Read Buku Loyera - Chichewa Yer. 4 Bible Online

Yer. 4 - Buku Loyera - Chichewa bible

Yer. 4

¹“Ngati mukufuna kubwerera, inu Aisraele, bwererani kwa Ine,” akuterotu Chauta. “Chotsani mafano anu amene akundinyansaŵa, ndipo musasokerenso.

²Muzilumbira moona kuti, ‘Pali Chauta wamoyo.’ Muzichita zimenezi mwachilungamo ndi mokhulupirika. Mukatero, anthu a mitundu yonse adzandipempha kuti ndiŵadalitse, ndipo adzanditamanda.”

³ Chauta akuuza anthu a ku Yuda ndi anthu okhala ku Yerusalemu kuti, “Limani masala anu, musabzale pakati pa minga.

⁴Muzikhala okhulupirika ndi kumanditumikira Ine Chauta ndi mtima wanu wonse. Muzichita zimenezi inu anthu a ku Yuda ndi inu okhala ku Yerusalemu, kuwopa kuti mkwiyo wanga ungabuke ngati moto, ndi kukuyakirani chifukwa cha ntchito zanu zoipa, osapezeka wina aliyense wotha kuuzimitsa.”

⁵Lalika ku Yuda, lengeza ku Yerusalemu kuti, “Lizani lipenga m'dziko lonse, ndi kufuula kuti, ‘Sonkhanani, tiyeni tipite ku mizinda ku Ziyoni.’

⁶Kwezani mbendera ku Ziyoni. Musachedwe, thaŵani kuti mupulumuke. Chauta akubweretsa chilango kuchokera kumpoto, kudzakhala chiwonongeko chachikulu.

⁷Monga momwe mkango umatulukira m'ngaka yake, momwemonso woononga maiko wanyamuka. Watuluka m'malo mwake kuti asakaze dziko lanu. Mizinda yanu idzakhala mabwinja popanda okhalamo.

⁸Motero valani ziguduli, mudandaule ndi kulira kwambiri. Pakuti mkwiyo woopsa wa Chauta sudatichoke.”

⁹Chauta akuti, “Pa tsiku limenelo mfumu ndi nduna zake, onse adzataya mtima. Ansembe adzaopsedwa, ndipo aneneri adzangoti kakasi.”

¹⁰Tsono ndidati, “Ha, Ambuye Chauta, ndithu mudaŵanyenga anthu aŵa pamodzi ndi a mu Yerusalemu! Mudaŵauza kuti, ‘Mudzakhala pa mtendere,’ koma chonsecho lupanga lili pamutu pao.”

¹¹Nthaŵiyo ikadzafika, anthu a mu Yerusalemu adzaŵauza kuti, “Mphepo yotentha yochokera ku magomo am'chipululu ikukuntha pa anthu anga, osatitu mphepo yopetera kapena kuyeretsera zinthu ai.

¹²Imeneyo ndi mphepo yamphamvu zedi yochokera kwa Ine Mulungu. Ndipo ndi Ineyo amene ndikuŵaimba mlandu.”

¹³Onani, adani akubwera mwaliŵiro ngati mitambo, magaleta ao akuthamanga ngati kamvulumvulu. Akavalo ao ngaliŵiro kuposa chiwombankhanga. Kalanga ine, taonongeka.

¹⁴Iwe Yerusalemu, chotsa zoipa mumtima mwako kuti upulumuke. Kodi maganizo ako oipa udzakhala nawobe mpaka liti?

¹⁵Pakuti amithenga a ku Dani akulalika mau, akulengeza zoopsa kuchokera ku Phiri la Efuremu.

¹⁶Akuti, “Muchenjeze mitundu ya anthu kuti mdani akubwera. Mulengeze kwa anthu a mu Yerusalemu kuti ankhondo akubwera kuchokera ku dziko lakutali, akufuula ndi kudzathira nkhondo mizinda ya Yuda.

¹⁷Akuzinga Yerusalemu ngati alonda a munda, chifukwa choti anthu andipandukira,” akuterotu Chauta.

¹⁸“Zimenezi zakugwerani, inu Ayuda, chifukwa cha makhalidwe anu oipa ndi zochita zanu. Chimenechi ndiye chilango chanu, nchoŵaŵa kwambiri, chokalasa mpaka ku mtima.”

¹⁹Mayo, mayo, ati kupweteka ati! Ha, mtima wanga ukuŵaŵa, ukugunda moti thithithi. Sindingathe kukhala chete. Ndikumva kulira kwa lipenga ndi mfuu yankhondo.

²⁰Tsoka limatsata tsoka linzake, ndipo dziko lonse lasanduka bwinja. Mwadzidzidzi mahema athu aonongeka, machinga ake agwetsedwa pa kanthaŵi kang'onong'ono.

²¹Kodi ndikhale ndikuwona mbendera yankhondo mpaka liti? Kodi ndikhale ndikumva lipenga mpaka liti?

²²Chauta akuti “Paja anthu anga ndi opusa, Ine sandidziŵa. Ali ngati ana opulukira, osamvetsa chilichonse. Ali ndi luso pochita zoipa, koma kuchita zabwino sadziŵa.”

²³Ndidayang'ana dziko lapansi, linali lopanda anthu ndi lopanda kanthu kalikonse. Ndidayang'ana thambo, linalibe konse kuŵala.

²⁴Ndidayang'ana mapiri, ankagwedezeka, ndipo magomo onse ankangosunthira uku ndi uku.

²⁵Ndidayang'ana, osaona ndi munthu mmodzi yemwe, ndipo mbalame zonse zamumlengalenga zinali zitathaŵa.

²⁶Ndidayang'ana, dziko la chonde linali litasanduka chipululu, mizinda yake yonse inali itasanduka mabwinja, chifukwa cha mkwiyo wa Chauta.

²⁷Chauta akunena kuti, “Dziko lonse lidzasanduka chipululu, komabe sindidzaliwononga kotheratu.

²⁸Chifukwa cha zimenezi dziko lonse lapansi lidzalira ndipo zakumwamba zidzachita mdima. Pakuti Ine ndalankhula, ndipo ndili ndi cholinga. Sindidafeŵe mtima, ndipo sindidzabwerera konse m'mbuyo.”

²⁹Anthu a m'mudzi uliwonse adzathaŵa, pakumva phokoso la ankhondo okwera pa akavalo ndi oponya mivi. Azikati uku ena akuloŵa m'nkhalango, ena akukwera m'mathanthwe. Mizinda yonse kuisiya, popanda ndi mmodzi yemwe wokhalamo.

³⁰Iwe Yerusalemu, ndiwe bwinja. Ukuti utani m'mene ukuvala zofiira, m'mene ukuvala zokongoletsa zagolide, m'mene ukukuza maso ako poŵapaka zokometsera? Ukungodzivuta poyesa kudzikongoletsa. Zibwenzi zako zikukunyoza, zikufuna kulanda moyo wako.

³¹Ndidamva kulira ngati kwa mkazi pa nthaŵi yake yochira, kubuula ngati kwa mkazi pa uchembere wake woyamba. Kumeneku kunali kulira kwa anthu a mu Ziyoni, ŵefuŵefu, atatambalitsa manja ao, akunena kuti, “Tsoka ife! Tikukomoka, moyo wathu waperekedwa kwa anthu otipha.”