Read Buku Loyera - Chichewa Bar. 2 Bible Online

Bar. 2 - Buku Loyera - Chichewa bible

Bar. 2

¹“Nchifukwa chake Ambuye Mulungu wathu achitadi zimene adaaneneratu, zakuti adzatilanga ifeyo ndi aweruzi athu a ku Israele, ndi mafumu athu ndi akalonga athu, ndiponso anthu a ku Israele ndi a ku Yuda.

²Zimene Iye adazichita ku Yerusalemu monga zidalembedwera m'malamulo a Mose, zinthu zotere sizidachitikepo pansi pano.

³Zinali zakuti tizizunzika mpaka kudya mnofu wa ana athu, wina mwana wake wamwamuna, wina mwana wake wamkazi.

⁴Ambuye adaŵasandutsa akapolo a mafumu onse otizungulira. Dziko lathu adalisandutsa chipululu, ndipo dzina lathu lidasanduka lonyozeka pakati pa mitundu yonse ya anthu kumene adatibalalitsa.

⁵Choncho tidasanduka akapolo m'malo mokhala aufulu, chifukwa tidaachimwira Ambuye Mulungu wathu pakusamvera mau ao.

⁶“Ambuye Mulungu wathu ngolungama, koma tsopano manyazi atigwira ifeyo pamodzi ndi makolo athu.

⁷Zoopsa zonse zimene Ambuye adatichenjeza, zatigweradi lero.

⁸Komabe sitidapemphe konse kukoma mtima kwa Ambuye pakusiya maganizo oipa a m'mitima mwathu.

⁹Nchifukwa chake Ambuye adatisungira zoopsazo nazigwetsa pa ife, popeza kuti Iwo ngolungama pa ntchito zonse zimene adatilamula.

¹⁰Komabe ife sitidamvere mau ao kapena kutsata malamulo amene adatipatsa.

¹¹“Inu Ambuye, Mulungu wa Israele, mudatulutsa anthu anu ku dziko la Ejipito ndi dzanja lanu lamphamvu, ndi zozizwitsa ndiponso zodabwitsa, ndi mphamvu yaikulu ndiponso dzanja lotambalitsa, ndipo mudamveketsa dzina lanu mpaka lero lino.

¹²Koma ife tidachimwa, tidachita zoipa ndi zosalungama posatsata konse malamulo anu, Inu Ambuye Mulungu wathu.

¹³Mutichotsere mkwiyo wanu, popeza kuti tangotsala oŵerengeka pakati pa mitundu ya anthu kumene mudatibalalitsa.

¹⁴Ambuye, imvani pemphero lathu ndi kupemba kwathu. Mutipulumutse kuti dzina lanu lisanyozedwe, ndipo mutikomere mtima pamaso pa onse amene adatitenga kupita nafe ku ukapolo,

¹⁵Choncho anthu onse a pa dziko lapansi adzadziŵa kuti Inu ndinu Ambuye Mulungu wathu, popeza kuti Aisraele ndi zidzukulu zao amatchulidwa dzina lanu.

¹⁶“Inu Ambuye, yang'anani pansi kuchokera ku nyumba yanu yoyera, ndipo mutikumbukire. Tcherani khutu Ambuye ndipo mumvetsere.

¹⁷Phenyulani maso Ambuye ndipo muwone. Akufa amene ali m'manda, amene mpweya udachotsedwa m'thupi mwao, sangathe kukubwezerani ulemu kapena kuyamikira chilungamo chanu.

¹⁸Koma munthu wamoyo, amene akumva chisoni mumtima mwake, amene akuyenda choŵerama ali wolefuka, amene maso ake sakupenyanso bwino ndipo akumva njala, ameneyo ndiye amene angathe kukubwezerani ulemu ndi kuyamikira chilungamo chanu, Inu Ambuye.

¹⁹“Ambuye Mulungu wathu, tikupempha chifundo chanu, koma osati chifukwa cha ntchito zolungama za makolo athu ndi za mafumu athu.

²⁰Inu mudatiwonetsa mkwiyo wanu ndi ukali wanu, monga momwe mudaatichenjezera kudzera mwa atumiki anu, aneneri aja. Iwo ankatiwuza kuti,

²¹‘Ambuye akuti, Ŵeramitsani mapewa anu, gonjerani mfumu ya ku Babiloni ndi kuitumikira, ndipo mudzakhala m'dziko limene ndidaapatsa makolo anu.

²²Koma mukapanda kumvera Ambuye ndi kutumikira mfumu ya ku Babiloniyo,

²³ndidzathetsa mfuu wachimwemwe ndi wachisangalalo wa mkwati wamkazi ndi wamwamuna ku mizinda ya ku Yuda ndiponso ku dera lozungulira Yerusalemu. Motero dziko lonse lidzasanduka chipululu, mosakhalanso anthu.’

²⁴“Koma ife sitidamvere mau anu kapena kutumikira mfumu ya ku Babiloni. Tsono mudachitadi zimene mudatichenjeza kudzera mwa atumiki anu aneneri, zakuti mafupa a mafumu athu ndi a makolo athu adzaŵatulutsa m'manda mwao.

²⁵Adaŵaikadi pa dzuŵa masana, ndipo pa chisanu usiku. Iwowo adafa imfa yoopsa ndi njala, lupanga ndiponso mliri.

²⁶Tsono Nyumba imene inkatchulidwa dzina lanu, yasanduka monga m'mene ikuwonekeramu, chifukwa cha zolakwa za fuko la Israele ndi la Yuda.

²⁷“Komabe Inu Ambuye Mulungu wathu, mudatimvera chisoni ndi kutichitira chifundo.

²⁸Mudachita monga momwe mudalengezera kudzera mwa Mose, mtumiki wanu, tsiku limene mudamlamula kulemba Malamulo anu pamaso pa ana a Israele. Paja mudanena kuti,

²⁹‘Mukapanda kumvera mau anga, gulu lalikulu la anthuli ndidzalichepetsa kwabasi pakati pa mitundu ya anthu kumene ndidzaŵabalalitsa.

³⁰Ndikudziŵa kuti anthu ameneŵa sadzandimvera, chifukwa ngokanika. Koma kudziko kumene adzapite nawo atatengedwa ukapolo, adzadzidzimuka.

³¹Pamenepo adzadziŵa kuti Ine ndine Ambuye Mulungu wao. Tsono ndidzaŵapatsa mtima womvetsa zinthu ndi makutu omvera zinthu.

³²Motero adzanditamanda kudziko kumene adzapite nawo atatengedwa ukapolo, ndipo adzakumbukira dzina langa.

³³Kukanika kwao kudzatha, adzasiya ntchito zao zoipa, chifukwa azidzakumbukira zimene zidagwera makolo ao pamene adachimwira Ambuye.

³⁴Choncho ndidzaŵabwezeranso ku dziko limene ndidaalonjeza kuti ndidzapatsa makolo ao Abrahamu, Isaki ndi Yakobe, ndipo azidzalilamulira. Ndidzaŵachulukitsa, sadzakhalanso ochepa.

³⁵Ndidzapangana nawo chipangano chosatha, chakuti Ine ndidzakhala Mulungu wao ndipo iwo adzakhala anthu anga. Sindidzaŵachotsanso anthu anga Aisraele ku dziko limene ndidaŵapatsa.’