Read Buku Loyera - Chichewa Bar. 1 Bible Online

Bar. 1 - Buku Loyera - Chichewa bible

Bar. 1

¹Buku lino adalemba ndi Baruki mwana wa Neriya, mwana wa Masea, mwana wa Zedekiya, mwana wa Hasadiya, mwana wa Hilikiya. Adalilembera ku Babiloni,

²chaka chachisanu, tsiku lachisanu ndi chiŵiri la mwezi[1], nthaŵi imene Ababiloni adalanda mzinda wa Yerusalemu ndi kuutentha.

³Baruki adaŵerenga mau a m'bukulo pamaso pa Yekoniya mwana wa Yowakimu, mfumu ya Ayuda, pamaso pa anthu onse amene adadza kudzamva za m'bukulo.

⁴Adaŵaŵerenga pamaso pa akalonga ndi akazembe a banja la mfumu, akuluakulu, anthu otchuka, ndiponso ngakhale anthu wamba ndi anthu onse okhala ku Babiloni, pafupi ndi mtsinje wa Sudi.

⁵Atamva mauwo, anthu adalira, nasala zakudya, ndipo adapemphera kwa Ambuye.

⁶Adasonkhanitsa ndalama monga momwe aliyense ankathera,

⁷ndi kuzitumiza ku Yerusalemu kwa Yowakimu, mkulu wa ansembe, mwana wa Hilikiya, mwana wa Salumu, ndi kwa ansembe ndi kwa anthu onse amene anali nawo ku Yerusalemu.

⁸Nthaŵi imeneyi, tsiku lakhumi la mwezi wa Sivani, Baruki adatenga ziŵiya za ku Nyumba ya Ambuye, zimene zidaachotsedwa ku Nyumba ya Mulungu, kuti azibwezere ku dziko la Yuda. Zimenezi zinali ziŵiya zasiliva zimene adaazipangitsa Zedekiya, mwana wa Yosiya, mfumu ya ku Yuda.

⁹Nthaŵiyo nkuti Nebukadinezara, mfumu ya ku Babiloni, atachotsa Yekoniya ku Yerusalemu, pamodzi ndi akuluakulu a m'nyumba mwake, anthu ogwidwa pa nkhondo, akalonga ndiponso anthu wamba. Onsewo adaatengedwa kupita ku Babiloni.

¹⁰Anthuwo adanena kuti, “Tikukutumizirani ndalama zoti mugulire nyama zoperekera nsembe zootcha ndiponso nsembe zopepesera machimo. Zina mugulire lubani. Mukonzenso nsembe zatirigu ndi kuzipereka pa guwa la Ambuye Mulungu wathu.

¹¹Mupempherere Nebukadinezara, mfumu ya ku Babiloni ndiponso Belisazara mwana wake, kuti masiku ao pansi pano achuluke ngati akumwamba.

¹²Choncho Ambuye adzatipatsa mphamvu ndi kutiwunikira njira. Ndipo Nebukadinezara, mfumu ya ku Babiloni, ndi Belisazara mwana wake, adzatitchinjiriza. Tidzaŵatumikira pa nthaŵi yaitali ndipo adzatikomera mtima.

¹³Ifenso mutipempherere kwa Ambuye, Mulungu wathu, chifukwa tidaŵachimwira. Ndipo mpaka lero lino, Ambuye sanalekebe kutikwiyira ndi kutisungira ukali.

¹⁴“Chonde liŵerengeni buku limene tikukutumiziranili, ndipo mulape machimo anu m'Nyumba ya Ambuye pa masiku a chikondwerero cha mahema ndi masiku ena opembedza.”

¹⁵Munene kuti, “Ambuye Mulungu wathu, ngolungama. Koma ife lero manyazi atigwira. Atigwira tonsefe anthu a ku Yuda, mbadwa za ku Yerusalemu.

¹⁶Agwira mafumu athu ndi akalonga athu, ansembe athu, aneneri athu ndiponso makolo athu.

¹⁷Zatero chifukwa tonsefe tachimwira Ambuye,

¹⁸ndipo sitidaŵamvere. Sitidamvere Ambuye Mulungu wathu, sitidatsate malamulo amene Iwo adatipatsa.

¹⁹Kuyambira tsiku limene Ambuye adatulutsa makolo athu m'dziko la Ejipito mpaka lero lino, sitidamvere Ambuye Mulungu wathu ndipo sitidasamale mau ao.

²⁰Nchifukwa chake mpaka lero mavuto ndi matemberero akhala akutigwera, monga momwe Ambuye adaanenera kudzera mwa Mose mtumiki wao, tsiku limene adatulutsa makolo athu ku Ejipito, kuti atipatse dziko lamwanaalirenji.

²¹Zoonadi, tidakana kutsata mau a Ambuye Mulungu wathu, amene adalankhula kudzera mwa aneneri amene adaŵatuma kwa ife.

²²Koma aliyense adatsata zofuna za mtima wake woipa, pakutumikira milungu ina, ndi kuchita zoipa pamaso pa Ambuye Mulungu wathu.