Read Buku Loyera - Chichewa Bar. 5 Bible Online

Bar. 5 - Buku Loyera - Chichewa bible

Bar. 5

¹Iwe Yerusalemu, vula chovala chako chamaliro ndi chachisoni. Uvale mpaka muyaya zovala za ulemerero wa Mulungu.

²Funda mwinjiro wachilungamo wochokera kwa Mulungu. Vala chisoti cha ulemerero wa Mulungu wamuyaya.

³Chifukwa Mulungu akufuna kuŵonetsa ulemerero wako kwa onse okhala pansi pa thambo lakumwamba.

⁴Mulungu adzakutcha dzina limene mpaka muyaya lidzakhala “Mtendere wa chilungamo,” ndipo “Ulemerero wa chipembedzo.”

⁵Dzuka, iwe Yerusalemu, imirira pamtundapo, uyang'ane kuvuma. Ona ana ako amene Woyera uja waŵasonkhanitsa kuyambira kuvuma mpaka kuzambwe. Akukondwa pakuti Mulungu waŵakumbukira.

⁶Adakusiya akuyenda pansi, adani ao ataŵatenga. Koma Mulungu adzaŵabwezanso kwa iwe, ataŵanyamula mwaulemerero ngati ana a ku nyumba ya mfumu.

⁷Pajatu Mulungu adalamula kuti mapiri aatali ndi zitunda zosatha azichepetse, ndiponso kuti zigwa azifotsere kuti mbali zonse zilingane. Motero Aisraele adzayenda mwamtendere mu ulemerero wa Mulungu.

⁸Potsata lamulo la Mulungu nkhalango ndi mitengo yonse ya fungo labwino zidzaŵakonzera mthunzi Aisraele.

⁹Zoonadi Mulungu adzatsogolera Aisraele mwachimwemwe ndi kuŵala kwa ulemerero wake, ndiponso ndi chifundo ndi chilungamo chake.