Read Buku Loyera - Chichewa Bar. 4 Bible Online

Bar. 4 - Buku Loyera - Chichewa bible

Bar. 4

¹Nzeru ndiye buku la Malamulo a Mulungu. Malamulo ake odzakhala mpaka muyaya. Onse ozigwiritsa nzeruzo, amakhala ndi moyo, koma olekana nazo amafa.

²Bwerera Yakobe, udzalandire nzeru, yenda molondola kuŵala kwa kuyera kwake.

³Ulemerero wako usapatse munthu wina, madalitso ako usaŵapereke kwa anthu achilendo.

⁴Inu Aisraele, ifetu ndife odala, chifukwa timadziŵa zokomera Mulungu.

⁵Limbani mtima, anthu anga, inu amene mumamveketsa dzina la Israele.

⁶Adakugulitsani kwa anthu akunja, koma osati kuti muwonongekeretu. Mudakwiyitsa Mulungu, nkuwona adakuperekani kwa adani anu.

⁷Mudamputadi Mlengi wanu popereka nsembe ku mafano, m'malo mozipereka kwa Mulungu.

⁸Mudaiŵala Mulungu wamuyaya amene adakulerani. Mudamvetsa chisoni Yerusalemu amene anali ngati mai wanu.

⁹Iye adaona ukali wa Mulungu ukukugwerani, ndipo adati, “Mvetserani, inu anthu okhala pafupi ndi Ziyoni, Mulungu wanditumizira mavuto aakulu.

¹⁰“Ndidaonerera ana anga aamuna ndi aakazi akutengedwa kupita nawo kuukapolo kumene Mulungu wamuyaya adaŵatumiza.

¹¹Ndinkaŵalera ndi chimwemwe, koma poŵaona akutengedwa ukapolo, ndidamva chisoni ndi kulira misozi.

¹²Ndiye wina aliyense asakondwerere mavuto angaŵa, pamene tsopano ndili wamasiye, ndipo ana anga ambiri adandisiya. Ndidakhala choncho ndekhandekha chifukwa cha machimo a ana angawo, popeza kuti iwowo adasiya malamulo a Mulungu.

¹³Sadalabadeko nkomwe za malamulo ake, sadatsate konse njira za malamulo ake, sadalole kuti Mulungu aŵaongolere m'njira ya chilungamo.

¹⁴“Tsono bwerani kuno, inu anthu okhala pafupi ndi Ziyoni! Kumbukirani ukapolo wa ana anga aamuna ndi aakazi ku dziko lachilendo kumene Mulungu wamuyaya adaŵatumizako moŵalanga.

¹⁵Paja Mulungu adaŵadzetsera mtundu wa anthu akutali, kuti udzaŵathire nkhondo, mtundu wopanda manyazi, wolankhula chilankhulo chosadziŵika, mtundu wosalemekeza anthu okalamba, mtundu wosamvera chifundo ndi ana omwe.

¹⁶Anthu a mtundu umenewu adatenga ana aamuna okondedwa a mai wamasiye, adalanda ana aakazi a mai wotsala yekha, kumusiya nalira.

¹⁷“Nanga ine ndingakuthandizeni bwanji?

¹⁸Pajatu amene adakugwetserani mavuto ameneŵa ndi iyeyo amene angakupulumutseni kwa adani anu.

¹⁹Pitani ana anga, inde pitani! Ine ndatsala ndekha.

²⁰Ndavula mkanjo wa masiku amtendere, ndavala chiguduli chamaliro. Ndidzalira kwa Mulungu wanga wamuyaya pa moyo wanga wonse.

²¹“Limbani mtima, ana anga, pempherani kwa Mulungu. Iye adzakupulumutsani ku mavuto ndiponso kwa adani anu.

²²Inetu ndikukhulupirira kuti Mulungu wamuyaya adzakupulumutsani. Woyera uja wandisangalatsa chifukwa cha chifundo chimene chidzakufikireni posachedwapa kuchokera kwa Mpulumutsi wanu wamuyaya.

²³Ndidakuwonererani mukupita kutali muli ndi chisoni mu mtima ndi misozi m'maso. Koma Mulungu adzakubwezaninso kwa ine muli ndi chimwemwe ndi chisangalalo, kuti mukhale nane mpaka muyaya.

²⁴Anthu okhala pafupi ndi Ziyoni amene adakuwonani mukutengedwa ukapolo, posachedwa adzaona Mulungu akukupulumutsani. Chipulumutsocho chidzakufikirani ndi ulemerero waukulu ndiponso ndi ukulu wodabwitsa wa Mulungu wamuyaya.

²⁵Ana anga, pirirani mosaŵinya mkwiyo wa Mulungu umene udakugwerani. Adani anu adakusautsani, koma posachedwa mudzaŵaona akuwonongeka, mudzaŵaponda pa khosi ndi mapazi anu.

²⁶Ana anga okondedwa adayenda m'njira zokhakhala, ndipo adaŵatenga ngati gulu la zoŵeta zimene mdani wazifunkha.

²⁷“Limbani mtima, ana anga, pempherani kwa Mulungu, chifukwa amene adakulangani chotereyo, yemweyonso adzakukumbukirani.

²⁸Monga mwa kufuna kwanu mudasiyana ndi Mulungu, momwemonso mutembenukire kwa Iye, mumufunefune ndi mtima wanu wonse.

²⁹Pakuti monga momwe Iye adakugwetserani m'mavuto, momwemonso adzakupulumutsani, ndipo mudzakhala osangalala mpaka muyaya.”

³⁰Limba mtima, iwe Yerusalemu. Amene adakutcha dzina uja, yemweyonso adzakusangalatsa.

³¹Anthu amene adakuchita zoipa, nkukondwerera kuwonongeka kwako, adzapeza mavuto.

³²Kumizinda kumene ana ako adakazunzikirako ukapolo, kudzaoneka mavuto. Mavutonso adzagwera mzinda umene udalandira ana ako ngati akaidi.

³³Pakuti monga momwe mzindawo udakondwerera kugwa kwako, nkusangalala chifukwa cha kuwonongeka kwako, momwemonso mzindawo udzavutika pamene uwo womwewo udzapasuka.

³⁴Ndidzauchotsera chimwemwe chonyadira kuchuluka kwa anthu ake, chikondwerero chake chidzasanduka maliro.

³⁵Moto wochokera kwa Mulungu wamuyaya udzatentha mzindawo pa masiku ambiri, ndipo kumeneko kudzakhala ademoni pa nthaŵi yaitali.

³⁶Yang'ana kuvuma, iwe Yerusalemu, ona chimwemwe chimene Mulungu akukutumizira.

³⁷Ona alikudza ana ako, amene udaŵaonerera akupita ku dziko lachilendo. Alikudzadi, Woyera uja ataŵasonkhanitsa kuchokera kuvuma mpaka kuzambwe, akukondwerera ulemerero wa Mulungu.