Read Buku Loyera - Chichewa Bar. 3 Bible Online

Bar. 3 - Buku Loyera - Chichewa bible

Bar. 3

¹“Inu Ambuye amphamvuzonse, Mulungu wa Israele, mtima wathu woda nkhaŵa ndi wolefuka ukulira kwa Inu.

²Imvani Ambuye, ndipo chitani chifundo, chifukwa tidakuchimwirani.

³Inu ndinu Mfumu mpaka muyaya, koma ife timafa nkuchokeratu chonse.

⁴Ambuye amphamvuzonse, Mulungu wa Israele, imvani pemphero la anthu akufafe a fuko la Israele ndi la ana ao a anthu aja amene adakuchimwirani. Zoonadi sitidamvere mau a Ambuye Mulungu wathu, ndipo masoka akanirira pa ife.

⁵Musakumbukirenso zoipa za makolo athu, koma mukumbukire mphamvu zanu ndi dzina lanu.

⁶Pajatu Inu ndinudi Ambuye Mulungu wathu, ndipo ife tidzakutamandani Ambuye.

⁷M'mitima mwathu Inu mudaikamo mantha oopa Inu, kuti tizilemekeza dzina lanu. Tsono tidzakutamandani m'dziko lino la ukapolo wathu, chifukwa takaniratu m'mitima mwathu zoipa zonga zija zimene makolo athu adakuchitirani.

⁸Tsopano tikupezeka ku dziko lino laukapolo kumene mudatibalalitsa, kumene amatinyoza ndi kutitemberera. Zimenezo zatigwera chifukwa cha machimo a makolo athu amene adasiyana nanu, Inu Ambuye Mulungu wathu.”

⁹Iwe Israele, imva malamulo opatsa moyo. Tchera khutu kuti udziŵe nzeru.

¹⁰Zakhala bwanji, iwe Israele, zakhala bwanji kuti ukupezeka m'dziko la adani, ndipo kuti wayamba kukalamba m'dziko lachilendo? Zakhala bwanji kuti uli woipitsidwa pakati pa anthu akufa?

¹¹Chifukwa chiyani wasanduka mnzao wa anthu akumanda?

¹²Iwetu udasiya kasupe wa nzeru.

¹³Ukadatsata njira ya Mulungu, bwenzi uli mu mtendere nthaŵi zonse.

¹⁴Phunzira kumene kuli luntha, kumene kuli mphamvu, kumene kuli nzeru zomvetsa zinthu. Pamenepo udzazindikira kumene kuli moyo weniweni wa zaka zambiri, kumene kuli kuyera kokuunikira, ndiponso kumene kuli mtendere.

¹⁵Ndani adapeza malo ake kumene kumakhala nzeru? Ndani adaloŵa m'nyumba yosungiramo chuma chake?

¹⁶Nanga ali kuti akalonga a mitundu ya anthu, ali kuti anthu olamulira ndi zilombo za pansi pano zomwe?

¹⁷Ali kuti anthu osaka mbalame zamumlengalenga? Ali kuti anthu odziwunjikira siliva ndi golide zimene anthu ena amazidalira, koma osakhutitsidwa?

¹⁸Ali kuti amisiri oyesayesa kupata siliva mtima uli phaphapha, amene ntchito yaoyo ndi yakalavulagaga?

¹⁹Onsewo adazimirira, adatsikira ku manda, ndipo ena adaloŵa m'malo mwao.

²⁰Achinyamata aona kuŵala kwa dzuŵa ndipo akhazikika pansi pano. Koma nawonso sadadziŵe njira ya nzeru, sadamvetse njira zake, nzeruzo sadazipeze.

²¹Ana ao ndiye adachita kuzilambalala kutali nzeruzo.

²²Nzeru zimenezi ku Kanani sizidamveke konse, ndipo ku Temani sizidaonekeko.

²³Ana a Hagara ofunafuna nzeru m'dziko lapansi, amalonda a ku Merani ndi a ku Temani, anthu ofalitsa nkhani ndi anthu ofuna kudziŵa zinthu, onsewo sadatulukire kapezedwe kake ka nzeru, sadaganizeko za njira zake.

²⁴Iwe Israele, taonatu kukula kwake nyumba ya Mulunguyi! Taonatu kukula kwake dziko lakeli!

²⁵Ndi lalikuludi ndi lopanda malire, ndi lalitali ndi losatheka kuliyesa.

²⁶Kumeneko nkumene kudabadwira ziphona, zija zinkatchuka kalezi, za misinkhu italiitali ndiponso zaukatswiri pa nkhondo.

²⁷Tsonotu Mulungu sadasankhule ziphonazo, sadaziphunzitse njira ya nzeru.

²⁸Motero zidaonongeka chifukwa zinalibe nzeru, zidatha chifukwa cha kupusa kwao.

²⁹Ndani adapitako kumwamba, nakazigwira nzeruzo nkuzikokera pansi pano kuchokera ku mitambo?

³⁰Ndani adaoloka nyanja nakazipeza, nkubwera nazo atazigula ndi golide weniweni?

³¹Iyai, palibe munthu wodziŵa njira yozipezera, kapena njira yokafikira ku nzeruzo.

³²Koma Iye amene amadziŵa zonse, amadziŵadi nzeru. Adazipeza chifukwa cha kumvetsa bwino zinthu. Ndiye amene adakonza dziko lapansi kuti likhalepo mpaka muyaya, nalidzaza ndi nyama zamitundumitundu.

³³Amatuma kuŵala, ndipo kumapitadi. Amakuitana kuŵalako, ndipo kumamvera mau ake monjenjemera.

³⁴Nyenyezi zimaŵala pamalo pamene adaziikapo, ndipo zimasangalala.

³⁵Iye akaziitana, izo zimayankha kuti, “Tili pano!” Ndipo zimaŵala mosangalala, kuŵalira amene adazilenga.

³⁶Ameneyu ndiye Mulungu wathu, palibe wina wofanafana naye.

³⁷Iye adatulukira njira zonse zofikira ku nzeru, nzeruzo adazipatsa Yakobe mtumiki wake, adazipatsa Israele wokondedwa wake.

³⁸Pambuyo pake nzeruzo zidadzaoneka pansi pano, nkudzakhazikika pakati pa anthu.