Read Buku Loyera - Chichewa Mali. 5 Bible Online

Mali. 5 - Buku Loyera - Chichewa bible

Mali. 5

¹Inu Chauta, kumbukirani zimene zatigwera. Muyang'ane, muwone m'mene anthu akutinyozera.

²Choloŵa chathu chaperekedwa kwa alendo, nyumba zathu zili m'manja mwa anthu akudza.

³Ife tili ngati ana amasiye, opanda bambo wao. Amai athu ali ngati akazi amasiye.

⁴Madzi amene timamwaŵa tiyenera kuchita chogula. Nkhuni zosonkhera moto nzoyeneranso kuchita chogula.

⁵Amatikankha mwankhanza, goli lili m'khosi mwathu. Ngakhale titope, satilola kupumula.

⁶Tidachita chibwenzi ndi Aejipito ndiponso ndi Aasiriya, kuti mwina iwo nkutipatsako chakudya.

⁷Makolo athu adachimwa, ndipo adatha. Ndiye ife tatengana nacho chilango chifukwa cha machimo ao.

⁸Amene akutilamulira ndi akapolo, palibe ndi mmodzi yemwe wotipulumutsa m'manja mwao.

⁹Pofunafuna chakudya, timagwa m'zoopsa chifukwa cha anthu opha anzao ku chipululu.

¹⁰Khungu lathu likutentha ngati lili m'ng'anjo chifukwa cha ululu wa njala.

¹¹Ku Ziyoni akazi akuŵachita zadama mwakhakhamizo. M'mizinda ina ya ku Yuda anamwali akuŵachita chimodzimodzi.

¹²Akalonga akuŵapachika pomangirira manja ao, akuluakulu sakuŵalemekeza konse.

¹³Achinyamata akuŵakakamiza kupera tirigu, anyamata akudzandira nayo mitolo ya nkhuni.

¹⁴Akuluakulu adachokapo pa bwalo la mzinda, achinyamata nyimbo zao zija zati zi!

¹⁵Chimwemwe chachoka m'mitima mwathu. Kuvina kwathu kwasanduka kulira.

¹⁶Chisoti chathu chaufumu chachoka kumutu, kugwa pansi. Tsoka kwa ife, chifukwa tachimwa.

¹⁷Nchifukwa chake mitima yathu yalefuka, chifukwa cha zimenezi m'masomu mwachita chidima.

¹⁸Phiri la Ziyoni lasanduka bwinja, nkhandwe zikungoyendayendapo.

¹⁹Koma Inu Chauta, ndinu mfumu mpaka muyaya, mpando wanu waufumu udzakhalapo pa mibadwo yonse.

²⁰Chifukwa chiyani mwakhala mukutiiŵala nthaŵi yonse? Chifukwa chiyani mwatisiya nthaŵi yaitali chotere?

²¹Inu Chauta mutitembenuzire kwa Inu, kuti tibwerere mwakale. Mutipatsenso masiku onga amakedzana aja.

²²Kaya, monga nkuti mwatitayiratu? Monga nkuti mwatikwiyira kopitirira?