Read Buku Loyera - Chichewa Yer. 46 Bible Online

Yer. 46 - Buku Loyera - Chichewa bible

Yer. 46

¹Chauta adauza mneneri Yeremiya mau onena za anthu a mitundu ina.

² Kunena za Ejipito, adanena za gulu lankhondo la Farao Neko, mfumu ya ku Ejipito, limene Nebukadinezara mfumu ya ku Babiloni adaligonjetsa ku Karikemisi ku mtsinje wa Yufurate pa chaka chachinai cha ufumu wa Yehoyakimu, mwana wa Yosiya mfumu ya ku Yuda. Adati,

³“Konzani zishango ndi malihawo, yambanipo wa ku nkhondo.

⁴Mangani akavalo, ndipo amene amakwerapo akwere. Khalani pa mzere mutavala zisoti zanu. Nolani mikondo yanu, valani malaya anu achitsulo.

⁵Koma tsopano ndikuwona chiyani? Achita mantha, abwerera. Ankhondo ao agonjetsedwa. Akuthaŵa kaŵeraŵera, osacheukanso m'mbuyo. Agwidwa ndi mantha ponseponse,” akutero Chauta.

⁶Waliŵiro sangathe kupulumuka. Ngakhale wankhondo wamphamvu sangathe kudzipulumutsa. Akunka naphunthwa, kumagwa kumpoto kwa mtsinje wa Yufurate.

⁷“Kodi ndani akukwera ngati mtsinje wa Nailo, ngati mitsinje ya madzi achigumula?

⁸Ejipito akukwera ngati mtsinje wa Nailo, ngati mitsinje ya madzi achigumula. Akuti, ‘Ndidzambatuka ndi kuliphimba dziko lapansi. Ndiwononga mizinda ndi anthu ake.’

⁹Tiyeni inu akavalo, thamangani inu magaleta. Pitani patsogolo inu ankhondo, inu anthu a ku Etiopiya ndi a ku Puti, ogwira zishango, ndiponso inu anthu a ku Ludi, akatswiri pogwira uta.

¹⁰Koma tsikulo ndi tsiku la Chauta Wamphamvuzonse, tsiku lolipsira, lolipsira adani ake. Lupanga lake lidzaŵaononga, lidzakhuta magazi, lidzachita kuledzera nawo. Ambuye Chauta Wamphamvuzonse akukonzera nsembe ku dziko lakumpoto, pafupi ndi mtsinje wa Yufurate.

¹¹Pita ku Giliyadi, ukatenge mankhwala, namwali iwe Ejipito. Wayesayesa mankhwala ambiri koma walephera, matenda akowo sadzachira.

¹²Anthu a mitundu ina amva za manyazi ako, kulira kwako kwadzaza dziko lapansi. Ankhondo akunka nagwetsanagwetsana, onse pansi ndu kugwera limodzi.”

¹³ Naŵa mau amene Chauta adalankhula ndi mneneri Yeremiya za kubwera kwa Nebukadinezara, mfumu ya ku Babiloni, kudzathira nkhondo dziko la Ejipito:

¹⁴“Mulengeze ku Ejipito, mulalike ku Migidoli, ku Memfisi ndi ku Tapanesi. Anthu akumeneko muŵauze kuti, ‘Imani pamalo panu, mukhale okonzeka chifukwa chakuti nkhondo idzaononga zonse pokuzungulirani.’

¹⁵Chifukwa chiyani mulungu wanu Apisi wathaŵa? Chifukwa chiyani nkhunzi yanu yoipembedza ija sidalimbike? Nchifukwa choti Chauta waigwetsa.

¹⁶Anthu ako akukhumudwa, akugwerana. Aliyense akunena kuti, ‘Nyamukani, tiyeni tizibwerera kwathu, kudziko kumene tidabadwira, tithaŵe lupanga la adani athuŵa!’

¹⁷Farao, mfumu ya ku Ejipito, mpatseni dzina lakuti ‘Waphokoso, wotaya mwai wake.’

¹⁸“Pali Ine ndemwe!” Ikutero Mfumu, imene dzina lake ndi Chauta Wamphamvuzonse. Wina wamphamvu adzabwera wonga ngati Tabori phiri lopambana mapiri ena, wonga ngati phiri la Karimele, loti joo m'mbali mwa nyanja.

¹⁹Konzani katundu wanu wopita naye ku ukapolo, inu anthu a ku Ejipito, pakuti Memfisi adzasanduka chipululu, ngati bwinja, mopanda anthu.

²⁰“Ejipito ali ngati mwanawang'ombe wokongola. Koma chimphanga chochokera kumpoto chidzamtera.

²¹Ankhondo aganyu amene ali nawo, ali ngati anaang'ombe onenepa. Nawonso abwerera m'mbuyo nathaŵa pamodzi, palibe amene walimbikira. Ndithu, nthaŵi ya tsoka yaŵafikira, ndiyo nthaŵi yoŵalanga!

²²“Liwu la Ejipito likunga ngati la njoka yothaŵa, chifukwa choti adani ake abwera ndi zida zao, kubwera ndi nkhwangwa, ngati anthu odula mitengo.

²³Adzaduladi nkhalango ya ku Ejipito ngakhale njoŵirira, chifukwa anthuwo ndi ochuluka ngati dzombe, sangathe kuŵerengeka.

²⁴Anthu a ku Ejipito adzachitadi manyazi, adzatengedwa ukapolo ndi anthu akumpoto,” akutero Chauta.

²⁵Chauta Wamphamvuzonse, Mulungu wa Israele, wanena kuti, “Ndidzalanga Amoni, mulungu wa Thebesi. Ndidzalanganso Farao ndi Ejipito pamodzi ndi milungu yake ndi akalonga ake. Ndidzalanga Farao ndi onse amene amamkhulupirira.

²⁶Ndidzaŵapereka kwa amene afuna kuŵaononga, ndiye kuti kwa Nebukadinezara, mfumu ya ku Babiloni, ndi atsogoleri ake a ankhondo. Komabe patapita nthaŵi, Ejipito adzakhalanso ndi anthu monga kale,” akutero Chauta.

²⁷ “Koma iwe Yakobe, mtumiki wanga, usachite mantha, Iwe Israele, usataye mtima, chifukwa ndidzakupulumutsa kuchokera ku maiko akutali. Ndidzapulumutsanso zidzukulu zako kuchokera kumaiko kumene adapita nazo ku ukapolo. Yakobe adzabwerera, nadzapumula pabwino, ndi pa mtendere. Palibe winanso amene adzamuwopsa.”

²⁸Chauta akunena kuti, “Iwe Yakobe, mtumiki wanga, usachite mantha, pakuti Ine ndili nawe. Ndidzaonongeratu mitundu yonse ya anthu a kumaiko kumene ndidakupirikitsira. Koma iweyo sindidzakuwononga kotheratu ai. Kulanga ndidzakulanga monga m'mene kuyenera, sindingakulekelere osakulanga konse.”