Read Buku Loyera - Chichewa Bar. 6 Bible Online

Bar. 6 - Buku Loyera - Chichewa bible

Bar. 6

¹Yeremiya adaatumiza kalata kwa anthu amene mfumu ya Ababiloni inali pafupi kuŵatenga ukapolo kunka nawo ku Babiloni. M'kalatamo munali uthenga umene Mulungu adaalamula Yeremiya kuti aŵauze anthuwo. Kalatayo inali yotere:

²“Inu mudamchimwira Mulungu. Nchifukwa chake Nebukadinezara, mfumu ya ku Babiloni, ali pafupi kukutengani ukapolo kunka nanu ku Babiloni. Ndiyetu mukakafika ku Babiloniko, mukakhalako zaka zambiri mpaka kukwanitsa mibadwo isanu ndi iŵiri. Koma pambuyo pake ndidzakubwezerani kwanu mwamtendere.

³Tsono ku Babiloni mudzaona milungu yopangidwa ndi siliva, golide ndi mitengo. Milunguyo amaisenza pa mapewa, ndipo imaopsa anthu akunja.

⁴Choncho inu mukachenjere. Musakatsanzire akunjawo, musamakaiwope milungu yaoyo,

⁵mukakaona anthu akumeneko akuipembedza pa mdipiti. Koma mumtima mwanu muzikati, ‘Ambuye, ndinu nokha oti tizikupembedzani.’

⁶Chifukwa mngelo wanga ali nanu, ndipo azidzakuyang'anirani.”

⁷Milunguyo mmisiri adachita kuipala malilime ake, nkuikuta ndi golide ndi siliva. Koma ndiyonama ndipo ndiyosatha kulankhula.

⁸Anthu amatenga golide nkupanga zisoti zaufumu zoti aike pamutu pa milungu yao, monga momwe akadachitira pomupangira zokongoletsa mtsikana wokonda zoterezi.

⁹Nthaŵi zina, ngakhale ansembe omwe amakamchotsa mobisa golide ndi silivayo pa milungu yao nkumagulira zosoŵa zao.

¹⁰Mwinanso golide ndi silivayo amakagaŵirako akazi adama a ku nyumba ya milunguyo. Milungu imeneyi yomwe ili yopanga ndi golide, siliva kapena mtengo, amaiveka zovala ngati anthu, ngakhale kuti siingathe kuletsa dzimbiri ndi zitsenda kuti zisaiwononge.

¹¹Ataiveka mikanjo yofiirira, amapukuta nkhope zake kuchotsa fumbi lambiri limene lidaigwera.

¹²Milunguyo imakhala ndi ndodo yachifumu m'manja ngati atsogoleri a dziko, komabe siingathe kumupha munthu woinyoza.

¹³Ina imakhala ndi lupanga kapena nkhwangwa ku dzanja lamanja, komabe siitha kudziteteza kwa adani kapena kwa mbala.

¹⁴Zimenezi nzoonetsa kuti milungu imeneyi si yeniyeni. Tsono musamachite nayo mantha.

¹⁵Monga mbale imati ikasweka, ilibenso ntchito, ndi m'menenso iliri milungu yao, akaikhazika m'nyumba zake.

¹⁶M'maso mwake mumadzaza fumbi limene amalikutumula anthu oloŵamo.

¹⁷Paja amampiringidzira zitseko munthu amene wanyoza mfumu, ndipo akuyenera kukaphedwa. Ansembe amateronso: amateteza nyumba za milunguyi ndi zitseko zolimba, maloko ndi mipiringidzo, kuwopetsa mbala.

¹⁸Amayatsa nyale zochuluka kuposa zimene zili m'nyumba zaozao, koma milunguyo siiwona nyale ndi imodzi yomwe.

¹⁹Imakhala ngati chimtanda cha m'nyumba chimene anthu amati thima lake lidafumbwa. Zitsenda zimatuluka m'dothi nkumaidya ndi zovala zake zomwe, iyoyo osamvako kanthu.

²⁰Kumasoku kumachita kuti bii chifukwa cha utsi wa m'nyumba zake.

²¹Mileme, anamzeze ndi mbalame zina zimadzaitera pathupi pake ndi pamutu pomwe, apakanso amadzaseŵera pomwepo.

²²Choncho mungathe kutsimikiza kuti si milungulungu, ndiye inu musaiwope.

²³Golide amene amaiveka kuti iziwoneka yokongola, munthu akapanda kuchotsa litsiro lake, milungu imeneyi siingaŵale konse. Ngakhale pamene ankaiwumba, iyoyo siinkamvako kanthu.

²⁴Inde milunguyo adaigula ndi mtengo wapatali, komabe mwa iyoyo mulibe mpweya wamoyo.

²⁵Popeza kuti siitha kuyenda, amachita kuinyamula pa mapewa, chizindikiro chakuti ndi yachabechabe. Ngakhale anthu oipembedza imaŵachititsa manyazi, chifukwa imati ikagwa pansi, anthuwo amachita kuiimiritsa.

²⁶Akaiimiritsa kumene, siithanso kuyenda pa yokha. Ndipo wina akaipendeketsa, siitha kuwongoka pa yokha. Kuipatsa mphatso nchimodzimodzi kupatsa anthu akufa.

²⁷Zopereka kwa milungu imeneyi, ansembe amazigulitsa, ndalama zake nkudya iwowo. Mwina akazi a ansembewo amasungako zina mwa zoperekazo mu mchere, koma sathandizira anthu osauka ndi aumphaŵi.

²⁸Ngakhale akazi amene ali pakati pa msambo, kapena amene ali m'chikuta, amaloledwa kugwira nsembe zopereka kwa milunguyo. Choncho mukuwona kuti imeneyi si milungu, ndiye musachite nayo mantha.

²⁹Nanga amaitchula bwanji kodi kuti milungu, pamene ndi akazi amene amaperekera zakudya kwa milungu imeneyi yopangidwa ndi golide, siliva ndi mtengo?

³⁰M'nyumba za milunguyo ansembe amangokhala pansi atang'amba zovala zao, tsitsi ndi ndevu atameta, kumutu osavala kanthu.

³¹Amadzuma ndi kumalira pamaso pa milungu yaoyo, monga m'mene anthu amachitira pa maliro.

³²Ansembe amatenga zovala za milunguyo kuti aveke akazi ao ndi ana ao.

³³Ngakhale aichitire zoipa kapena zabwino, siibwezera. Ilibe mphamvu zolonga mfumu kapena kuichotsa.

³⁴Siithanso kupezetsa chuma kapena ndalama. Ngati wina adalonjezana nayo kanthu, napanda kuchita kanthuko, iyo siitha kumkakamiza kuti achite ndithu.

³⁵Siingathe kupulumutsa munthu ku imfa, kapena kuwombola anthu ofooka m'manja mwa anthu amphamvu.

³⁶Siingathe kupenyetsa munthu wakhungu kapena kuthandiza munthu wozunzika.

³⁷Siingamvere chifundo mkazi wamasiye, kapena kuchitira zabwino mwana wamasiye.

³⁸Zinthu zopanga ndi mitengozi, zokutidwa ndi golide ndi siliva, zili ngati miyala yakuphiri, ndipo amene amazipembedza adzachita manyazi.

³⁹Tsono wina angathe bwanji kuziyesa milungu, kapena kuzitchula milungu?

⁴⁰Ngakhale anthu a ku Kalidea omwe sailemekeza milungu yaoyo. Akapeza munthu amene salankhula, amapita naye ku fano la Belo, ndipo amalipempha kuti limlankhulitse, ngati kapena ilolo nkumva.

⁴¹Komabe iwo satha kuzindikira kanthu pamenepo ndipo safuna kuisiya milungu yachabeyo, chifukwa alibe nzeru konse.

⁴²Paja akazi amamanga zingwe m'chiwuno, nkukakhala pansi m'mphepete mwa miseu, namatentha gaga ngati lubani.

⁴³Tsono mmodzi mwa iwo akatengedwa ndi mwamuna wina wodutsa, nagona naye, amapeputsa mnzake kuti ngwopanda chikoka ngati iyeyo, ndipo chingwe chake nchosaduka.

⁴⁴Zonse zimene anthuwo amachitira milungu imeneyi nzabodza. Tsono wina angavomere bwanji kuti imeneyi ndi milungu?

⁴⁵Milunguyo idapangidwa ndi amisiri a matabwa ndi a golide, choncho siingakhalire mwina koma monga momwe amisiriwo adaipangira.

⁴⁶Ndipo kosapeneka konse amisiri oipangawo iwo omwe sadzakhalitsa pansi pano, tsono zinthu zimene amapangazo zingasanduke milungu bwanji?

⁴⁷Amangosiyira anthu anzao zinthu zabodza ndi zochititsa manyazi.

⁴⁸Pakabuka nkhondo kapena zoopsa zina, ansembe amakambirana za kumene angabisale pamodzi ndi milungu yao.

⁴⁹Tsono amalephera bwanji kumvetsa kuti imeneyi si milungu, popeza kuti siingathe kudzipulumutsa pa nthaŵi ya nkhondo kapena ya zovuta zina?

⁵⁰Milungu imeneyi, yopangidwa ndi mitengo, ndi kukutidwa ndi siliva ndi golide, idzazindikirika bwino lino kuti ndiyonama. Anthu a mitundu yonse ndi mafumu omwe adzadziŵa kuti si milungu konse, koma ndiyopangidwa ndi anthu ndipo ilibe konse mphamvu.

⁵¹Kodi aliponso wina amene sadazindikirebe kuti imeneyi si milungu konse?

⁵²Milungu imeneyi siingathe kulonga munthu ufumu, siingathenso kugwetsera anthu mvula.

⁵³Siingathe kuyendetsa zinthu zake kapena kupulumutsa wina amene ali pa mavuto, chifukwa ilibe mphamvu. Ili ngati makwangwala ongouluka pakati pa thambo ndi dziko lapansi.

⁵⁴Moto ukadzabuka m'nyumba ya milungu imeneyi, ansembe ake adzathaŵa, nadzapulumuka, koma milungu yamitengoyo, yokutidwa ndi golide ndi siliva, idzapsa monga mitengo ya m'nyumba.

⁵⁵Siingathenso kulimbana ndi mfumu kapena adani ena.

⁵⁶Nanga tingathe bwanji kuvomera ngakhale kungoganizako kuti zosemazi ndi milungu?

⁵⁷Milungu imeneyi siingathe kupulumuka kwa anthu akuba ndi achifwamba.

⁵⁸Milungu yosemayi, yokutidwa ndi golide ndi siliva, anthu anyonga adzailanda golide ndi siliva wakeyo, pamodzi ndi zovala zake zomwe nkuthaŵa nazo, ndipo milunguyo siidzatha kudzipulumutsa yokha.

⁵⁹Kukhala mfumu yoonetsa kulimba mtima kwake, kapena kukhala mtsuko wam'nyumba wogwira ntchito zofuna mwiniwake, kuli bwino koposa kukhala milungu yabodzayi. Kukhala chitseko choteteza katundu amene ali m'nyumba kapena mzati wamtengo m'nyumba ya mfumu, kuli bwino koposa kukhala milungu yonamayi.

⁶⁰Dzuŵa, mwezi ndi nyenyezi zimene zimaŵala zili ndi ntchito yakeyake ndipo zimagonjera Mulungu.

⁶¹Chimodzimodzi ching'aning'ani chikang'anima, chimaoneka ponseponse, ndi mphepo imakuntha pa dziko lonse.

⁶²Mulungu akalamula mitambo kuti iyendere dziko lonse lapansi, imayenderadi. Moto wochoka kumwamba kuti utenthe mapiri ndi nkhalango, umachita zimene adaulamula.

⁶³Koma milunguyi siilingana nazo zinthu zimenezo pa maonekedwe kapena pa mphamvu.

⁶⁴Tsono tisamaganiza ndi kunena kuti imeneyi ndi milungu, chifukwa siingathe kuweruza milandu, ndipo siingathe kuchitira anthu zabwino.

⁶⁵Motero popeza kuti mwazindikira kuti imeneyi si milungu, musaiwope tsono.

⁶⁶Siingathe konse kutemberera mafumu kapena kuŵadalitsa.

⁶⁷Siingaonetse mitundu ya anthu zizindikiro zakumwamba, siingaŵale monga dzuŵa, ndipo siingaunikire monga mwezi.

⁶⁸Nyama zikuipambana milungu imeneyi, chifukwa zimatha kudzipulumutsa zokha ndi kuthaŵa zoopsa.

⁶⁹Choncho palibe umboni uliwonse wotsimikiza kuti imeneyi ndi milungudi; nchifukwa chake musaiwope.

⁷⁰Milungu yao yosemayo, yokutidwa ndi golide ndi siliva, ili ngati chithunzi choingira mbalame m'munda wa minkhaka, siiteteza kanthu konse.

⁷¹Milungu imeneyi ikufanafana ndi mtengo waminga m'munda m'mene mbalame zimateramo, ikufanafananso ndi mtembo umene auponya mu mdima.

⁷²Kuwola kwa zovala zake zofiirira ndi zabafuta kumaonetsa kuti imeneyi si milungu. Potsiriza iyo yomwe idzafumbwa, ndipo dziko lonse lidzachita nayo manyazi.

⁷³Nchifukwa chake tsono munthu wolungama, amene alibe mafano otereŵa, ali bwino kwambiri. Iyeyo anthu sadzachita naye manyazi.