsa. Koma inuyo simudandimvere ai.

¹⁷Nchifukwa chake Ine Chauta Wamphamvuzonse, Mulungu wa Israele, ndikuti ndidzaŵaononga Ayuda ndi anthu onse okhala ku Yerusalemu, chifukwa chakuti sadandimvere pamene ndidaŵalankhula, sadandiyankhe nditaŵaitana.”

¹⁸Yeremiya adauza Arekabu aja mau a Chauta Wamphamvuzonse, Mulungu wa Israele, akuti, “Chifukwa chakuti mudamvera lamulo la Yonadabu kholo lanu, ndipo mudatsata malangizo ake ndi kuchita zonse zimene adakuuzani kuti muchite,

¹⁹tsono Chauta Wamphamvuzonse, Mulungu wa Israele, akunena kuti, ‘Yonadabu mwana wa Rekabu sadzasoŵa mdzukulu wonditumikira mpaka muyaya.’ ”