Read Buku Loyera - Chichewa Yer. 6 Bible Online

Yer. 6 - Buku Loyera - Chichewa bible

Yer. 6

¹Inu anthu a ku Benjamini thaŵani, tulukanimo m'Yerusalemu. Lizani lipenga ku Tekowa, kwezani mbendera ku Betehakeremu. Tsoka likudzakugwerani kuchokera kumpoto, ndipotu nchiwonongeko chachikulu.

²Ndidzauwononga mzinda wa Ziyoni, mzinda wooneka bwino ndi wokongola.

³Mafumu adzabwera ndi asilikali ao. Adzamanga zithando momzinga Yerusalemu, ndipo aliyense adzakhazika anthu ake pamalo pake.

⁴Adzanena kuti, “Konzekani kuti muuthire nkhondo mzindawu. Bwerani tiwuthire nkhondo masana ano.” “Koma tili ndi tsoka, dzuŵa lapendeka, zithunzithunzi zakumadzulo zikunka zitalika.”

⁵“Bwerani tsono tiwuthire nkhondo usiku uno, tiwononge malinga ake.”

⁶Mau a Chauta Wamphamvuzonse akuti, “Gwetsani mitengo ya mu Yerusalemu, ndipo mzindawu muumangire nthumbira zankhondo. Mzinda umenewu ndi woyenera kulangidwa, anthu ake amangokhalira kuzunzana.

⁷Monga momwe chitsime chimasungira madzi ake, ndimonso m'mene mzindawo umasungira zoipa zake. Zimene mukumva ndi za chiwonongeko ndi za nkhondo. Ndikuwonamonso matenda ndi zilonda.

⁸Iwe Yerusalemu, tengapo phunziro, kuwopa kuti chikondi changa pa iwe chingathe, ndipo ndingakusandutse dziko lachipululu, dziko lopanda anthu.”

⁹Mau a Chauta Wamphamvuzonse akuti, “Akunkheni ndi kuŵalanda zonse anthu otsala a Aisraele, monga momwe anthu amachitira, populula mphesa ku nthambi zake.”

¹⁰Kodi ndilankhule ndi yani, ndipo ndichenjeze yani, kuti amve? Makutu ao ndi otsekeka, sangathe kumva. Mau a Chauta amaŵanyoza kwambiri, saŵalabadira konse.

¹¹Nchifukwa chake ndadzazidwa ndi mkwiyo wa Chauta, sindingathenso kudzimanga kuti usatulukire kunja. Chauta akuti, “Mkwiyo umenewu ukauthire pa ana oyenda mu mseu, ndi pa achinyamata kumene amasonkhanira. Mwamuna ndi mkazi wake adzatengedwa, ngakhale aimvi ndi okalamba kwambiri.

¹²Nyumba zao zidzapatsidwa kwa ena pamodzi ndi minda yao ndi akazi ao omwe. Ndithuditu, ndi dzanja langali ndidzakantha anthu okhala m'dzikomo.

¹³“Pakuti onse, ang'onoang'ono ndi akuluakulu omwe, ali ndi khwinthi la phindu lopeza mwakuba. Aneneri pamodzi ndi ansembe ao, onsewo ndi onyenga.

¹⁴ Iwo amapoletsa mabala a anthu anga pamwamba pokha. Amangonena kuti, ‘Kuli mtendere, kuli mtendere,’ chonsecho kulibe konse mtendere.

¹⁵Kodi akamachita zonyansa, amachita manyazi ngati? Iyai, sachita manyazi mpang'ono pomwe. Sadziŵa nkugwetsa nkhope komwe. Nchifukwa chake adzagwera pakati pa anzao amene adagwa kale. Adzagweratu pa tsiku limene ndidzaŵalanga!” Akutero Chauta.

¹⁶Mau a Chauta ndi aŵa, “Imani pa mphambano, ndipo mupenye. Mufunse kumene kuli njira zakale ndi kumene kuli njira yabwino. Tsono mutsate njira yabwinoyo, ndipo mudzakhala pa mtendere. Koma inuyo mudati, ‘Sitidzaitsata.’

¹⁷Chauta adakupatsani alonda oti akutsogolereni nati, ‘Imvani kulira kwa lipenga lokuchenjezani.’ Koma inu mudati, ‘Sitidzasamalako.’

¹⁸Nchifukwa chake imvani inu anthu a mitundu ina, penyetsetsani, inu mwasonkhana panonu, zimene zidzaŵagwere anthuwo.

¹⁹Tamvani inu okhala pa dziko lapansi, anthuwo ndidzaŵaononga. Komatu zimenezo nzotsatira za kunyenga kwao, chifukwa sadamvere mau anga ndipo sadamvere malamulo anga.

²⁰Kodi pali phindu lanji kwa Ine, ngakhale abwere ndi lubani kuchokera ku Sheba, kapena zonunkhira zina kuchokera ku maiko akutali? Sindidzalandira zopereka zao zopsereza, nsembe zao sizindikondwetsa.

²¹Nchifukwa chake anthu ameneŵa ndidzaŵaikira zoŵakhumudwitsa. Atate ndi ana ao aamuna, anansi ndi abwenzi ao, onsewo adzaonongeka.”

²²Chauta akunena kuti, “Onani, anthu a mtundu wina akubwera kuchokera ku dziko lakumpoto. Mtundu wa anthu amphamvu wanyamuka kuchokera mbali zakutalitali za dziko lapansi.

²³Atenga mauta ndi mikondo, ndi anthutu ankhalwe ndi opanda chifundo. Phokoso lao lili ngati mkokomo wa nyanja. Akwera pa akavalo, akonzekera ngati munthu wankhondo, akudzamenyana nawe, iwe Ziyoni.”

²⁴A ku Yerusalemu akuti, “Mbiri ya iwowo taimva, m'nkhongono mwati zii. Nkhaŵa yatigwira, ndipo tikumva ululu wonga wa mkazi panthaŵi yake yochira.”

²⁵Musayesere kupita ku minda, kapena kuyenda pa mseu, pakuti adani akubwera ndi nkhondo ndipo ponseponse pali mantha okhaokha.

²⁶Inu anthu anga, valani ziguduli, gubuduzikani pa phulusa. Lirani kwamphamvu, ngati munthu wolira mwana wake mmodzi yekha, pakuti mwadzidzidzi woononga adzabwera kudzakuphani.

²⁷“Iwe Yeremiya, ndakusankha kuti ukhale choyesera zitsulo. Uŵayese anthu anga kuti uwone m'mene aliri makhalidwe ao.

²⁸Onsewo ali ndi upandu wokanika, onsewo ndi akazitape, ndi olimba ngati mkuŵa ndi chitsulo. Onse amangochita zoipa zokhazokha.

²⁹Mvukuto zikuuzira kwambiri, mtovu wasungunuka ndi moto. Koma ntchito yosungunulayo sikupindula, chifukwa choti dothi loipa silikuchokapo.

³⁰Iwo ali ngati siliva wotaya, pakuti Chauta waŵakana.”