Read Buku Loyera - Chichewa Yer. 47 Bible Online

Yer. 47 - Buku Loyera - Chichewa bible

Yer. 47

¹ Naŵa mau amene Chauta adalankhula ndi mneneri Yeremiya, onena za Afilisti, Farao asanaononge Gaza.

²Adati, “Onani m'mene madzi akubwerera kuchokera kumpoto, adzakhala mtsinje wosefukira ndi wamkokomo. Adzasefukira m'dzikomo ndi kumiza zonse zokhala m'menemo, mizinda yonse, ndi anthu onse okhalamo. Anthu azidzafuula, onse okhala m'dzikomo azidzalira.

³Adzamva mgugu wa akavalo othamanga, adzamva phokoso la magaleta ake, ndi kulira kwa mikombero yake. Atate sadzaganizirako za ana ao, adzangokhala ali manja lende!

⁴Ndithu tsiku lidzafika limene Afilisti onse adzaonongeka, tsiku limene adzaphedwe otsala onse amene ati adzathandize mzinda wa Tiro ndi Sidoni. Pakuti Chauta adzaononga Afilisti, onse otsala a ku chilumba cha Krete.

⁵A ku Gaza adzameta mipala yachisoni, A ku Asikeloni adzangoti chete. Inu otsala mwa Afilisti, kodi ndi mpaka liti mudzakhale mukudzichekacheka chifukwa cha kulira?

⁶Mukuti, ‘Ha, Chauta lupanga lili m'manja! Kodi adzapumula liti? Aliloŵetse m'chimake, likhale momwemo, lipumule.’

⁷Kodi lupangalo lingapumule bwanji pamene Chauta walipatsa kale ntchito yoti limchitire? Walituma kuti likalimbane ndi Asikeloni, kuti likathire nkhondo anthu a m'mbali mwa nyanja.”