Read Buku Loyera - Chichewa Yer. 5 Bible Online

Yer. 5 - Buku Loyera - Chichewa bible

Yer. 5

¹“Thamangani uku ndi uku m'miseu ya Yerusalemu, mudziwonere nokha. Funafunani ku mabwalo ake ngati mungapezeke munthu, munthu wake wochita zolungama, wofunitsitsa zoona, kuti choncho Yerusalemu ndidzamkhululukire.

²Ngakhale anthu akulumbira m'dzina la Chauta wamoyo, komabe akungolumbira monama.

³Kodi Inu Chauta, suja mumafuna anthu onena zoona? Inu mudaŵakantha anthuwo, koma iwo sadamve kuŵaŵa. Mudaŵatswanya, koma sadafune kutembenuka mtima. Adaumitsa mitima yao ngati mwala, adakana kwamtuwagalu kulapa.”

⁴Apo ndidati, “Ndi amphaŵi chabe aŵa, alibe ndi nzeru zomwe. Iwo sadziŵa njira ya Chauta, sazindikira zimene Mulungu wao akufuna.

⁵Tsono ndidzapita kwa akuluakulu, ndidzalankhula ndi amenewo. Pakuti ndiwo angadziŵe njira ya Chauta, ndi zimene Mulungu wao akufuna.” Koma ndidaona kuti iwowonso adathyola goli la Chauta, adadula nsinga zao.

⁶Nchifukwa chake mkango wam'malunje udzaŵapha, mmbulu wochoka ku thengo udzaŵaononga. Kambuku adzaŵalalira pafupi ndi mizinda yao. Ndipo adzakadzula aliyense wotuluka, poti zolakwa zao nzambiri, abwereratu m'mbuyo kwambiri.

⁷Chauta akuti, “Kodi ndingakukhululukireni bwanji pa zonsezi? Ana anu adandisiya Ine, ndipo adapembedza milungu imene siili milungu konse. Ine ndidaŵapatsa zonse zimene ankasoŵa, komabe adakonda kumachita chigololo, namapita ku nyumba za akazi adama.

⁸Aliyense ankathamangira mkazi wa mnzake, monga amachitira akavalo onenepa akamamemesa.

⁹Ndiye ndingapande kuŵalanga chifukwa cha zimenezi? Monga ndisaulipsire mtundu wochita zotere?

¹⁰Tsono ndidzatuma adani kuti akaononge mizere ya mipesa yao, komabe osati kotheratu. Akasadze nthambi zake, poti anthu ameneŵa si ake a Chauta.

¹¹Anthu a ku Israele ndi a ku Yuda onse akhala osakhulupirika kwa Ine,” akuterotu Chauta.

¹²Anthuwo ankanama ponena za Chauta, ankati, “Mulungu sangatichite kanthu. Choipa sichidzatigwera, sitidzaona nkhondo kapena njala.

¹³Mau a aneneri azikangopita ngati mphepo, ndipo uthenga wao si wa kwa Mulungu. Zimene amanena zidzaŵagwera iwo omwewo.”

¹⁴Nchifukwa chake tsono Chauta, Mulungu Wamphamvuzonse, akuti, “Poti iwowo atero, mau anga ndidzaŵasandutsa moto m'kamwa mwako, anthuwo ndidzaŵasandutsa nkhuni, ndipo motowo udzaŵapserezeratu.”

¹⁵“Iwe Israele, ndikukudzetsera mtundu wa anthu odzakuthira nkhondo, mtundu wake ndi wochokera kutali. Mtundu umenewu ndi wosagonjerapo, mtundu wakalekale, mtundu umene chilankhulo chake iwe suchidziŵa, ndipo zimene akunena, iwe sungazimvetse.

¹⁶Ankhondowo mipaliro yao imapha anthu ambirimbiri, onsewo ndi ngwazi zokhazokha pa nkhondo.

¹⁷Adzakutherani zokolola zanu ndi chakudya chanu. Adzapha ana anu aamuna ndi aakazi, adzakupheraninso nkhosa zanu ndi ng'ombe zanu. Adzaononga mipesa yanu ndi mikuyu yanu. Adzagwetsa mwankhondo mizinda yanu yamalinga imene mumaidalira.

¹⁸“Koma ngakhale pa masiku amenewo sindidzakuwonongani kotheratu.

¹⁹Ndipo mukamafunsana kuti, ‘Chifukwa chiyani Chauta Mulungu wathu watichita zimenezi?’ Iwe Yeremiya uzidzayankha kuti, ‘Monga momwe mudasiyira Chauta, ndi kumatumikira milungu yachilendo m'dziko lanu, momwemonso ndimo m'mene inuyo muzidzatumikira anthu a m'dziko lachilendo.’ ”

²⁰Mulalike kwa ana a Yakobe, mulengeze kwa anthu a ku Yuda kuti,

²¹ “Imvani izi, inu anthu opusa, opanda ndi nzeru zomwe, inu amene maso muli nawo, koma simupenya, amene makutu muli nawo, koma simumva.

²² Ine Chauta ndikuti, Kodi simukuchita nane mantha? Kodi simukunjenjemera pamaso panga? Ndine amene ndidaika mchenga kuti ukhale malire a nyanja, malire amene nyanjayo singaŵabzole. Mafunde ake, ngakhale aŵinduke bwanji, sangathe kupitirirapo. Ngakhale akokome chotani, sangathe kubzola.

²³Koma anthu ameneŵa ndi okanika ndiponso a mtima waupandu. Adapatuka ndipo adapitiratu.

²⁴Sadanenepo m'mitima mwao kuti, ‘Tiyeni tizimvera Chauta Mulungu wathu, amene amatipatsa mvula pa nthaŵi yake, mvula yachizimalupsa ndi yam'masika. Ndipo salephera kutipatsa nthaŵi ya kholola.’ ”

²⁵Koma zolakwa zanu zaletsetsa zonsezi, ndipo machimo anu akumanitsani zokoma.

²⁶Paja mwa anthu anga muli ena achifwamba, amene amalalira anzao monga m'mene amachitira otchera mbalame. Amatcha misampha nakola anthu.

²⁷Nyumba zao nzodzaza ndi chuma chochipeza mwachinyengo, ngati chitatanga chodzaza ndi mbalame. Nchifukwa chake adasanduka otchuka ndi olemera.

²⁸Adanenepa nkukhala a matupi osalala. Ntchito zao zoipa nzopanda malire, saweruza mwachilungamo nkhani ya ana amasiye, kuti iyende bwino, ndipo sateteza amphaŵi.

²⁹Chauta akuti, “Ndiye ndingapande kuŵalanga chifukwa cha zimenezi? Monga ndisaulipsire mtundu wochita zotere?”

³⁰M'dziko muno mwachitika chinthu chododometsa ndi choopsa.

³¹Aneneri akulosa zabodza, ndipo ansembe akuvomerezana nawo. Komabe anthu anga akukondanso zomwezo. Kodi mudzatani potsiriza?