Read Buku Loyera - Chichewa Yer. 43 Bible Online

Yer. 43 - Buku Loyera - Chichewa bible

Yer. 43

¹Yeremiya atatsiriza kuuza anthu zonse zimene Chauta Mulungu wao adamtuma kuti akaŵauze,

²Azariya mwana wa Hesaya, Yohanani mwana wa Kareya, ndiponso anthu onse achipongwe, adauza Yeremiya kuti, “Iwe ukunama. Chauta Mulungu wathu sadakutume kudzanena kuti, ‘Musapite ku Ejipito kukakhala kumeneko.’

³Baruki mwana wa Neriya ndiye wakukakamiza kuti utiletse, ndipo kuti tigwe m'manja mwa Ababiloni, kuti atiphe kapena kutitenga ukapolo kupita ku Babiloni.”

⁴Tsono Yohanani mwana wa Kareya ndi atsogoleri onse a ankhondo, pamodzi ndi anthu onse a ku Yuda, adakana kumvera Chauta ndipo sadakhale ku Yuda.

⁵ Choncho Yohanani mwana wa Kareya, pamodzi ndi atsogoleri a ankhondo, adatenga anthu onse otsala a ku Yuda amene adabwerera kuchokera ku maiko kumene adaabalalikira kuti akakhale ku Yuda.

⁶Anthuwo anali aŵa: amuna, akazi ndi ana, kuphatikizapo ana aakazi a mfumu, ndiponso anthu onse amene Nebuzaradani, mtsogoleri wa ankhondo adaaŵasiya kwa Gedaliya mwana wa Ahikamu, mdzukulu wa Safani. Adatenganso mneneri Yeremiya ndi Baruki mwana wa Neriya.

⁷Onsewo adapita nawo ku Ejipito monyoza mau a Chauta, nakafika ku Tapanesi.

⁸Chauta adalankhula ndi Yeremiya ku Tapanesi. Adamuuza kuti,

⁹“Tenga miyala ina yaikulu, uikwirire m'dothi pa chiwundo cha poloŵera ku nyumba yaufumu ya Farao ku Tapanesi. Ayuda akuwone ukuchita zimenezo.

¹⁰Tsono uŵauze kuti Chauta Wamphamvuzonse, Mulungu wa Israele, akunena kuti, ‘Ndidzaitana mtumiki wanga Nebukadinezara, mfumu ya ku Babiloni. Iyeyo adzaika mpando wake pa miyala imene ndaibisa apoyo. Ndipo adzafunyulula hema lake laufumu pa miyalayo.

¹¹Adzabwera kudzaononga Ejipito, adzatumiza mliri pa anthu oyenera kufa ndi mliri, adzatenga ukapolo anthu oyenera kutengedwa ukapolo, ndipo adzaŵapha ndi lupanga oyenera kuphedwa ndi lupanga.

¹²Adzasonkha moto m'nyumba za milungu ya ku Ejipito. Adzatentha nyumbazo, ndipo milunguyo adzaitenga kupita nayo ku ukapolo. Adzayeretsa dziko la Ejipito monga momwe mbusa amamangira chovala chake m'chiuno, momwemonso ndimo adzaŵachitire Aejiptio ndipo adzachoka ku Ejipito osaona vuto lililonse.

¹³Adzaphwanya zipilala zachipembedzo za ku nyumba yopembedzeramo mulungu wa dzuŵa ku Ejipito. Ndipo adzatentha nyumba za milungu ya ku Ejipito.’ ”