Read Buku Loyera - Chichewa Mali. 3 Bible Online

Mali. 3 - Buku Loyera - Chichewa bible

Mali. 3

¹Ine ndine munthu amene ndaona mavuto, ndalangidwa ndi ndodo ya ukali wa Mulungu.

²Adandiyendetsa ndi kubwera nane mu mdima mopanda nkuŵala komwe.

³Zoonadi adandikantha ndi dzanja lake, ankachita zimenezi mobwerezabwereza tsiku lonse.

⁴Adandipweteka m'thupi lonse, ndipo adaphwanya mafupa anga onse.

⁵Adandizinga ndi kundizunguliza ponseponse ndi mazunzo ndi masautso.

⁶Adanditaya m'malo a mdima wabii, kuti ndikhale ngati munthu wofa kalekale.

⁷Adanditsekera m'malinga kuti ndisathaŵe. Adandimanga ndi maunyolo olemera kwambiri.

⁸Ngakhale pamene ndinkafuula ndi kupempha chithandizo, sankalimva pemphero langalo.

⁹Adanditsekera mseu ndi miyala yosema, ndipo adakhotetsa njira zanga.

¹⁰Adandiwukira ngati chimbalangondo kapena ngati mkango wondilalira.

¹¹Adandisiyitsa njira nanding'ambang'amba, kenaka nkundisiya.

¹²Adakoka uta wake nandiyesa chinthu chochitirapo chandamale.

¹³Adalasa mtima wanga ndi mivi ya m'phodo lake.

¹⁴Ndasanduka chinthu chomachiseka, kwa anthu a mitundu ina, amandiimba nyimbo zondinyoza.

¹⁵Chauta adandidyetsa zoŵaŵa, adandimwetsa chivumulo.

¹⁶Adandigulula mano ndi timiyala, adandivimviniza m'phulusa.

¹⁷Mumtima mwanga mulibenso mtendere, chimwemwe ndidachiiŵaliratu.

¹⁸Choncho ndikuti, “Ulemerero wanga wonse watha, chandithera chikhulupiriro cholandira kanthu ka Chauta.”

¹⁹Ndimakumbukira masautso anga ndi kuzunzika kwanga, zili ngati chivumulo ndi ndulu.

²⁰Nthaŵi zonse ndimangozilingalirabe zimenezi, nkuwona ndataya mtima.

²¹Koma pali chinanso chimene ndimachikumbukira, chimenecho ndicho chimandilimbitsa mtima.

²²Chikondi chosasinthika cha Chauta sichitha, chifundo chakenso nchosatha.

²³M'maŵa mulimonse zachifundozo zimaoneka zatsopano, chifukwa Chauta ndi wokhulupirika kwambiri.

²⁴Chauta ndiye zanga zonse motero ndimadalira Iyeyo.

²⁵Chauta ndi wabwino kwa amene amamudalira, kwa onse amene amafuna kuchita zimene Iye afuna.

²⁶Nkwabwino kumdikira Chauta mopirira kuti aonetse chipulumutso chake.

²⁷Nkwabwinonso kuti munthu asenze goli la kupirira pamene iye ali pa unyamata.

²⁸Akhale pansi yekha mkachete, pamene Chauta amsenzetsa golilo.

²⁹Agwetse nkhope yake pa fumbi, mwina chikhulupiriro nkukhalapobe.

³⁰Apereke tsaya lake kwa wofuna kumumenya, apirire zomunyoza zonse.

³¹Ndithudi Ambuye sadzataya atumiki ao mpaka muyaya.

³²Angathe kulanga mwankhalwe, komabe adzaonetsa chifundo, chifukwa chikondi chao nchochuluka.

³³Savutitsa mwadala, sakonda kusautsa munthu aliyense.

³⁴Chauta amadziŵa pamene akulu amapondereza am'ndende am'dziko.

³⁵Amadziŵa pamene olamula amapsinja munthu popanda chilungamo pamaso pa Wopambanazonse.

³⁶Pamene iwo amagamula mlandu mokondera, kodi Ambuye saona zimenezi?

³⁷Ndani angathe kulamula kuti zakutizakuti zichitike, ngati Chauta waletsa zimenezo?

³⁸Paja madalitso ndi matsoka zonse nzochokera kwa Wopambanazonse.

³⁹Munthu wina aliyense wamoyo angadandaulirenji pamene alangidwa chifukwa cha machimo ake?

⁴⁰Tiyeni tiŵaone ndi kuŵayesa makhalidwe athu, ndipo tibwerere kwa Chauta.

⁴¹Tikweze mitima yathu ndi manja athu kwa Mulungu kumwamba.

⁴²Ifeyo tachimwa, ndipo tapanduka, tsono Inu simudakhululuke.

⁴³Mwatipirikitsa muli okwiya, ndipo mwatipha mopanda chifundo.

⁴⁴Mwadzibisa ndi mitambo, kumene mapemphero athu sangathe kufikako.

⁴⁵Mwatisandutsa onyozeka ngati zinyatsi, m'maso mwa anthu a mitundu ina.

⁴⁶Adani athu akutinyodola.

⁴⁷Tagwa m'zoopsa ndi m'mbuna, m'chipasupasu ndi m'chiwonongeko.

⁴⁸M'maso mwanga misozi ikungoti mbwembwembwe, chifukwa anthu anga aonongeka.

⁴⁹Ndidzalira misozi kosalekeza ndiponso osapumulira,

⁵⁰mpaka Chauta adzayang'ane pansi kuchokera kumwamba ndi kuwona mavuto anga.

⁵¹Mtima wanga ukupweteka poona zimene zikuŵachitikira akazi a mumzinda mwanga.

⁵²Amene anali adani anga popanda chifukwa, akhala akundisaka ngati mbalame.

⁵³Adandiponya m'dzenje ndili moyo, nkumandiponya miyala ndili momwemo.

⁵⁴Madzi adaamiza mutu wanga, ine nkunena ku, “Mayo, ndikufa ine!”

⁵⁵Ndidatama dzina lanu mopemba, Inu Chauta, ndili m'dzenje lozamalo.

⁵⁶Inu mudamva mau anga akuti, “Musagonthetse dala makutu anu pamene ndikupemphera kuti mudzandithandize.”

⁵⁷Inu mudasendera pafupi pamene ndinkakutamani mopemba, ndipo mudanena kuti “Usachite mantha.”

⁵⁸Inu Chauta, mudandithandiza pa mlandu wanga, ndipo mudaombola moyo wanga.

⁵⁹Inu Chauta, mudaona zoipa zimene anthu adandichita, tsono muweruze ndinu pamenepo.

⁶⁰Mudaona m'mene ankandilipsirira, mudaonanso ziwembu zimene adandichita.

⁶¹Inu Chauta mudamva kunyoza kwao koopsa ndiponso ziwembu zimene ankakonzekera kuti andichite.

⁶²Mudamva manong'onong'ono ao, ndi m'mene adani anga ankandinenera tsiku lonse.

⁶³Onani m'mene akundinyozera, m'maŵa ndi madzulo akungokhalira kundiimba nyimbo.

⁶⁴Inu Chauta, muŵalange potsata zolakwa zao, potsata ntchito zimene adachita.

⁶⁵Muŵazamitse mtima muŵatemberere basi.

⁶⁶Inu Chauta, muŵapirikitse mwaukali, muŵaonongeretu pa dziko lapansi.