Read Buku Loyera - Chichewa Mali. 4 Bible Online

Mali. 4 - Buku Loyera - Chichewa bible

Mali. 4

¹Ha! Golide wathu tsopano wathimbirira kwambiri. Golide wathu wosalala uja wasinthika kotheratu. Miyala ya ku malo oyera yamwazikana, ili vuu, ku mphambano zonse za miseu.

²Onani ana okondedwa a m'Ziyoni amene kale anali ngati golide kwa ife, tsopano akuŵayesa mbiya zadothi zimene woumba amachita kuumba ndi manja ake.

³Ngakhale nkhandwe siziwumira bere, zimayamwitsa ana. Koma anthu anga ndi ankhalwe, ali ngati nthiŵatiŵa zakunkhalango.

⁴Lilime la mwana wakhanda limakangamira kukhosi chifukwa cha ludzu. Ana aang'ono amafuna chakudya, koma palibe woŵapatsa mpang'ono pomwe.

⁵Amene ankadya zokoma akuthera m'miseu. Amene ankavala zokongola zokhazokha tsopano ali gone pa dzala.

⁶Chilango cha anthu anga nchachikulu kwambiri kupambana chilango cha anthu a ku Sodomu, amene adalangidwa pa kamphindi chabe, ndipo panalibe wochitapo kanthu kuti aŵathandize.

⁷Akalonga ake anali oŵala koposa chisanu chambee, oyera kuposa mkaka. Matupi ao anali ofiira kupambana miyala ya rubi. Anali ndi maonekedwe okongola ngati miyala ya safiro.

⁸Koma tsopano nkhope zao zasanduka zakuda ngati mwaye. Palibe amene akuŵazindikira m'miseu. Khungu lao lachita makwinyamakwinya, langoti gwa ngati mtengo.

⁹Amene adaphedwa pa nkhondo anali amwai kwambiri kupambana amene adafa ndi njala. Ameneŵa ankafooka pang'onopang'ono mpaka kutsirizika, chifukwa chosoŵa chakudya.

¹⁰Ngakhale akazi achifundo ndi manja ao omwe adafika pophika ana ao. Ana aowo adasanduka chakudya chao pa nthaŵi imene anthu anga adaonongedwa.

¹¹Chauta adakwiya kwambiri, nagwetsa pansi mkwiyo wake wamotowo. Adayatsa moto ku Ziyoni ndipo motowo udaononga maziko a mzindawo.

¹²Mafumu a pa dziko lapansi sadakhulupirire, kapena wina aliyense wokhala pa dziko lapansi, kuti adani kapena ankhondo nkuloŵa pa zipata za Yerusalemu.

¹³Zimenezi zidachitika chifukwa cha machimo a aneneri ake ndi ntchito zoipa za ansembe ake, amene ankakhetsa magazi a anthu osalakwa m'malinga amumzindamu.

¹⁴Ankangoyendayenda m'miseu ngati akhungu, zovala zao zili magazi psu, mwakuti palibe munthu woti nkuzikhudza.

¹⁵Anthu ankaŵafuulira kuti, “Chokani, inu anthu oipitsidwa. Chokani! Chokani apa! Musakhudzane ndi ife!” Motero adathaŵa, namangoyendayenda, anthu a mitundu ina ankati, “Asadzakhalenso ndi ife.”

¹⁶Chauta mwiniwake ndiye adaŵamwaza, salabadakonso za iwo. Ansembe sadaŵalemekezenso. Akuluakulu sadaŵamvere chifundo.

¹⁷Maso athu adatopa nkuyang'anira chithandizo, koma popanda phindu. Tidadikiradikira mtundu wina wa anthu amene sangathe kutipulumutsa.

¹⁸Anthu ankangotilondola nthaŵi zonse, kotero kuti sitinkathanso kuyenda m'miseu yathu. Masiku athu ankacheperachepera, imfa yathu idaayandikira, ndithu chimalizo chinali chitafika.

¹⁹Anthu otilondolawo anali aliŵiro kupambana adembo ouluka mu mlengalenga. Adatipirikitsa ku mapiri, adatilalira ku chipululu kuti atiphe.

²⁰Wodzozedwa wa Chauta uja, amene anali ngati mpweya wotipatsa moyo, adakodwa m'misampha mwao. Iyeyo amene tinkati adzatithandiza ife okhala pakati pa anthu a mitundu ina.

²¹Kondwerani ndipo musangalale, inu anthu a ku Edomu, inu anthu okhala m'dziko la Uzi. Inunso chikho cha mavuto chidzakufikirani pa nthaŵi yanu. Mudzaledzera mpaka kuvula zovala.

²²Chilango cha machimo anu, inu anthu a ku Ziyoni, chatheratu, Chauta satalikitsa ukapolo wanu. Koma inu anthu a ku Edomu, Chauta adzakulangani chifukwa cha machimo anu. Zolakwa zanu adzaziwulula poyera.